އިންޑިއާގެ އިރުމަތީ ސިޓީއެއް ކަމަށްވާ ކޮލްކަޓާގެ ހޮޓަލެއްގައި ބުދަ ދުވަހު ހިނގި އަލިފާނުގެ ހާދިސާއެއްގައި، ކުޑަކުއްޖަކާއެކު މަދުވެގެން ނުވަ މީހުން މަރުވެފައިވާ ކަމަށް އެ ސިޓީގެ ފުލުހުން ބުނެފި އެވެ.
ފުލުހުންގެ އިސް އޮފިސަރަކު ރޮއިޓާސް ނިއުސް އެޖެންސީއަށް މައުލޫމާތު ދެއްވި ގޮތުގައި، އެ ހޮޓަލުގެ ދެވަނަ ފަންގިފިލާގައި އަލިފާން ރޯވީ އެ ގައުމުގެ ގަޑިން ދަންވަރު 2:50 ހާއިރު އެވެ. އަދި އަލިފާން ރޯވިތާ ގަޑިއެއްހާއިރު ތެރޭގައި އަލިފާންގަނޑު ކޮންޓްރޯލް ކުރެވުނު ކަމަށް އޭނާ ވިދާޅުވި އެވެ.
މި ހާދިސާގައި ހޮޓަލުގައި ތިބި 30 އެއްހާ މީހުން ރައްކާތެރިކަމާއެކު ބޭރަށް ނެރެފައިވާ ކަމަށާއި، މި އަލިފާނުގެ ހާދިސާ ހިނގަން މެދުވެރިވީ ކަރަންޓު ޝޯޓް ސާކިޓެއްގެ ސަބަބުން ކަމަށް ބެލެވޭ ކަމަށް ފުލުހުން ބުންޏެވެ.
ނަމަވެސް، އަލިފާން ރޯވާން މެދުވެރިވި ސީދާ ސަބަބު އަދި ކަށަވަރު ކުރެވިފައި ނުވާ ކަމަށް އެ އޮފިސަރު އިތުރަށް ވިދާޅުވި އެވެ.
އިންޑިއާގެ ބައެއް މީޑިއާތަކުން ރިޕޯޓްކޮށްފައިވާ ގޮތުގައި، މި ހާދިސާގައި އަނިޔާވި މީހުންގެ ތެރެއިން މަދުވެގެން ހަ މީހަކަށް މިހާރު ދަނީ ހޮސްޕިޓަލުގައި ފަރުވާ ދެމުންނެވެ.
އޭއެންއައި ނިއުސް އެޖެންސީން، އެ ސިޓީގެ ފަޔާ ޑިޕާޓްމަންޓާ ހަވާލާދީ ރިޕޯޓްކޮށްފައިވާ ގޮތުގައި، މި ހާދިސާގައި މަރުވި މީހުންގެ ތެރޭގައި ބޭސްފަރުވާއަށް ކޮލްކަޓާއަށް ގޮސް އުޅުނު ބަންގްލަދޭޝްގެ ރައްޔިތުން ހިމެނެ އެވެ.
އެންޑީޓީވީން ރިޕޯޓްކޮށްފައިވާ ގޮތުގައި، މި ހާދިސާގައި މަރުވި ނުވަ މީހުންނަކީ ވެސް ބަންގްލަދޭޝްގެ ރައްޔިތުންނެވެ.
އެހެން ނަމަވެސް، ރޮއިޓާސްއާ ވާހަކަދެއްކެވި ފުލުހުންގެ އިސް އޮފިސަރު ވިދާޅުވީ، މަރުވި މީހުންނަކީ ކޮން ގައުމެއްގެ ބައެއްކަން އަދި ރަސްމީކޮށް ކަށަވަރު ކުރެވިފައި ނުވާ ކަމަށެވެ.
މި ހާދިސާ ހިނގި ހޮޓަލަކީ ކޮލްކަޓާގެ މެދުތެރޭގެ ކުޑަ ސަރަހައްދެއްގައި ހުންނަ، އަގުހެޔޮކޮށް ކޮޓަރިތަކާއި ކެއުމުގެ ހިދުމަތް ދޭ ތަނެކެވެ.
