ދިވެހި ބަހުގެ އެކަޑަމީން ބާއްވާ ވާހަކަ ދެއްކުމުގެ ގައުމީ މުބާރާތުގެ ސާނަވީ ގިންތީގެ ބައިވެރިންނަށް ކުރިމަތިލާން ހުޅުވާލި ފުރުސަތުގެ ސުންގަޑި ދޮޅު މަސް ދުވަހަށް އިތުރުކޮށްފި އެވެ.
ދިވެހި އަދަބިއްޔާތަށް ގިނަ ހިދުމަތްތަކެއް ކޮށްދެއްވި އިބްރާހީމް ޝިހާބުގެ ހަނދާނީ ވާދައިގެ ތަށީގެ ނަމުގައި ބާއްވާ އެ މުބާރާތުގައި ބައިވެރިވާން ހުޅުވާލި މުއްދަތު މާދަމާ މެންދުރަށް ހަމަވާ ގޮތަށް އޮއްވައި، އެކަޑަމީން ވަނީ އެ މުއްދަތު އަންނަ މަހުގެ 30 ވަނަ ދުވަހުގެ މެންދުރު 1:00 އަށް އިތުރުކޮށްފަ އެވެ.
މި މުބާރާތުގެ އެހެން ގިންތީގެ ބައި އަންނަ މަހުގެ ނުވަވަނަ ދުވަހު ފެށި ނަމަވެސް، ސްކޫލް ދަރިވަރުންގެ އޯލެވެލް އިމްތިހާން އެ ދުވަސްވަރަށް ދިމާވާތީ ސާނަވީ ގިންތީގެ ބައި ކުރިއަށް ގެންދަން ނިންމާފައި ވަނީ ޖޫން މަހުގެ 22 ވަނަ ދުވަހުން ފެށިގެން 30 ވަނަ ދުވަހާ ހަމައަށެވެ.
މި ގިންތީގެ ދަރިވަރުންގެ ވާހަކަ ދެއްކުން ފަށަން ފަށް ދުވަހަށް ވުމުން މައުޟޫއުތައް ލިބޭނެ ކަމަށް އެކަޑަމީގެ އިއުލާނުގައިވެ އެވެ.
ހަތަރު ގިންތިއަކަށް ބަހާލައިގެން ކުރިއަށް ގެންދާ ވާހަކަ ދެއްކުމުގެ މި މުބާރާތުގައި ސާނަވީ ގިންތި ނުވަތަ ސްކޫލް ދަރިވަރުންގެ ބައި ވެސް ގެންދަނީ ތިން އުމުރުފުރައަކަށް ބަހާލައިގެންނެވެ. އެއީ ދަށު ސާނަތީ، ސާނަވީ، އަދި މަތީ ސާނަވީ އެވެ.
މީގެ އިތުރުން ދެން އޮތީ މަތީ ތައުލީމުގެ ގިންތި ކަމުގައިވާ ޔުނިވާސިޓީއާއި ކޮލެޖް އިންސްޓިޓިއުޓްތަކާއި އެކަޑަމީތަކަށް ހާއްސަ ބަޔަކާއި، އަމިއްލަ ފަރާތްތަކުގެ ބަޔެވެ.
މި މުބާރާތުގެ ގަވާއިދާއި ބައިވެރިވާން އެދޭ ފޯމާއި މުބާރާތާ ގުޅުން ހުރި އެހެނިހެން ލިޔެކިޔުންތައް މި އެކެޑަމީންނާއި މި އެކެޑަމީގެ ވެބްސައިޓް ލިބެން ހުންނާނެއެވެ. އަދި އިތުރު މައުލޫމާތު މި އެކެޑަމީގެ ނަންބަރު 7986230 ން ލިބޭނެ އެވެ.
