ރާއްޖޭގެ ހުރިހާ އަތޮޅެއް ހައި ސްޕީޑް ފެރީ ނެޓްވޯކަކުން ގުޅާލުމުގެ ގޮތުން ސަރުކާރުން ފަށާފައިވާ "އިންޓެގްރޭޓަޑް ނޭޝަނަލް ޕަބްލިކް ފެރީ ނެޓްވޯކުގެ" ދެވަނަ ފިޔަވައްސާއި ތިންވަނަ ފިޔަވަހި ހިންގަން ޕްލޭނިން މިނިސްޓްރީން އެމްޓީސީސީއާ ހަވާލުކޮށްފި އެވެ.
މި ނެޓްވޯކު ގާއިމުކުރުމުގެ މަސައްކަތުގެ ފުރަތަމަ ފިޔަވަހި ކުރިޔަށް ގެންދިޔަ އެމްޓީސީސީއާ މި މަސައްކަތްތައް ހަވާލުކުރުމާއެކު، މުޅި ރާއްޖޭގައި މި ނެޓްވޯކު ގާއިމުކުރުމުގެ މަސައްކަތް ކުރާނީ އެ ކުންފުނިންނެވެ.
ހަ ޒޯނަކަށް ބަހާލައިގެން ކުރިޔަށް ގެންދާ މި މަޝްރޫއުގެ ފުރަތަމަ ފިޔަވަހީގެ ދަށުން ހިދުމަތް ދޭން ފަށާނީ ހއ. އާއި ހދ. އާއި ށ. އަތޮޅުގަ އެވެ.
ފެރީ ނެޓްވޯކުގެ ދެވަނަ ފިޔަވައްސާއި ތިންވަނި ފިޔަވަހީގައި ހިމެނޭ އަތޮޅުތައް
ޒޯން 2 – ނ.، ރ.، ބ.، ޅ. އަތޮޅު
ޒޯން 3 – ކ.، އއ.، އދ.، ވ. އަތޮޅު
ޒޯން 4 – މ.، ފ.، ދ.، ތ.، ލ. އަތޮޅު
ޒޯން 5 – ގއ. އާއި ގދ. އަތޮޅު
ޒޯން 6 – ޏ. އަތޮޅާއި ސ. އަތޮޅު
ޕްލޭނިން މިނިސްޓްރީން އިއްޔެ ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އާދަމް އާޒިމް އެވެ. މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކެޓްރީ ޒީނިޔާ ހަމީދެވެ.
މި އެއްބަސްވުމުގެ ދަށުން މި ނެޓްވޯކަށް ބޭނުންވާ 65 ލޯންޗާއި 149 ޓާމިނަލް އެޅިގެންދާނެ އެވެ. މި ޓާމިނަލްތަކުގެ ތެރޭގައި ހިމެނެނީ ޒޯނުތަކުގެ މައި ޓާމިނަލްތަކުގެ ގޮތުގައި ބޭނުންކުރަން އަޅާ ފަސް ޓާމިނަލާއި 31 ފެރީ ޓާމިނަލާއި 114 ފެރީ ސްޓޮޕެވެ.
މި ހުރިހާ މަސައްކަތެއް ވެސް ހިނގާނީ އެމްޓީސީސީގެ ބެލުމުގެ ދަށުންނެވެ.
މިކަމާ ގުޅިގެން އެމްޓީސީސީން ނެރުނު ބަޔާނެއްގައި ބުނީ، މި މަޝްރޫއުގެ ދެވަނަ ފިޔަވައްސާއި ތިންވަނަ ފިޔަވަހި ނިމުމުން ހައި ސްޕީޑު ފެރީ ވިއުގައިގެ މަސައްކަތް އެއްކޮށް ނިމިގެން ދާނެ ކަމަށެވެ.
ހައި ސްޕީޑް ފެރީ ނެޓްވޯކުގެ ފުރަތަމަ ފިޔަވަހީގެ މަސައްކަތުގެ ދަށުން އެމްޓީސީސީން ދަނީ ފެރީތައް ބަނުމާއި ފެރީ ޓާމިނަލްތައް އެޅުމުގެ މަސައްކަތް ބާރު ސްޕީޑުގައި ކުރަމުންނެވެ.
މި ލޯންޗުތައް ބަންނަން އެ ކުންފުނިން ހަވާލުކުރީ އެ ދާއިރާގައި ފުންނާބު އުސް ގަލްފު ކްރާފްޓު ކުންފުންޏާ އެވެ. އެ ކުންފުންޏާ ހަވާލުކުރީ ޖުމްލަ 17 ލޯންޗު ބަންނާށެވެ.
މީގެ ފުރަތަމަ ލޯންޗުތައް ބަނދެ ޓެސްޓުކުރީ މިދިޔަ ސެޕްޓެމްބަރު މަހު އެވެ.
އެމްޓީސީސީން ބުނެފައިވާ ގޮތުގައި އެއާކޯން ކޮށްފައި ހުންނަ މި ލޯންޗުތަކުގައި ސީޓުތައް ފަސޭހަވެފައި ޖާގަ ތަނަވަސް ވާނަ އެވެ. ފާހަނަ އާއި ލަގެޖު ބަހައްޓާ ތަނެއް ވެސް ހުންނާނެ އެވެ.
އޭގެ އިތުރުން މި ލޯންޗުތައް ފަރުމާކޮށްފައިވަނީ ހާއްސަ އެހީއަށް ބޭނުންވާ މީހުންނަށް ފަސޭހައިން އަރާފޭބޭގޮތަށް އަދި ފަސޭހައިން ބަލި މީހުން އުފުލޭ ގޮތަށް ކަމަށް ވެސް އެ ކުންފުނިން ބުންޏެވެ.
ރާއްޖެ ޓްރާންސްޕޯޓު ލިންކުގެ ނަމުގައި އެމްޓީސީސީން ފަށާ މި ހިދުމަތާ ގުޅިގެން އެންމެ ފަހުން އެމްޓީސީސީގެ އެމްޑީ އާދަމް އާޒިމް މީޑިއާތަކަށް ވިދާޅުވެފައިވާ ގޮތުގައި ތާވަލާ އެއްގޮތަށް އޭޕްރިލް މަހު ފަހުކޮޅު ހިދުމަތް ދޭން ފެށޭ ވަރު ވާނެ އެވެ.
