ކިރްގިސްތާންގައި މިއަދު ފެށި އޭޝިއަން ފުޓްސަލް ކަޕް ކޮލިފައިންގައި މުބާރާތުގެ އެންމެ ފަހުގެ ޗެމްޕިއަން އީރާނުން ރާއްޖޭގެ ފުޓްސަލް ޓީމު 17-0 އިން ބަލިކޮށްފި އެވެ.
މިއީ ބައިނަލްއަގުވާމީ ފުޓްބޯޅައިގައި އީރާނުން ރާއްޖެ ކޮޅަށް 17 ގޯލު ޖެހި ދެ ވަނަ ފަހަރެވެ. މީގެ ކުރިން ފުޓްބޯޅައިގައި 1997 ވަނަ އަހަރު އީރާނުން ވަނީ ރާއްޖެ 17-0 އިން ބަލިކޮށްފަ އެވެ.
ފުޓްސަލްގައި އީރާނަކީ މި ވަގުތު ދުނިޔޭގެ ރޭންކިން ހަ ވަަނަ އެވެ. އޭޝިއާގެ ފުޓްސަލް މުބާރާތުގެ އެންމެ ފަހުގެ ޗެމްޕިއަން، އީރާނަކީ 12 ފަހަރު މި ބައްރުގެ ޗެމްޕިއަންކަން ހޯދި ޓީމެކެވެ. މިހާތަނަށް އޭޝިއާގެ ފުޓްސަލް މުބާރާތް 15 ފަހަރު ބޭއްވިއިރު، އިރާނަކީ 12 ފަހަރު ޗެމްޕިއަނުންނެވެ. އީރާނަށް ތަށި ނުލިބުނު ތިން ފަަހަރުގެ ތެރެއިން ދެ ފަހަރު އެ ޓީމު ދިޔައީ ތިން ވަނަ އެވެ. އަނެއް ފަހަރު އެ ޓީމަކީ ރަނަރަޕެވެ. އަނެއްކޮޅުން މިއީ ފުޓްސަލް އޭޝިއަން ކަޕްގެ ކޮލިފައިންގައި ރާއްޖެ ވާދަކުރާ ފުރަތަމަ ފަހަރެވެ.
ގައުމީ ފުޓްސަލް ޓީމު.
ކިރްގިސްތާންގެ ބިޝްކެކްގެ ގެޒްޕްރޮމް ސްޕޯޓްސް ކޮމްޕްލެކްސްގައި މިއަދު ހަވީރު ކުޅުނު މެޗުގެ ފުރަތަމަ ހާފުގައި އީރާނުން ރާއްޖެ ކޮޅަށް ހަ ގޯލު ޖެހި އެވެ. އަނެއް 11 ގޯލު ޖެހީ ދެ ވަނަ ހާފުގަ އެވެ.
ގިނަ ކުޅުންތެރިންތަކަކަށް ރާއްޖޭން ފުރުސަތު ދީގެން ގޯލު ޖަަހަން ފުރުސަތު ތަނަވަސްކުރެވޭތޯ ވެސް ބެލި އެވެ. އެކަމަކު، ގޯލެއް ޖެހޭގޮތެއްނުވި އެވެ. މެޗުގެ ފަހު ކޮޅަށް ދިޔައިރު، އީރާނުން މި ލެވަލްގައި ކުޅެފައި ހުރުމުގެ ތަޖުރިބާ ވަރަށް ބޮޑަށް ބޭނުންކޮށް، ގޯލުގެ ފަރަގު ބޮޑުކުރި އެވެ.
ކޮލިފައިންގައި ރާއްޖޭން ކުޅޭ ދެ ވަނަ މެޗުގައި މާދަމާރޭ 19:00 ގައި ކުޅޭނީ ކިރްގިސްތާނާ އެވެ. އަދި އަންގާރަ ދުވަހު ހަވީރު، ކޮލިފައިން ގްރޫޕްގެ ފަހު މެޗުގައި ތުރުކުމެނިސްތާނާ ބައްދަލުކުރާ މެޗު އޮތީ 16:00 ގަ އެވެ.
ގައުމީ ފުޓްސަލް ޓީމުން މިދިޔަ މަހު ތައިލެންޑްގައި ބޭއްވި އިންވިޓޭޝަނަލް ކަޕްގެ ފަސް ވަނަ ހޯދިއިރު، އެ މުބާރާތަށް ފަރިތަކުރުންތައް ބޭއްވީ އެފްއޭއެމްގެ މިނީ ޓާފާއި ގިޔާސުއްދީން ސްކޫލް ހޯލްގައި ހުރި މެޓް ދަނޑުގެ އިތުރުން ޕީކޭ ސަރަަހައްދު ފުޓްސަލް ދަނޑުގަ އެވެ.
ސަރުކާރު ތަކުން މާލޭގައި އަޅާފައިވާ ފުޓްސަލް ދަނޑުތަކަކީ އިންޓަނޭޝަނަލް ފުޓްސަލް ކުޅެން ބޭނުންވާ ސައިޒުގެ ދަނޑުތަކެއް ކަމަށް ނުވާއިރު، ޓާފުން އަޅާފައިވާ ދަނޑުތަކެއް ކަމަށްވާތީ އެ ތަންތަނުގައި ރަނގަޅު ޕްރެކްޓިހެއް ނުކުރެވެ އެވެ. އަދި ރާއްޖޭގައި ފުޓްސަލް އިންޑޯ ކޯޓެއް ނެތުމުން ބައިނަލްއަގުވާމީ މުބާރާތަކަށް ތައްޔާރުވާން ހުރި ގޮންޖެހުންތައް ވަރަށް ބޮޑެވެ.
ރަނގަޅު ޕިޗެއްގައި ޕްރެކްޓިސް ކުރަން ނުލިބި އޮއްވައި، ކިރްގިސްތާނަށް ކޮލިފައިން ކުޅެން ފުރަން ކައިރިވެފައި ވަނިކޮށް ފަހު ވަގުތު ޕްރެކްޓިސްތައް ކުރިއަށް ގެންދަން ލިބުނީ ހިރިޔާ ސްކޫލް ހޯލެވެ. މުބާާރާތަށް ފަރުުމާ ހަމައަށް ގައުމީ ފުޓްސަލް ޓީމުގެ ޕްރެކްޓިސްތައް ފަހުން ކުރިއަށް ދިޔައީ ހިރިޔާ ސްކޫލްގަ އެވެ. މިއީ ހިރިޔާ ސްކޫލް މެނޭޖްމަންޓާ މަޝްވަރާކޮށް، އެފްއޭއެމުން ހަމަޖައްސައިދިން ތަނެކެވެ.
