ފުލުހުންގެ ފަރާތުން އާންމު ރައްޔިތުން ހޯދަންޖެހޭ ހިދުމަތްތައް މޯބައިލް ފޯނަށް އަޅާ އެޕްލިކޭޝަނުން ލިބޭނެ ގޮތް މިރޭ ހަދައިފި އެވެ.
ފުލުހުންގެ މި މޯބައިލް އެޕްލިކޭޝަން ތައާރަފްކޮށްދެއްވީ ފުލުހުންގެ ހިދުމަތަށް 89 އަހަރު ފުރުން ފާހަގަކުރުމަށް މިހާރު ކުރިއަށްދާ ޖަލްސާއެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.
އެ އެޕްލިކޭޝަނަކީ ފުލުހުންގެ ހިދުމަތްތައް މޯބައިލް މެދުވެރިކޮށް ހޯދުމަށްޓަކައި ފަރުމާކޮށްފައިވާ އެޕްލިކޭޝަނެކެވެ. އެގޮތުން މި އެޕްލިކޭޝަން ރަޖިސްޓްރީ ވުމަށްފަހު ޑްރައިވިންގް ލައިސެންްސްގެ މައުލޫމާތާއި އުޅަނދުތަކުގެ އަހަރީފީ ސްޓޭޓަސްގެ އިތުރުންވެސް ގިނަ މައުލޫމާތުތައް ބަލާލެވޭނެ އެވެ.
އަދި މައްސަލަ އެއް ހުށަހެޅުމުގެ އިތުރުން ހުށަހަޅާ މައްސަލަތަކުގެ އަދާހަމަ ބެލުމާއި ފުލުހުން ފޯރުކޮށްދޭ ހިދުމަތްތަކާއި ވަކިވަކި ފުލުހުންނާއި ގުޅޭ ޝަކުވާ އާއި ތައުރީފް އެ އެޕްލިކޭޝަނުން ހުށަހެޅޭނެ އެވެ. އަދި އެ މުއާމަލާތްތަކުގެ ރެކޯޑު ވެސް އެޕްލިކޭޝަން މެދުވެރިކޮށް އެއްކުރެވޭނެ އެވެ.
އޭގެ އިތުރުން، ކުށުގެ ރިޕޯޓް ހޯދުމަށް ހުށަހަޅައި، ޕޮލިސް ކްލިއަރެންސް ސެޓްފިކެޓަށް އެދުމުގެ އިތުރުން ކްލިއަރެންސް ސެޓްފިކެޓް ވެސް އެޕްލިކޭޝަން މެދުވެރިކޮށް ލިބޭނެ އެވެ. އަދި އެ ސެޓްފިކެެޓްގެ ސައްހަކަން އެޕްލިކޭޝަން މެދުވެރިކޮށް ކަށަވަރު ކުރެވޭނެ އެވެ.
އެ އެޕްލިކޭޝަން ފަރުމާކޮށްފައި ވަނީ ފުލުހުންނަށް ގުޅަން ޖެހިއްޖެ ހާލަތެއްގައި ނޭބާހުޑް ޕޮލިސް އޮފިސަރުންގެ މައުލޫމާތާއި ޕޮލިސް ސްޓޭޝަން ތަކުގެ މައުލޫމާތު ކޮންމެ ތަނެއްގައި ހުރެގެން ވެސް ފަސޭހަކަމާއެކު ބަލާލެވޭ ގޮތަށެވެ.
