ކޮވިޑުގެ ސަބަބުން 2020 ވަނަ އަހަރުގެ ރޯދަ މަހު އިސްލާމިކް ސްޓޫޑިއޯ އިން ގެނެސްދިން ޕްރޮގްރާމްތައް ތައްޔާރު ކުރުމަށް އިސްލާމިކް މިނިސްޓްރީ ގައި ލޮކްޑައުންވި މުވައްޒަފުން ކޮށްފައިވާ މަސައްކަތާއި މަސައްކަތުގެ ހާޒިރީ ނުބަލަހައްޓައި އިތުރުގަޑީގެ ފައިސާ ދީފައިވާ ކަމަށް އެ މިނިސްޓްރީގެ މާލީ އޮޑިޓް ރިޕޯޓުން ދައްކައިފި އެވެ.
ޕްރޮގުރާމްތައް ގެނެސްދިނުމަށްޓަކައި މިނިސްޓްރީގައި ތިބޭ މުވައްޒަފުން ރަސްމީ ދުވަސްތަކާއި ބަންދު ދުވަސްތަކުގައި އިތުރުގަޑީގެ ގޮތުގައި ހަތް ގަޑިއިރު މަސައްކަތްކުރާ ގޮތަށް ހަމަޖެއްސުމަށާއި، އެ މުވައްޒަފުންނަށް ބަންދު ދުވަހުގެ އިނާޔަތް ހަމަޖެއްސުމަށާއި، އެ މުވައްޒަފުން ލޮކްޑައުންގައި ތިބޭ ދުވަސްތަކުގައި ހާޒިރީ ބެލެހެއްޓުމަށް މެއި 2، 2020 ގައި އެ މިނިސްޓްރީގެ ޕާމަނަންޓް ސެކްރެޓަރީ އޮތީ އަންގަވާފަ އެވެ.
އެ މުއްދަތުގެ ތެރޭގައި ހަތް ޕްރޮގްރާމެއް ގެެނެސްދިނުމަށް އަށް މުވައްޒަފަކު އެ މިނިސްޓްރީގައި ލޮކްޑައުންވެގެން ތިބި ކަމަށް އޮޑިޓް ރިޕޯޓަށް މައުލޫމާތު ދީފައި ވެއެވެ.
ނަމަވެސް، ލޮކްޑައުންވެގެން ތިބި މުވައްޒަފުންގެ ރަސްމީ ދުވަސްތަކުގައި އިތުރުގަޑީގައި މަސައްކަތް ކޮށްފައިވަނީ އަށް ގަޑިއިރު ކަމަށާއި، ބަންދު ދުވަސްތަކުގައި އިތުރުގަޑީގައި މަސައްކަތް ކޮށްފައިވަނީ 12 ގަޑިއިރުކަމަށް ބަލައިގެން މުސާރަ ހިސާބު ކުރުމަށް އީމެއިލް މެދުވެރިކޮށް މެއި 22، 2020 ގައި އަންގާފައިވާ ކަމަށް މި ރިޕޯޓުގައި ވެއެވެ.
"އެ މުވައްޒަފުންނަށް އިތުރުގަޑީގެ ފައިސާއާއި ބަންދު ދުވަހުގެ އެލަވަންސްގެ ގޮތުގައި ޖުމުލަ 130,137 ރުފިޔާ ދީފައިވަނީ އެ މުވައްޒަފުން ހަމަ ހަގީގަތުގައިވެސް އިތުރުގަޑީގެ ގޮތުގައި ކުރި މަސައްކަތަށް ކަމެއް ކަށަވަރެއް ނުކުރެވެއެވެ،" އޮޑިޓް ރިޕޯޓުގައި ބުންޏެވެ.
މުވައްޒަފުން ކޮށްފައިވާ މަސައްކަތާއި މަސައްކަތުގެ ގަޑި އެނގޭނެ ރެކޯޑުތައް އެކަށީގެންވާ ގޮތެއްގައި ބަލަހައްޓާފައި ނުވުމުން މުވައްޒަފުންނަށް އިތުރުގަޑީގެ ގޮތުގައި ދޭންޖެހޭ އަދަދު ނޫން އަދަދެއް އިތުރުގަޑީގެ އިނާޔަތުގެ ގޮތުގައި ދެވިފައިވުމަކީ އެކަށީގެންވާ ކަމެއް ކަމަށް ވެސް އޮޑިޓް އޮފީހުން ފާހަގަކޮށްފައި ވެއެވެ.
ގާނޫނުގައި އޮންނަ ގޮތުން އިތުރުގަޑީގެ ފައިސާ ދޭން ޖެހެނީ ކުރާ މަސައްކަތަކީ، ރަސްމީގަޑީގައި އެކަނި ކޮށްގެން ނިންމެން ނެތް ނުވަތަ އިދާރާގެ ފަރާތުން އަންގައިގެން ކުރަންޖެހޭ ހާއްސަ މަސައްކަތަކަށް ވާނަމަ އެވެ. އަދި، އެފަދަ މަސައްކަތްތަކަށް ޕީއެސް ނުވަތަ މާލީ ޒިންމާދާރު ވެރިޔާ ކަނޑައަޅާ އުސޫލެއްގެ ދަށުން ހުއްދަ ހޯދަން ޖެހެ އެވެ.
އޭގެ އިތުރުން، މުވައްޒަފުންނަށް އިތުރުގަޑީގެ ފައިސާ ދޭން ޖެހެނީ ކަނޑައަޅާފައިވާ އުސޫލާ އެއްގޮތަށް ހާޒިރީ ބަލަހައްޓައިގެން ކަމަށް ވެސް މާލިޔަތު ގަވާއިދުގައި ބަޔާންކޮށްފައި ވެއެވެ.
ކަނޑައަޅާފައިވާ އުސޫލުތަކުގެ ދަށުން ހާޒީރީ ޔަގީންކުރުމަށް ފަހު މެނުވީ އިތުރުގަޑީގެ ފައިސާ ދޫ ނުކުރުމަށް އޮޑިޓާ ޖެނެރަލްގެ އޮފީހުން ވަނީ އެދިފަ އެވެ.
ހަރުމުދަލުގެ ހިސާބު ބަލަހައްޓާފައި ނުވޭ
އިސްލާމިކް މިނިސްޓްރީ އާއި ކީރިތި ގުރުއާނާ ބެހޭ މަރުކަޒުގެ ހަރުމުދަލުގެ ރަޖިސްޓްރީގައި ހިމަނާފައިވާ ގިނަ އަދަދެއްގެ ހަރުމުދަލުގެ އަގާއި، ބައެއް މުދާ ބަހައްޓާފައި ހުރިތަން ރަޖިސްޓްރީގައި ހިމަނާފައި ނުވާ މައްސަލަ ވެސް އޮޑިޓް ރިޕޯޓުގައި ވަނީ ފާހަގަކޮށްފަ އެވެ.
އޭގެ އިތުރުން، ހަރުމުދަލުގެ ކޯޑު ނަންބަރު ބައެއް މުދަލުގައި ޖަހާފައިނުވާ ކަމަށް ވެސް އެ ރިޕޯޓުގައި ބުނެފައި ވެއެވެ.
މާލިއްޔަތު ގަވާއިދުގެ ދަށުން ދައުލަތުގެ އޮފީސްތަކުގައި ހުންނަ ހަރުމުދާ ހަމައަށް ހުރިތޯ އަހަރަކު އެއްފަހަރު ޔަގީންކުރަން ޖެހޭ ނަމަވެސް، 2020 ވަނަ އަހަރު އިސްލާމިކް މިނިސްޓްރީ އާއި ގުރުއާނާ ބެހޭ މަރުކަޒުން އެގޮތަށް އަމަލުކޮށްފައި ނުވާ ކަމަށް ވެސް ވަނީ ފާހަގަކޮށްފަ އެވެ.
.
