ދިވެހި ފުލުހުންގެ ހިދުމަތުގެ އިސްވެރިން މިހާރު އެމެރިކާއަށް ކުރައްވަމުން ގެންދަވާ ދަތުރުގެ ތެރެއިން އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި) ގެ ކައުންޓަޓެރަރިޒަމް، ބައިނަލްއަގްވާމީ އޮޕަރޭޝަންސް ޑިވިޝަންތަކާއެކު މައުލޫމާތު ހޯދުމުގެ ޓްރެއިނިން ބައްދަލުވުމެއް ބާއްވައިފި އެވެ.
ކޮމިޝަނަރު އޮފް ޕޮލިސް މުހައްމަދު ހަމީދު، އެސިސްޓެންޓް ކޮމިޝަނަރު އޮފް ޕޮލިސް މުހައްމަދު ރިޔާޒް އަދި އެސިސްޓެންޓް ކޮމިޝަނަރު އޮފް ޕޮލިސް އަބްުލް މަންނާނު ޔޫސުފް އިސްވެ ހުންނަވައި ކުރައްވާ އެ ދަތުރަކީ އެމެރިކާގެ ޖަސްޓިސް ޑިޕާޓްމެންޓުން ފަންޑުކޮށްގެން ކުރިޔަށްގެންދާ ސްޓަޑީ ޓުއާ ދަތުރެކެވެ.
އެ ދަތުރުގައި ރާއްޖޭގެ ފުލުހުންނާއި އެމެރިކާގެ ގާނޫނު ތަންފީޒުކުރާ އިދާރާތަކާއި ދެމެދުގައި އޮންނަ ގުޅުން އިތުރަށް ވަރުގަދަކޮށް ނުރައްކާތެރި ކުށްތައް ތަހުގީގުކުރުމުގައި އިދާރާތަކުގެ މެދުގައި ދަނެގަނެވިފައިވާ އެކި މައުލޫމާތު ވަނީ ބަދަލުކުރެވިފަ އެވެ.
އެ ދަތުރު މިހާރު ނިމިފައިވާއިރު ދަތުރުގެ ބައިވެރިން ވަނީ މިއަދު އެމެރިކާގެ އެފްބީއައި އާއި ބައްދަލުކޮށް އެ އެޖެންސީގެ ބައިނަލްއަގުވާމީ މަސައްކަތްތަކާއި ގުޅޭ ގޮތުން މައުލޫމާތު ހޯއްދަވާފަ އެވެ. އަދި އެ އެޖެންސީގެ ކައުންޓަޓެރަރިޒަމް ޑިވިޝަނާއި ބައިނަލްއަގުވާމީ އޮޕަރޭޝަންސްއާ ގުޅޭ ޑިވިޝަނު ވެސް މަސައްކަތްކުރާ ގޮތް ދަތުރުގައި ބައިވެރިވި ރާއްޖޭގެ ފުލުހުންގެ ހިދުމަތުގެ އިސްވެރިން ވަނީ އޮޅުންފިލުވި އެވެ.
އެ ދަތުރަކީ އެމެރިކާގެ ޖަސްޓިސް ޑިޕާޓްމެންޓުގެ އިންޓަނޭޝަނަލް ކްރިމިނަލް އިންވެސްޓިގޭޓިވް ޓްރެއިނިން އެސިސްޓެންސް ޕްރޮގްރާމްގެ ދަށުން ކުރި ދަތުރެކެވެ.
ދަތުރު މިހާރު ނިންމާލާފައިވާއިރު ދަތުރުގެ ބައިވެރިން ވަނީ އެމެރިކާގެ ނިއު ޔޯކުގައި މިވަގުތު ހުންނެވި އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދުގެ އަރިހަށް ވެސް ޒިޔާރަތްކޮށްފަ އެވެ.
