އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އަމުރަށް ލުބުނާނުގެ ވެރިރަށް ބެއިރޫތުގެ ދެކުނު ސަރަހައްދުތަކަށް އިޒްރޭލުން ދެމުންދާ ހަމަލާތަކުގެ ސަބަބުން، އިރާނާއި އެމެރިކާއާ ދެމެދު ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުމަށް ނުރައްކާވެދާނެ ކަމުގެ އިންޒާރު އިރާނުން ދީފި އެވެ.
އިރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ އެމެރިކާއާއެކު ވެފައިވާ އެއްބަސްވުމަކީ ލުބުނާނު ހިމެނޭހެން ހުރިހާ ފްރަންޓެއްގައި ހަމަލާ ބަދަލުކުރުން ހުއްޓާލުމުގެ އެއްބަސްވުމެއް ކަމަށެވެ. އަދި އެއްވެސް ފަރާތަކުން އެއްބަސްވުމާ ހިލާފުވުމަކީ މުޅި އެއްބަސްވުމާ ހިލާފުވުން ކަމަށް އޭނާ ވިދާޅުވި އެވެ.
މީގެ އިތުރުން، އެމެރިކާއާއެކު ނުސީދާކޮށް ކުރިއަށްގެންދާ މަޝްވަރާތައް އިރާނުން މެދުކަނޑާލަފާނެ ކަމަށް އެ ގައުމުގެ ތަސްނީމް ނިއުސް އެޖެންސީން ވަނީ ރިޕޯޓުކޮށްފަ އެވެ.
ތަސްނީމް ނިއުސް އެޖެންސީގެ މި ރިޕޯޓާ ގުޅޭގޮތުން އިރާނުގެ ސަރުކާރުން ރަސްމީކޮށް އެއްޗެއް ބުނެފައެއް ނުވެއެވެ. ނަމަވެސް އެ ގައުމުގެ ދައުލަތުގެ ޓީވީން ބުނެފައިވަނީ، އިޒްރޭލުން ލުބުނާނަށް ދޭ ހަމަލާތައް ނުހުއްޓައިފިނަމަ، އޭޕްރީލް 8 ގައި އަމަލުކުރަން ފެށި އެމެރިކާއާއެކު ވެފައިވާ ހަނގުރާމަ ހުއްޓާލުމުގެ އެއްބަސްވުން ނިމުމަކަށް އައުމުގެ ފުރުސަތު ބޮޑު ކަމަށެވެ.
ލުބުނާނުގައި ހިނގަމުންދާ ކަންކަމާއި އިރާނާއެކު ކުރެވޭ މަޝްވަރާތަކަކީ ވަކި ދެ ކަމެއްގެ ގޮތުގައި ބެލުމަށް އެމެރިކާއިން ވަނީ މަސައްކަތް ކޮށްފަ އެވެ. ނަމަވެސް އިރާނުން ބުނަމުންދަނީ ކޮންމެ އެއްބަސްވުމެއްގައި ވެސް ލުބުނާނުގެ ސުލްހަ ހިމެނެން ޖެހޭނެ ކަމަށެވެ.
އާދީއްތަ ދުވަހު އެމެރިކާގެ އޮފިޝަލަކު ވިދާޅުވި ގޮތުގައި، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ މަސްލަހަތު ފިނިކުރުމުގެ ރޭވުމެއް ނަތަންޔާހޫ އާއި ލުބުނާނުގެ ރައީސް ޖޯސެފް އައުންއަށް ހުށަހަޅުއްވާފަ އެވެ.
އޭޕްރީލް 16 ގައި އިޒްރޭލާއި ލުބުނާނާ ދެމެދު ހަނގުރާމަ ހުއްޓާލުމުގެ އެއްބަސްވުމެއް ގާއިމުކުރި ފަހުން، އިޒްރޭލުން ވަނީ ދެ ފަހަރެއްގެ މަތިން ބެއިރޫތަށް ހަމަލާދީފަ އެވެ. ރިޕޯޓްތައް ބުނާ ގޮތުން ވައިޓް ހައުސްއިން ދަނީ، އެމެރިކާ އާއި އިޒްރޭލް އަދި އިރާނާ ދެމެދު ހަނގުރާމަ ހުއްޓާލުމުގެ ބޮޑު އެއްބަސްވުމަކަށް ދިއުމަށް ކުރާ މަސައްކަތަށް ހުރަސް އެޅިދާނެތީ، ބެއިރޫތަށް ދޭ ހަމަލާތައް މަދުކުރުމަށް އިޒްރޭލަށް ބާރުއަޅަމުންނެވެ.
