"ބޮޑީ ވޯން ކެމެރާ" ނުވަތަ ގައިގައި ހަރުކުރާ ކެމެރާ މިއަދު ފުލުހުން ބޭނުން ކުރަން ފަށައިފި އެވެ.
އެކަމަށްޓަކައި މިއަދު ބޭއްވި ރަސްމިއްޔާގައި ކޮމިޝަނާ އޮފް ޕޮލިސް (ސީޕީ) މުހައްމަދު ހަމީދާއި ހޯމް މިނިސްޓަރު އިމްރާން އަބްދުﷲގެ އިތުރުން މިނިސްޓާ އޮފް ކްލައިމެޓް ޗޭންޖް އެންޓް ޓެކްނޮލަޖީ މިނިސްޓްރު އައިޝަތު ޝައުނާ ވެސް ބައިވެރިވެވަޑައިގެންނެވި އެވެ.
މިއަދު ބޭނުންކުރަން ފަށާފައި ވަނީ 200 ކެމެރާ އެވެ. އޭގެ އިތުރުން ވެސް 1200 ކެމެރާ ހޯދުމަށް މަސައްކަތް ފުލުހުން ދަނީ ކުރަމުންނެވެ.
މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ސީޕީ ވިދާޅުވީ ކޮވިޑާ ގުޅިގެން ބޮޑީ ކެމެރާ ބޭނުން ކުރަން ފެށުން ލަސްވި ކަމަށެވެ. ނަމަވެސް ކެމެރާގެ ވަސީލަތާއެކު ފުލުހުންގެ ހިދުމަތަށް ރައްޔިތުންކުރާ ކުރާ އިތުބާރު ބޮޑުވެގެންދާނެ ކަމަށް ސީޕީ ވިދާޅުވި އެވެ.
"ބޮޑީ ކެމް ބޭނުން ކުރަން މި ފަށަނީ ބޭނުން ކުރާނެ ގޮތް އެކުލަވާލެވި ބޭނުން ކުރާނެ ފުލުހުން ތަމްރީން ކުރެވިގެން. އަދި މިފަދަ ޒަމާނީ ޓެކްނޮލިޖިކަލް ވަސީލަތެއް ހިފައިގެން ފުލުހުންގެ މަގްސަދުތައް ހާސިލް ކުރުމަށް ފެށުން،" ސީޕީ ވިދާޅުވި އެވެ.
ސީޕީ ވިދާޅުވީ ބޮޑީ ވޮން ކެމެރާ ބޭނުން ކުރާ ހަމައެކަނި ބޭނުމަކީ ފުލުހުން ގޯސްކަމެއް ކުރާތޯ ބަލާ ފާރަވެރިވެ، ފިޔަވަޅު އެޅުން ނުން ކަމަށާއި ފުލުހުންގެ ތަފާތު ގިނަ މަގްސަދުތައް ހާސިލް ކުރުމަށް ބޮޑީ ކެމެރާގެ ސަބަބުން އެހީތެރިކަން ލިބޭނެ ކަމަށެވެ.
އެގޮތުން ފުލުހުންގެ މައްޗަށް ކުރާ ދޮގު ތުހުމަތުތަކާއި އަސްލެއް ނެތް އިލްޒާމް ތަކަށް ޖަވާބުދާރީވެ، ހަގީގަތް ހާމަކޮށްދިނުމުގައި އެހީތެރިވެދޭނެ ކަމަށް ސީޕީ ވިދާޅުވި އެވެ.
"މީގެ ސަބަބުން އެންމެ މުހިންމު މަންފާއެއް ކުރާނީ ހާލަތާ ބައްދަލުވާ ރައްޔިތުން. އެއާއެކު ކުރިމަތިލާ އޮފިސަރަށްވެސް ރައްކާތެރިކަން ލިބޭނެ. ފުލުހުންނަށް ކުރާ ތުހުމަތު ތަކަށް ސާފު ހައްލެއް މިކަމުން ހޯދައިދޭނެ،" މިނިސްޓަރު އިމްރާން ވިދާޅުވި އެވެ.
އޭގެ އިތުރުން މިނިސްޓަރު ޝައުނާ ވިދާޅުވީ ފުލުހުންގެ މުއައްސަސާއަކީ ރައްޔިތުން ބަލައިގަންނަ ތަނަކަށް ހެދުމަށް މި ސަރުކާރުން ގިނަ މަސައްކަތް ތަކެއް ކުރާ ކަމަށެވެ.
"މިއަދު މި ތައާރަފް ކުރެވޭ ދިވެހި ފުލުހުންގެ ބޮޑީ ކެމެރާ ބޭނުން ކުރަން ފެށުމަކީ ފުލުހުން ރިފޯމްކޮށް ފުލުހުންގެ ހިދުމަތަކީ މިހާރަށްވުރެ ބޮޑަށް ރައްޔިތުންގެ އިރުބާރު ލިބިފައިވާ ބަޔަކަށް ހެދުމަށް ރައީސް ވެ ވަޑައިގެންނެވި ވައުދު ފުއްދުމަށް ބޮޑު އެހީތެރިކަމެއް ލިބޭނެ ވަސީލަތެއް،" މިނިސްޓަރު ޝައުނާ ވިދާޅުވި އެވެ.
އެގޮތުން މި ވަސީލަތާއެކު ފުލުހުންނަކީ ޒިންމާދާރު އަދި ޖަވާބުދާރީވާ ހިދުމަތެއް ފޯރުކޮށްދޭ ބަޔަކަށްވުމަށް ވަރަށް ބޮޑަށް އެހީތެރިކަމެއް ލިބިގެންދާނެ ކަމަށް ވެސް މިނިސްޓަރު ވިދާޅުވި އެވެ.
އެންމެ ފުރަތަމަ ފުލުހުން އިއުލާން ކުރީ 1400 ބޮޑީ ކެމެރާ ހޯދުމަށެވެ. ނަމަވެސް ފަހުން ވަނީ އެ އަދަދު 200 އަށް ބަދަލުކޮށްފަ އެވެ. އަޖުމަ ބެލުމުގެ ގޮތުން ބޮޑީ ކެމަރާތަކެއް މިދިޔަ އަހަރުގެ ފެބްރުއަރީ މަހު ބޭނުން ކުރި އެވެ.
