މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގައި މަސައްކަތް ކުރާ މީހަކު ގިނަ އަދަދެއްގެ ބަނގުރަލާއެކު ހައްޔަރު ކޮށްފި އެވެ.
އެކަމާ ގުޅިގެން ފުލުހުން ބުނީ ޑްރަގް އެންފޯސްމެންޓް ޑިޕާޓްމެންޓުން މިރޭ އޮޕަރޭޝަނެއް ކުރިއަށް ގެންދާ ކަމަށެވެ. ނަމަވެސް އިތުރު ތަފްސީލެއް ނުދެ އެވެ.
ބަނގުރަލާއެކު ހައްޔަރުކުރި ދެ މީހުން-- ފޮޓޯ: މުހައްމަދު ޝާބިން / އަދަދު
މިރޭ ފުލުހުން ހިންގި އެ އޮޕަރޭޝަނުގައި ޖުމްލަ ދެ މީހުން ހައްޔަރުކޮށްފައިވާ ކަމަށް މައުލޫމާތު ލިބިފައި ވެއެވެ. އެ މީހުން ހައްޔަރު ކުރީ މިރޭ 8:30 ކަށްހާއިރު އެވެ. އޭގެ ތެރެއިން އެކަކަކީ އެމްއެންޑީއެފްގައި ވަޒީފާ އަދާކުރާ މީހެއް ކަމަށް އިތުބާރު ހުރި ފަރާތަކުން މައުލޫމާތުދެ އެވެ.
އެމީހުން ދިރިއުޅެމުން ދިޔަ ދެ ގެ ބަލާ ފާސްކޮށް ގިނަ އަދަދެއްގެ ބަނގުރާ ހޯދާފައިވެ އެވެ.
ދެ މީހުން ހައްޔަރުކޮށް ބަނގުރާފުޅިތައް ފޮށިގަނޑުތަކުގައި ބަންދުކޮށް ފުލުހުންގެ ބެލުމުގެ ދަށަށް ގެންދަނީ-- ފޮޓޯ: މުހައްމަދު ޝާބިން / އަދަދު
އެ އޮޕަރޭޝަންގައި އަތުލައިގަތް ބަނގުރާ ފުޅިތަކުގެ އަދަދު ނޭނގުނު ނަމަވެސް 11 ފޮށިގަނޑާއި ދަބަހެއް ފުލުހުންގެ ބެލުމުގެ ދަށަށް އެ މީހުންނާއެކު ގެންގޮސްފައި ވެއެވެ.
