ހުއްދަ ދީފި ނަމަ މާލެއިން އައްޑޫއަށް ކުޑަ އަގެއްގައި ދަތުރުތައް ފަށަން ސްރީލަންކަން އެއާލައިންސް އިން ތައްޔާރު ކަމަށް އެ އެއާލައިންގެ ރާއްޖޭގެ އޮޕަރޭޓަރު އޭސް އޭވިއޭޝަން މޯލްޑިވްސްގެ މެނޭޖިން ޑިރެކްޓަރު މުހައްމަދު ފިރާގު މިއަދު ވިދާޅުވެއްޖެ އެވެ.
މާލެ އާއި އައްޑޫއާ ދެމެދު ދަތުރުތައް ފަށަން ސްރީލަންކަން އިން ޝައުގުވެރިކަން މި ފާޅުކުރީ، ރާއްޖެ އަންނަ ޓޫރިސްޓުންގެ އަދަދުތައް އިތުރުވެ އެތެރޭގެ އުދުހުންތަކަށް ބާރުބޮޑު ދުވަސްވަރެއްގަ އެވެ.
އެގޮތުން އެތެރޭގެ އުދުހުންތަކުގައި ހަރަކާތްތެރިވާ ތިން އެއާލައިންގެ ތެރޭގައި ހިމެނޭ ގައުމީ އެއާލައިން މޯލްޑިވިއަން އާއި ވިލާ އެއާގެ އިތުރުން މަންޓާ އެއާގެ ގިނަ ފްލައިޓުތައް އަޅަނީ ފުލްކޮށެވެ. މި ޑިމާންޑު ނުކަތައިގެން މޯލްޑިވިއަނުން އަންނަނީ ވިލާ އާއި މަންޓާގެ ފްލައިޓުތައް ޗާޓަރުކޮށްގެން ވެސް ދަތުރު ކުރަމުންނެވެ.
ސްރީލަންކަން އިން މާލެ-އައްޑޫ ދަތުރުތައް ފެށުމާ ގުޅިގެން ފިރާގު "އަދަދު"އަށް ވިދާޅުވި ގޮތުގައި މިއީ ގަމުން ކުރާ ދަތުރުތަކަށް ދިމާވެފައިވާ ފަސިންޖަރުންގެ ޓްރެފިކް މައްސަލަ ހައްލުކުރުމަށާއި އެތެރޭގެ އުދުހުންތަކަށް އައިސްފައިވާ ތާށިކަމުގައި ޓޫރިޒަމް ސިނާއަތަށް އެހީތެރިވެދިނުމަށް ކުރާ ކަމެކެވެ.
"އެތެރޭގެ އުދުހުންތަކަށް ވަރަށް ތާށި ބޮޑު ދުވަސްވަރެއް މިއީ. ވަރަށް ބައިވަރު މީހުންނަށް ދަތުރުކުރުމުގައި ދަތިތައް އެބައުޅޭ. އަޅުގަނޑުމެން ރެޑީ މިހާރު ވެސް ދަތުރުތައް ފަށަން" ފިރާގު ވިދާޅުވި އެވެ.
ގަމުން އަޅާ ފްލައިޓުތަކަށް ބޭނުންވާ ވަރަށް ފަސިންޖަރުން ނުލިބޭތީ މި ދަތުރުތައް ފަށަން މީގެ ކުރިން ވެސް ސްރީލަންކަން އިން ހުއްދައަށް އެދުނު ނަމަވެސް އެއްވެސް ފަހަރެއްގައި ހުއްދައެއް ނުދެ އެވެ.
ސްރީލަންކަން އިން ގަމާއި ކޮލޮމްބޯއާ ދެމެދު ޝެޑިއުލް ދަތުރުތައް ޑިސެމްބަރު 1، 2016 ގައި ފެށުމަށް ފަހު މިދިޔަ އަހަރު ހުއްޓާލީވެސް ފަސިންޖަރުން ނުލިބި، ބޮޑެތު ގެއްލުންތަކެއް ވަމުންދާތީ އެވެ.
އެކަމަކު އެ އަހަރު ނިމެން އުޅެނިކޮށް އަލުން ޝެޑިއުލް ދަތުރުތައް ފެށި އެވެ. މިވަގުތު ގަން އިންޓަނޭޝަނަލް އެއާޕޯޓަށް ޝެޑިއުލް ދަތުރުތައް އަޅާ ހަމައެކަނި އެއާލައިނަކީ ސްރީލަންކަން އެވެ.
އައްޑޫ-މާލެ ދަތުރުތަކަށް ހުއްދަ ލިބިއްޖެ ނަމަ ސްރީލަންކަންގެ ވިސްނުމަކީ ކޮލޮމްބޯ-މާލެ-އައްޑޫ ރޫޓުން ރައުންޑް ފްލައިޓްތަކެއް އަޅާށެވެ. މިގޮތުން ދަތުރުކުރާ ފްލައިޓުތައް ބައެއް ފަހަރު ސީދާ ގަމުން ކޮލޮމްބޯއަށް އަދި އަނެއް ބައި ފްލައިޓުތައް މާލެ އައިސް ފަސިންޖަރުން ނަގައިގެން ކޮލޮމްބޯއަށެވެ.
ފިރާގު ވިދާޅުވި ގޮތުގައި މިގޮތަށް ދަތުރުތައް ފެށުމުން ގަމުން ބޭނުންވާ އަދަދަށް ފަސިންޖަރުން ނުލިބޭ މައްސަލައަށް ހައްލެއް ލިބި، އެތެރޭގެ އުދުހުންތަކަށް ވެސް ލުޔެއް ލިބިގެން ދާނެ އެވެ. އޭގެ އިތުރުން ގަމުން އަޅާ ފްލައިޓުތައް އިތުރުކުރެވޭނެ ކަމަށް އޭނާ ވިދާޅުވި އެވެ.
"ޓްރެފިކް ލިބޭނަމަ ސާކަލް ފްލައިޓް ޔޫޓިލައިޒްކޮށްގެން ގިނަ ފްލައިޓް އެޅޭނެ. ޓްރެފިކް އޮންނަ ގޮތުން ދުވާލަކު އެއް ފްލައިޓް ވެސް އެޅިދާނެ" ފިރާގު ވިދާޅުވި އެވެ.
މިހާރު ސްރީލަންކަން އިން ގަމަށް ބާއްވަނީ ހަފުތާއަކު ފްލައިޓެކެވެ.
