ކޮމާޝަލް ބޭންކް އޮފް މޯލްޑިވްސް (ސީބީއެމް) އަށް ދައްކަންޖެހި ނުދައްކާ ހުރި ފައިސާ ހޯދުމަށްޓަކައި މާލޭގެ ދެ ގެއެއް ވިއްކާލަން އެ ބޭންކުން އިއުލާނުކޮށްފި އެވެ.
ނީލަމުގައި ވިއްކަން އިއުލާނުކޮށްފައި ވަނީ މ. ދޮރަގަލި 2 އަދި މ. ދޮރަގަލި 3 ގެ ބިމާއި އެ ބިމުގައި އިމާރާތްކޮށްފައިވާ ދެ ބުރީގެ ދެ އިމާރާތެވެ.
ކޮންމެ ބިމެއްގެ ސައިޒަކީ 190.65 އަކަފޫޓު ކަމަށްވާއިރު، މި ބިންތަކުގެ ބީލަން ފެށެނީ ހަތަރު މިލިއަން ރުފިޔާއިންނެވެ. މި ބިޑުގައި ބައިވެރިވުމަށް 1,000ރ. އަނބުރާ ނުލިބޭ ޑޮކިއުމަންޓް ފީއެއް ދައްކަންޖެހެ އެވެ. ބިޑާގުޅޭ ލިޔުންތައް ލިބޭނީ ހ. ފިލިގަސްދޮށުގޭގައި ހުންނަ ސީބީއެމްގެ 2 ވަނަ ފަންގިފިލާއިންނެވެ.
ބިޑް ހުށަހަޅާ ފަރާތްތަކުން 25,000 ރ.ގެ ބިޑް ސެކިއުރިޓީއެއް ހުށަހަޅަންޖެހޭއިރު، ބިޑްތައް ހުށަހެޅުމުގެ ސުންގަޑިއަކީ މި މަހުގެ 14 ވަނަ ދުވަހުގެ 2:00 އެވެ. ބިޑުތައް ހުޅުވާނީ އެވަގުތު ކޮމާޝަލް ބޭންކުގެ 2 ވަނަ ފަންގިފިލާގައި ބިޑް ހުށަހެޅި ފަރާތްތަކުގެ ހާޒިރުގަ އެވެ.
މިއީ ދަރަނި ނެގި ފަރާތަށާއި ރަހުނުކުރި ފަރާތަށް ދެވޭ ރަސްމީ ގާނޫނީ ނޯޓިހެއް ކަމަށާއި، ބިޑް ސުންގަޑީގެ ކުރިން ދަރަނި އެއްކޮށް ދައްކައި ހަލާސް ނުކޮށްފިނަމަ މުދާ ވިއްކާލުމުގެ މަސައްކަތް ކުރިއަށްދާނެ ކަމަށް ސީބީއެމްއިން ބުނެފައިވެ އެވެ.
