މަޔާމީ (ޑިސެމްބަރު 19) - މި އަހަރުގެ ކުރީކޮޅު ހިނގި އެކްސިޑެންޓްގައި ލިބުނު ބޮޑެތި އަނިޔާތަކުން ރިކަވާވުމަށް ފަހު، ގޮލްފްގެ ލެޖެންޑް ޓައިގާ ވުޑްސް ފުރަތަމަ ފަހަރަށް ވާދަވެރި މުބާރާތެއްގައި އިއްޔެ ބައިވެރިވެއްޖެ އެވެ.
މި އަހަރުގެ ފެބްރުއަރީ މަހު ހިނގި ކާރު އެކްސިޑެންޓެއްގައި ބޮޑެތި އަނިޔާތަކެއް ލިބުނު ވުޑްސް ވަނީ އޭނާގެ ދަރިފުޅު ޗާލީ ވުޑްސްއާ އެކު ޕީއެންސީ ޗެމްޕިއަންޝިޕްގައި އިއްޔެ ވާދަކޮށްފަ އެވެ. ޕީއެންސީ ޗެމްޕިއަންޝިޕަކީ ގޮލްފްގެ ޗެމްޕިއަނުން އެމީހުންގެ މައިންބަފައިން ނުވަތަ ދަރިންނާއެކު ވާދަކުރާ މުބާރާތެކެވެ.
ގޮލްފްގެ މޭޖާ 15 މުބާރާތް ކާމިޔާބުކޮށްފައިވާ ވުޑްސް ބުނީ ވާދަވެރި މުބާރާތްތަކަށް އެނބުރި އާދެވުމަކީ އޭނާ އަށް ލިބުނު ވަރަށް ބޮޑު އުފަލެއް ކަމަށެވެ.
"މި މުބާރާތުގައި ކުޅުމަކީ އަހަންނާއި ޗާލީ އަށް ލިބުނު ބޮޑު ހިތްހަމަޖެހުމެއް،" ވުޑްސް ،45، ބުންޏެވެ.
އެކަމަކު ވުޑްސް ބުނީ ގޮލްފްގެ މުބާރާތެއްގައި އޭނާ ވާދަކުރި ނަމަވެސް، ޕީ.ޖީ.އޭ ޓުއާ ފެންވަރުގެ މުބާރާތްތަކުގައި ވާދަކުރެވޭ ވަރަށް އޭނާ އަދި ފިޓުނުވާ ކަމަށެވެ.
"އަދި އެ (ޕީޖީއޭ މުބާރާތްތަކުގައި ކުޅުމުގެ) ފެންވަރެއް ނެތް. ގޮލްފްގައި ވާދަކުރަން ބޭނުންވާ ބުންވަރެއް މިހާރު ނެތް. ޖަހަން ބޭނުންވާ ގޮތަށް ޝޮޓުތައް ނުޖެހުމަކީ ވެސް ވަރަށް ބޮޑު ނުތަނަވަސްކަމެއް. އަހަރެން ބޭނުން އަލުން ޓުއާ ލެވެލްގެ މުބާރާތްތަކުގައި ކުޅެން. ފިޓުވާން ވަގުތު ބޭނުންވާނެ،" ވުޑްސް ބުންޏެވެ.
"މި އަހަރު މި ދިމާވި ކަންތައްތަކާ ގުޅިގެން އަހަންނަށް ޕްރެކްޓިސްނުކުރެވޭ. ހަގީގަތުގައި އަހަރެން މިހުރީ އަދި ކުޅޭވޭ ހާލަތެއްގައި ނޫން. އަދި ހާއްސަކޮށް މުބާރާތް ކުޅެވޭ ހާލަތެއްގައެއް ނޫން. މުޅިން ފިޓުވާން ވަގުތު ނަގާނެކަން ގަބޫލްކުރަންޖެހޭނެ."
ޕީއެންސީ މުބާރާތް ނިމޭނީ އާދިއްތަ ދުވަހު އެވެ. -- ބީބީސީ
