މެންޗެސްޓާ (އޮކްޓޫބަރު 22) - މެންޗެސްޓާ ޔުނައިޓެޑްގެ ކޯޗުގެ މަގާމުގައި ހުރި މައިކަލް ކެރިކް އަށް އެ ޓީމުގެ ކުޅުންތެރިންނާއި މެނޭޖްމަންޓްގެ އިތުބާރު ގެއްލެމުންދާއިރު، އާ ކޯޗެއް ހޯދަން ޔުނައިޓެޑުން ކުރާ މަސައްކަތުގައި ޖަރުމަނުގެ ކޯޗު، ހޫލިއަން ނާގަލްސްމަންގެ ނަން ޝޯޓްލިސްޓުކޮށްފި އެވެ.
މިދިޔަ ސީޒަނުގައި، ޕޯޗުގީސް ކޯޗު، ރުބެން އަމޮރިމް ވަކިކޮށް، ފުރަތަަމަ ވަގުތީ އެއްބަސްވުމެއްގައި ގެނައި، ކެރިކްގެ މަސައްކަތް ރަަނގަޅުވުމުން، ޔުނައިޓެޑުން އޭނާ އަށް ދެ އަހަރުގެ ކޮންޓްރެކްޓެއް ދިނެވެ. އެކަމަކު، މި ސީޒަނުގެ މިހާތަނަށް މި ސީޒަނުގެ ހުރިހާ މުބާރާތެއްގައި ޔުނައިޓެޑުން ކުުޅުނު 11 މެޗުގެ ތެރެއިން ފަސް މެޗުން ބަލިވިއިރު، މޮޅުވީ ދެ މެޗުންނެވެ. އަނެއް ހަތަރު މެޗުން ވަނީ އެއްވަރުވެފަ އެވެ.
ޔުނައިޓެޑުން މި ސީޒަނުގައި މޮޅުވީ، ޕްރިމިއާ ލީގުގައި އިޕްސްވިޗް ޓައުން އަތުންނާއި ޗެމްޕިއަންސް ލީގުގައި ސަބާ އަތުންނެވެ. ދެ މެޗު ވެސް ކުޅުނީ ޔުނައިޓެޑް ދަނޑުގަ އެވެ. ޔުނައިޓެޑުން އިނގިރޭސި ޕްރިމިއާ ލީގުގައި މިދިޔަ 40 އަހަރު ތެރޭ އެންމެ ދަށްކޮށް ފެށީ މި ސީޒަނުގަ އެވެ. ރޭ ކުޅުނު މެޗުގައި، ޗެމްޕިއަންސް ލީގުގައި ޔުނައިޓެޑް ވަނީ އިޓަލީގެ ކޯމޯ އަތުން 4-1 އިން ބަލިވެފަ އެވެ.
އެ މެޗަށް ފަހު، ޔުނައިޓެޑްގެ ކެޕްޓަން، ބްރޫނޯ ފެނާންޑޭސް ވަނީ އިންޓަވިއުއެއްގައި ޔުނަައިޓެޑްގެ ކޯޗު ކެރިކް، އެ ޓީމު ލައްވައި އެ މެޗުގައި ކުޅުވި ގޮތާ މެދު ހިތްހަމަނުޖެހުންތައް ހިއްސާކޮށްފަ އެވެ. އަދި، ފެނާންޑޭސްގެ އެ ވާހަކަތަކާ ގުޅޭގޮތުން، ކެރިކަށް ނޫސްވެރިންގެ ބައްދަލުވުމުގައި ސުވާލު އަމާޒުވުމުން، އޭނާ ބުނީ، ޓީމެއްގެ ގޮތުގައި މަސައްކަތް ކުރަން ޖެހޭ ހާލަތުގައި އެކަން ނުކުރެވޭނަަމަ، ކޮންމެ ސިސްޓަމަކަށް ކުޅުނު ކަމުގައި ވިޔަސް ނަތީޖާ ނެރެން އުނދަގޫވާނެ ކަމަށެވެ.
ހޮފެންހައިމް، ބަޔާން މިއުނިކް އަދި އާރްބީ ލައިޕްޒިގުގެ ކޯޗަކަށް ކުރިން ހުރި ނާގަލްސްމަން، އެންމެ ފަހުން ކޯޗަކަށް ހުރީ ޖަރުމަނު ގައުމީ ޓީމުގަ އެވެ. އޭނާ އަށް ޖަރުމަނު ކޯޗުކަން ގެއްލުނީ މި ފަހަރުގެ ވޯލްޑް ކަޕްގެ ނަތީޖާ ދަށްވުމުންނެވެ.
ކެރިކާ މެދު ކުރިއަށް އޮތް ހަފްތާތަކުގެ ތެރޭގައި، މެންޗެސްޓާ ޔުނައިޓެޑުގެ ސީނިއާ މެނޭޖްމަންޓުން ގޮތެއް ނިންމާނީ ކުރިއަށް ހުރި މެޗުތަކުގައި ނެރޭ ނަތީޖާ އަށް ބަލާފައި ކަމަށް ރިޕޯޓްތައް ބުނެ އެވެ.
ނާގަލްސްމަންގެ އިތުރުން، ދެން ޔުނައިޓެޑުން އެ ޓީމުގެ ކޯޗުކަން ދޭން މަޝްވަރާކުރާނެ ކޯޗުންގެ ލިސްޓުގައި މި ވަގުުތަށް ބަލާއިރު، ހިމެނެނީ ދެ ނަމެކެވެ. އެއީ، ނިއުކާސަލް ޔުނައިޓެޑާއި ބޯންމައުތުން ކުރިން ފެނުނު އެޑީ ހޯވް އާއި ޗެލްސީ، ޓޮޓެންހަމް ހޮޓްސްޕާސް އަދި އިޓަލީގެ ގިނަ ކްލަބްތަކުން ފެނިގެންދިޔަ އެންޓޯނިއޯ ކޮންޓޭ އެވެ.
