މިއުނިކް (އޮކްޓޫބަރު 22) - ޔުއެފާ ޗެމްޕިއަންސް ލީގުގައި ރޭ އާސެނަލާއި ބަޔާން މިއުނިކް 2-2 އިން އެއްވަރުވިއިރު، ރެއާލް މެޑްރިޑުން ކުޅުނު މެޗުގައި މޮޅުވެ، އިޓަލީގެ ކޯމޯ އިން މެންޗެސްޓާ ޔުނައިޓެޑް ބަލިކޮށްފި އެވެ.
ޖަރުމަނުގެ އާރްބީ ލައިޕްޒިގު އަތުން ރެއާލް މެޑްރިޑް މޮޅުވީ 4-1 އިންނެވެ. އަދި، ސެސްކް ފަބްރެގަސްގެ ކޯޗުކަމުގައި ޗެމްޕިއަންސް ލީގުގައި މުޅިން އަލަށް ކުޅެމުން އަންނަ ކޯމޯ އިން ވަނީ ޔުނައިޓެޑް އަތުން 4-1 އިން މޮޅުވެފަ އެވެ.
ރޭ އާސެނަލުން މެޗު ފަށައިގެން ކުރިމަތިލާން ޖެހުނީ ބުކާޔޯ ސަކާގެ އަނިޔާއާ އެވެ. އާސެނަލުން ވަނީ ސަކާގެ ބަދަލުގައި އެބެރޭޗީ އެޒޭ ކުޅެން އަރުވައިފަ އެވެ. އާސެނަލުން ލީޑުނެގީ އެޒޭ ޖެހި ގޯލުންނެވެ. ފުރަތަމަ ހާފު ނިމުމުގެ ކުރިން އަލްފަންސޯ ޑޭވިސް ވަނީ ބަޔާނަށް އެއްވަރުކޮށްދީފަ އެވެ.
ދެ ވަނަ ހާފުގައި ބަޔާނުން ލީޑުނެގީ، ހެރީ ކޭން ޖެހި ޕެނަލްޓީންެނެވެ. މި ޕެނަލްޓީ ދޭން ނިންމީ، ކޭންގެ ޝޮޓެއް، އާސެނަލްގެ އޭރިއާތެރެއިން އެ ޓީމުގެ ޖުރިއަން ޓިމްބާ އަތުގައި ޖެހުމުންނެވެ. ބަޔާނުން މޮޅުވާން ދަނިކޮށް، އާސެނަލަށް އެއްވަރުކޮށްދިނީ މެޗުގެ 82 ވަނަ މިނިޓްގައި ވިކްޓަ ޔޯކެރޭޝް ދިން ބޯޅައަކުން ޑެކްލަން ރައިސް އެވެ.
ރެއާލުން ރޭގެ މެޗުގެ ފުރަތަމަ ހާފުގައި ބެނާޑޯ ސިލްވާގެ ލަނޑުން ލީޑުނެގިއިރު، ދެ ވަނަ ހާފުގެ ކުޅުން ފެށިގެން ހަތް މިނިޓް ތެރޭ އާޑާ ގުލާ ވައްދާލި ގޯލުން ލީޑުފުޅާކުރި އެވެ. ކީލިއަން އެމްބާޕޭ، ރެއާލްގެ ތިން ވަނަ ލަނޑު ޖަހާފައި ވަނިކޮށް، ޓިޑިއާމް ގޯމީސް ވަނީ ލައިޕްޒިގަށް ލަނޑެއް ޖަހައިދީފަ އެވެ. އެކަމަކު، ލައިޕްޒިގު ދޫކޮށް މި ފަހަރު ރެއާލާ ގުޅުނު ޔަން ޑިއޮމަންޑޭ ވަނީ ރެއާލަށް ހަތަރު ވަނަ ގޯލެއް ޖަހައިދީފަ އެވެ.
ކޯމޯ އިން ރޭ ޔުނައިޓެޑް ކައިރީގައި މެޗު ޑޮމިނޭޓްކޮށްގެން ކުޅެ، ނަތީޖާ ނެރުނެވެ. މި މެޗުގައި ކޯމޯ އަށް ކުޅޭ އާޖެންޓީނާގެ ތަރި ނިކޯ ޕަޒް ވަނީ ދެ ލަނޑު ޖަހައިފަ އެވެ، އަނެއް ލަނޑުތައް ޖެހީ، ޓަސޯސް ޑުވިކާސް އަދި ޖޭކަބް ރަމޯން އެވެ. މި މެޗުގައި ޔުނައިޓެޑްގެ ހަމައެކަނި ލަނޑު، މެޗުގެ އިތުރު ވަގުތުގައި ޖެހީ ޖޯޝުއާ ޒާކްޒީ އެވެ. ޒާކްޒީ ކުޅެން އެރީ ދެ ވަނަ ހާފުގައި ބްރޫނޯ ފެނާންޑޭސްގެ ބަދަލުގަ އެވެ.
ޗެމްޕިއަންސް ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، އެއް ކުުޅުންތެރިއަކު މަދުކޮށް މެޗު ނިންމާލި އިންޓަ މިލާނުން ވަނީ 1-0 އިން ޝަހުތަރު ޑޮނެސްކް ބަލިކޮށްފަ އެވެ. އިސްކޯގެ ޕެނަލްޓީން ރެއާލް ބެޓިސް އިން ވަނީ 1-0 އިން ފެޔަނޫޑް ބަލިކޮށްފަ އެވެ. އޮސްޓްރިއާގެ ލާސްކުން ވަނީ 3-2 އިން ސްޕޯޓިން ލިޒްބަން ބަލިކޮށް ޗެމްޕިއަންސް ލީގުގަައި ފުރަތަމަ މޮޅު ހޯދައިފަ އެވެ. އަދި، ލިލް އަތުން ގަލަތަސަރާއި ވަނީ 4-2 އިން މޮޅުވެފަ އެވެ.
