ޕެރިސް (ޑިސެމްބަރު 18) - ޕެރިހުގައި ރޭ ބޭއްވި ފޯމިއުލާ ވަންގެ ސީޒަން ނިމުމުގެ އެވޯޑް ހަފްލާގައި މަޝްހޫރު ރޭސަރު، ލެވިސް ހެމިލްޓަން ބައިވެރިނުވި މައްސަލައިގައި އޭނާ އަށް އަދަބު ދިނުމުގެ ފުރުސަތު ބޮޑުވެއްޖެ އެވެ.
ހެމިލްޓަން ހިތްހަމަ ނުޖެހިފައި ހުރީ މިދިޔަ ހަފްތާގައި އަބޫ ދާބީގައި ކުރިއަށްދިޔަ ފޯމިއުލާ ވަން ސީޒަނުގެ ފަހު ރޭހުގެ ވަގުތު ހިނގާދިޔަ ކަންތައްތަކުގެ ސަބަބުންނެވެ. ރޭހުގައި އެންމެ ފަހު ވަގުތާ ޖެހެންދެން ބެލެވުނީ ކުރިހޯދާނީ ހެމިލްޓަން ކަމަށެވެ. އެކަމަކު، ނިކޯލަސް ލަފީޓީ ރޭހުގައި ދުއްވި ކާރު ޖެހި، އޭނާ ހެދި ގޯހެއްގެ ފައިދާނަގައި ނެދަލެންޑްސްގެ މެކްސް ވާސްޓެޕަން ވަނީ ފަހު ލެޕްގައި ކުރިއަށް ޖެހިލައި ލީޑެއް ނަގައި، ރޭސް ކާމިޔާބުކޮށްފަ އެވެ.
ހެމިލްޓަން އާއި އޭނާގެ މަރްސެޑީސް ޓީމުން ވަނީ ވާސްޓެޕަން އަށް ރޭސް ކާމިޔާބު ކުރެވުނީ ގަވާއިދާ ހިލާފަށް ކަންތައްތަކެއް ކޮށްގެން ކަމަށް ތަކުރާރުކޮށް ބުނެފަ އެވެ. އަދި އެ މައްސަލަ އެޕީލް ވެސް ކުރި އެވެ. އެކަމަކު، ރޭހުގެ އޮފިޝަލުން ނިންމީ އުސޫލާ ހިލާފު މައްސަލައެއް ނެތް ކަމަށެވެ. އެކަމާ މެދު ފަހުން ވެސް ހެމިލްޓަން އާއި މަރްސެޑީސް ޓީމުން ވަނީ ހިތްހަމަނުޖެހުން ފާޅުކޮށްފަ އެވެ.
މިދިޔަ ބުދަ ދުވަހު ހެމިލްޓަން އަށް އިނގިރޭސި ނައިޓްހުޑްގެ ރަސްމީކޮށް ހަވާލުކުރިއިރު، އޭނާ ރޭ ޕެރިހުގައި އޮތް ފޯމިއުލާ ވަން ހަފްލާ އަށް ނުދިޔަ ސަބަބެއް ރަސްމީކޮށް ހާމައެއް ނުކުރެ އެވެ.
ފޯމިއުލާ ވަން ގަވާއިދުގައިވާ ގޮތުން ސީޒަނުގެ ގަދަ ތިން ރޭސަރުން އެވޯޑް ހަފްލާގައި ބައިވެރިވުން ލާޒިމްވާނެ އެވެ.
"މީހުންނަށް ރަނގަޅުވުމަކީ ވަރަށް ފަސޭހަ ކަމެއް، އެހާ ބޮޑު އަގެއް ދައްކަން ޖެހޭ ކަމެއް ވެސް ނޫން. އެކަމަކު، އުސޫލަކާ ހިލާފަށް ކަމެއް ކޮށްފިނަަމަ، އެކަން އޮންނަ ގޮތަކަށް އަމަލުކުރަން ޖެހޭނެ. ވަކި ގޮތަކަށް އުސޫލު އޮއްވައި މާފެއް ނުދެވޭނެ،" ހެމިލްޓަން އަށް އަދަބު ދޭނަންތޯ ފޯމިއުލާ ވަން ފެޑެރޭޝަނުގެ ހެޑް މުހައްމަދު ބެން ސުލޭޔަމް ގާތުގައި ނޫސްވެރިއަކު ކުރި ސުވާލަކަށް އޭނާ ޖަވާބު ދެއްވި އެވެ.
ސުލޭޔަމް ވިދާޅުވީ ހެމިލްޓަންއާ މެދު ގޮތެއް ނިންމަން ޖެހޭނީ އޭނާ އަށް ޖަވާބުދާރީވާން ފުރުސަތު ދިނުމަށް ފަހު ކަމަށާއި ދެފުށް ފެންނަ ނިޒާމެއްގެ ތެރެއިން މީގެ ގޮތެއް ނިންމާނެ ކަމަށެެވެ.
