އަބޫ ދާބީ، ޔޫއޭއީ (ޑިސެމްބަރު 13) - ފޯމިއުލާ ވަން ރޭހުގެ ފަހު ވަގުތު ދެއްކި ހިތްވަރާ އެކު ނެދަލެންޑްސްގެ ރެޑްބުލް ރޭސަރު މެކްސް ވާސްޓެޕަން ސީޒަނުގެ ޗެމްޕިއަންކަން ހޯދައި ދުނިޔޭގެ ޓްރޮފީ އުފުލާލައިފި އެވެ.
މިއަދުގެ ރޭހަށް ނުކުތްއިރު، ހަތް ފަހަރު ދުނިޔޭގެ ތަށި އުފުލާލާފައިވާ މެރްސެޑީސްގެ ލުވިސް ހެމިލްޓަން އާއި ރެޑްބުލްގެ ވާސްޓެޕަން އޮތީ ޕޮއިންޓުގެ ގޮތުން އެއްވަރުވެފަ އެވެ.
މިއަދުގެ ރޭހުގައި އެންމެ ފަހު ވަގުތާ ޖެހެންދެން ބެލެވުނީ ކުރިހޯދާނީ ހެމިލްޓަން ކަމަށެވެ. އެކަމަކު، ނިކޯލަސް ލަފީޓީ ރޭހުގައި ދުއްވި ކާރު ތަނެއްގައި ޖެހި އޭނާ ހެދި ގޯހެއްގެ ފައިދާނަގައި ވާސްޓެޕަން ވަނީ ފަހު ލެޕްގައި ކުރިއަށް ޖެހިލައި ލީޑެއް ނަގައިފަ އެވެ. އަދި ރަނގަޅު ޓްރެކުގައި ރޭސް ނިންމައި އުމުރުން 24 އަހަރުގެ ނެދަލެންޑްސް އަށް އުފަން ވާސްޓެޕަން ވަނީ ދުނިޔޭގެ ޗެމްޕިއަންކަން ހޯދައިފަ އެވެ.
ވާސްޓެޕަން ކާމިޔާބު ހޯދުމުން ހެމިލްޓަންގެ މަރްސެޑީސް ޓީމުން ވަނީ ނަތީޖާއާ މެދު ނުރުހުން ފާޅުކޮށް އެޕީލްކޮށްފަ އެވެ. ގިނަ ވަގުތުތަކެއް ވަންދެން ބެލުމަށް ފަހު ނިންމީ އުސޫލުތަކާ ހިލާފަށް ވާސްޓެޕަން ކަމެއް ކޮށްފައިނުވާތީ ނަތީޖާ ދަމަހައްޓާށެވެ. ފަހު ލެޕާ ހަމައަށް އައިއިރު، ވާސްޓެޕަން އަށް އާ ޓައިރެއް އަޅުވައިގެން ހުރެ ރޭސް ނިންމަން ލިބުމަކީ އެޑްވާންޓޭޖެއްގެ ގޮތުގައި ހެމިލްޓަންގެ މަރްސެޑީސް ޓީމުން ކުރި އެޕީލް ކާމިޔާބުނުވިއިރު، ވާސްޓެޕަން ވަނީ ތަށްޓާ އެކު ވަރަށް ބޮޑަށް އުފާފާޅުކޮށްފަ އެެވެ.
"މިއީ ގަބޫލުކުރަން ވެސް ދަތި ކާމިޔާބެއް. އަހަރެން ހަމައެކަނި އުއްމީދުކުރީ ފޯމިއުލާ ވަން ޑްރައިވަރަކަށްވާން. އެ ހިސާބުން މި ފަދަ ޕޯޑިއަމްތަކުގައި ހުއްޓިގެން ހުރެ ކާމިޔާބީގެ ވާހަކަ ދައްކާލަން ބޭނުންވި. އެކަމަކު، އަހަންނަކީ ދުނިޔޭގެ ޗެމްޕިއަންކަމަށް ބަލައި އެ ގޮތަށް މުހާތަބުކުރަން ފެށުމުން ކުރެވެނީ އާދަޔާހިލާފު އިހުސާސެއް،" ވާސްޓެޕަން ބުންޏެވެ.
މުޅި ރޭހަށް ބަލާއިރު، ދެ ފަހަރެއްގެ މަތިން މަރްސެޑީސް ޓީމުން ވަނީ ވާސްޓެޕަންއާ ދެކޮޅަށް މައްސަލަ ހުށަހަޅައިފަ އެވެ. އެކަމަކު، ދެ ފަހަރު ވެސް އޮފިޝަލުން ވަނީ އެ އެޕީލްތައް އަނބުރާ ފޮނުވާލައިފަ އެވެ.
