މާލޭ މަގުމަތިން ދުއްވާފައި ދިޔަ ކާރެއް ހުއްޓުވައި ގިނަ އަދަދެއްގެ މަސްތުވާތަކެތި ފުލުހުން އަތުލައިފި އެވެ.
ފުލުހުން ބުނީ މާލޭގައި މަސްތުވާތަކެއްޗާ ދެކޮޅަށް ހާއްސަ އޮޕަރޭޝަނެއް ރޭ ކުރިއަށް ގެން ގޮސްފައިވާ ކަމަށެވެ. އެ އޮޕަރޭޝަންގައި ވެހިކަލްތައް ވެސް ބަލާ ފާސްކޮށްފައިވާ ކަމަށެވެ.
މިގޮތުން، ގިނަ އަދަދެއްގެ މަސްތުވާތަކެތި އަތުލައިގަނެފައިވަނީ މާލޭގެ ބުރުޒުމަގު ޔެލޯ ބްރީޒް ފިހާރަ ކައިރިން ދިޔަ ޓެކްސީއެއް ހުއްޓުވައި ބަލައި ފާސްކޮށްގެން ކަމަށް ފުލުހުން ބުންޏެވެ. ފުލުހުން އެ ޓެކްސީ ބަލައި ފާސް ކޮށްފައިވަނީ ރޭ 7:30 އެހާއިރު އެވެ.
އެ އޮޕަރޭޝަނާ ގުޅޭ ގޮތުން އިތުރު ތަފްސީލް ފަހުން ހާމަ ކުރާނެ ކަމަށް ވެސް ފުލުހުން ބުންޏެވެ.
ނަމަވެސް، "އަދަދު"އަށް އެނގިފައިވާ ގޮތުގައި ރޭ އަތުލައިގައިންފައިވަނީ 28 ޕެކެޓާއި ދަބަހެއް ކަމަށެވެ. އޭގެން ކޮންމެ ޕެކެޓެއްގައި އެއް ކިލޯ ހުންނާނެ ކަމަށް އޭނާ ވިދާޅުވި އެވެ.
ނަމަވެސް އެ ޓެކްސީން އަތުލައިގެންފައިވަނީ ވަނީ ކޮން ބާވަތެއްގެ މަސްތުވާތަކެއްޗެއް ކަމެއް ސާފެއް ނުވެ އެވެ.
މަސްތުވާތަކެއްޗާ ދެކޮޅަށް ފުލުހުން ހިންގާ އޮޕަރޭޝަންތައް މިފަހުން ވަރުގަދަކޮށްފައިވާއިރު، ލޯންޗަކާއި ޓެކްސީއެއް ބަލާފާސްކޮށް ބަނގުރާ ފުޅިތަކަކާއެކު ފަސް މީހަކު އިއްޔެ ވަނީ ހައްޔަރުކޮށްފަ އެވެ.
ފާއިތުވި ތިން އަހަރުގެ ތެރޭގައި 1000 ކިލޯއާ ގާތްކުރާ އަދަދެއްގެ މަސްތުވާތަކެތި ފުލުހުން ވަނީ އަތުލައިގަނެފަ އެވެ. އަދި އެ ތަކެއްޗާ ގުޅުން ހުރި، މަސްތުވާތަކެތި ވިއްކާ ނެޓްވޯކުތަކުގެ ވެރިންގެ ވެސް ވަނީ ހައްޔަރުކޮށްފަ އެވެ. ނަމަވެސް މިހާތަނަށް އެއްވެސް ވެރިއެއްގެ މައްޗަށް ކުށް ސާބިތުވެފައެއް ނެތެވެ.
ރާއްޖޭގައި މަސްތުވާތަކެތި ބޭނުން ކުރާ 7،496 މީހުން އުޅޭ ކަމަށް އެކުވެރި ދައުލަތްތަކުގެ ކުށްކުށާއި މަސްތުވާތަކެއްޗާ ބެހޭ އޮފީހުން 2011 ވަނަ އަހަރު ކުރިއަށްގެންދިޔަ ސާވޭއަކުން އޮތީ ހޯދާފަ އެވެ.
އަދި ރާއްޖޭގެ ޖަލުތަކުގައި ހުކުމް ތަންފީޒު ކުރަމުންދާ 2500 ވަރަކަށް މީހުން އުޅޭއިރު އޭގެ ތެރެއިން 80 ޕަސެންޓު މީހުންނަކީ މަސްތުވާތަކެއްޗާ ގުޅުންހުރި ކުށްތަކުގައި ޖަލަށްލާފައި ތިބި މީހުން ކަމަށް އެ ދިރާސާތަކުން ދައްކަ އެވެ.
