ތަހުގީގު ކުރަމުންދާ މައްސަލައަކާ ގުޅިގެން ކުރީގެ ރައީސް އަބްދުﷲ ޔާމީން އަބްދުއްގައްޔޫމް ރާއްޖޭން ފުރުން މަނާކުރަން އަމުރަކަށް ފުލުހުން އެދިއްޖެ އެވެ.
"އަދަދު"އަށް އެނގިފައިވާ ގޮތުގައި ޔާމީން ފުރުން މަނާކުރަން އަމުރަކަށް ފުލުހުން ކްރިމިނަލް ކޯޓުގައި އެދުނީ ސުޕްރީމް ކޯޓުން ގއ. ވޮޑަމުއްލާ މައްސަލައިގައި ޔާމީންގެ މައްޗަށް އިއްވާފައިވާ ޖަލު ހުކުމް މިއަދު ބާތިލުކޮށް އެމަނިކުފާނު މިނިވަންކުރުމާއެކުގަ އެވެ.
ކްރިމިނަލް ކޯޓުން އަމުރާމެދު އަދި ގޮތެއް ނުނިންމަ އެވެ. އަދި އެ އަމުރަށް އެދުނީ ތަހުގީގު ކުރަމުންދާ ކޮން މައްސަލައަކާ ގުޅިގެން ކަމެއް ވެސް އަދި ސާފެއް ނުވެ އެވެ.
ފުރުން މަނާކުރަން އަމުރަކަށް އެދުނު މައްސަލާގައި ފުލުހުން ވެސް އަދި ކްރިމިނަލް ކޯޓުން ވެސް ރަސްމީކޮށް އެއްޗެއް ނުބުންޏެވެ.
މީގެ ދެ އަހަރު ކުރިން ޔާމީންގެ މައްޗަށް އިއްވި ފަސް އަހަރުގެ ޖަލު ހުކުމް މިއަދު ބަތިލްކުރީ އެ ހުކުމް ނެރުމަށް ދަށު ކޯޓުން ހެކި ވަޒަންކުރި ގޮތާއި ކުށް ސާބިތުކުރި ގޮތް ގޯސް ކަމަށް ކަނޑައެޅުމަށްފަހު އެވެ. އެގޮތުން ޝައްކު އުފެދިފައި އޮތް އެއް މިލިއަން ޑޮލަރަކީ ދައުލަތަށް ލިބެން ޖެހޭ ފައިސާއެއް ކަމާމެދު ސުވާލު އުފެދިފައިވާ ކަމާއި އެހެންވެ, މަނީލޯންޑްރިންގެ ކުށް ޔާމީންގެ މައްޗަށް ސާބިތުނުވާ ކަމަށް ނިންމި އެވެ.
ނަމަވެސް, އެއް މިލިއަން ޑޮލަރުގެ ހަގީގަތް ނޭނގޭތީ, އެ ފައިސާގެ ހަގީގަތް ހޯދުމަށް ބަލާ ބެލުންތަކުން އެ ފައިސާއަކީ ދައުލަތަށް ލިބެންޖެހޭ ފައިސާއެއްނަމަ، އެ ފައިސާއާއި، އެ ފައިސާއިން އިންވެސްޓްކުރުމުގެ ސަބަބުން ފައިދާއެއް ލިބިފައިވާނަމަ، އެ ފައިދާއެއް ހިމެނޭނެހެން ހޯދުމުގެ ހައްގު ދައުލަތަށް ލިބޭ ކަމަށް ހުކުމްގައިވެ އެވެ.
ކުރިމިނަލް ކޯޓުގައި މިހާރު ވެސް ޔާމީންގެ ދެ މައްސަލައެއް އެބަ އޮތެވެ. އެއީ ރ. ފުއްގިރި އާއި ވ. އާރަށު މައްސަލާގައި އުފުލާފައިވާ މަނީލޯންޑްރިން އާއި ރިޝްވަތުގެ ދައުވާ އެވެ.
ވ. އާރަށް ވިއްކާލައިގެން ލިބުނު ފައިސާ ލޯންޑާކުރި ކަމަށް ތުހުމަތު ކުރެވޭ މައްސަލާގައި ޔާމީންގެ މައްޗަށް ދައުވާކުރީ މީގެ ހަ ދުވަސް ކުރިންނެވެ.
ފުލުހުން ވަނީ އާރަށުގެ މައްސަލައިގައި ރިސޯޓެއް ގޮތަށް ތަރައްގީ ކުރުމަށްޓަކައި އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ޔާމީންގެ ބޭންކު އެކައުންޓަކަށް ޖަމާކޮށްފައިވާ ކަމަށް ތުހުމަތުކުރެ އެވެ.
ޔާމީންގެ އިތުރުން މި މައްސަލާގައި ވ.ފެލިދޫ ހަނދުވަރީގެ ޔޫސުފް ނައީމްގެ މައްޗަށް ވެސް ވަނީ ދައުވާ އުފުލާފަ އެވެ. އޭނާގެ މައްޗަށް އުފުލީ ރިޝްވަތު ދިން ކަމުގެ ދައުވާ އެވެ.
