އެކި ކުށްތަކުގައި ހައްޔަރުކުރެވޭ ކުޑަކުދިން ބޭތިއްބުމަށް ހާއްސަކޮށްގެން ކ. ހިންމަފުށީގައި ތަރައްގީކުރާ ޖަލު، އަންނަ ޑިސެމްބަރު މަހުގެ ނިޔަަލަށް ނިމޭނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި އިމްރާން މިހެން ވިދާޅުވީ ހިންމަފުށީ އައްސޭރި ޖަލަކީ ކުޑަކުދިން ބައިތިއްބަން އެކަށީގެންވާ ތަނަކަށް ނުވާތީ, މަރުގެ މައްސަލަތަކެއްގެ ތުހުމަތުގައި ބަންދުގައި ތިބި ކުދިންތަކެއް ބަންދުން ވީއްލިފައިވާ ދަނޑިވަޅެއްގައެވެ.
ދޫވި ކުދިންތަކުގެ ތެރެއިން ޝަރީއަތް ނިމެންދެން ބަންދުގައި ހުރި އެއް ކުއްޖަކީ މާލޭގައި ރަހީނުކޮށް 13 އަހަރުގެ ފިރިހެން ކުއްޖަކު މަރާލައި މޫދަށް އެއްލާލާފައި އޮއްވާ ފެނުނު މައްސަލައިގައި ހައްޔަރުކުރި 17 އަހަރުގެ ކުއްޖާ އެވެ. އަނެއް ކުއްޖާއަކީ ގއ. މާމެންދޫގައި މާރާމާރީ ހިންގައި އެ ރަށު ލިލީ އޮފް ދަ ވެލީ، އަހްމަދު އުދައްޔު މަރާލި މައްސަލާގައި ހައްޔަރު ކުރި 17 އަހަރުގެ ކުއްޖާ އެވެ. ޖުވެނައިލް ކޯޓުގެ އަމުރުގައިވާ ގޮތުން, އެކުދިން ގޭ ބަންދަށް ދޫކޮށްލާފައި ވަނީ ޖަލުތަކުގެ ހާލަތު ގޯސްކަމަށް އެޗްއާރްސީއެމުން ކަނޑައެޅުމާ ގުޅިގެންނެވެ.
މި މައްސަލައާ ގުޅިގެން، މިމަހުގެ 17 ވަނަ ދުވަހުގެ ކުރިން އެ ކުދިންނަށް ހާއްސަ ޑިޓެންޝަން ސެންޓަރެއް ގާއިމްކޮށްދިނުމަށް އެދި ޕީޖީގެ ފަރާތުން ހޯމް މިނިސްޓްރީއަށް ނޮވެމްބަރު 11 ވަނަ ދުވަހު ސިޓީއެއް ފޮނުވާފައި ވެއެވެ. އެހެން ނަނަވެސް އެ މުއްދަތަށް އެ މަސައްކަތް ނިންމައެއް ނުލެވުނެވެ.
ނޫސްވެރިންގެ ބައްދަލުވުމުގައި އިމްރާން ވިދާޅުވީ ކ. ހިންމަފުށީގައި ކުޑަކުދިން ބަންދުކުރުމަށް ތަރައްގީ ކުރާ ޖަލުގެ މަސައްކަތް ގާތްގަނޑަކަށް ނިމިފައިވާ ކަމަށާއި، އެ ޖަލު ފަރުމާ ކުރެވިފައި ވަނީ ކުޑަކުދިންގެ ހައްގުތަކަށް އުނިކަމެއް ނާންނާނެ ފަދަ ގޮތަށް ކަމަށެވެ.
މިނިސްޓަރު ވިދާޅުވީ އެތަނުގައި 16 ކުދިން ބަންދުކުރުމުގެ ޖާގަ ހުންނާނެ ކަމަށެވެ. އަދި ކުޑަކުދިން ބަންދު ކުރުމުގެ ބަދަލުގައި އެކުދިންނަށް ހާއްސަ ޕްރޮގްރާމްތަކެއް ފަރުމާކުރުމަށް ސަރުކާރުން މަސައްކަތް ކުރަމުން ދާ ކަމަށް ވެސް ވިދާޅުވި އެވެ.
އެގޮތުން ދ. ކުޑަހުވަދޫގައި ކުށުގެ ވެށިން ފެންނަ ކުޑަކުދިން ރީހެބިލިޓޭޓް ކުރުމަށް ސެންޓަރެއް ގާއިމް ކުރުމުގެ މަސައްކަތް ކުރަމުންދާކަން އެމަނިކުފާނު ފާހަގަކުރެއްވި އެވެ. އަދި އެ މަޝްރޫގެ އަމަލީ މަސައްކަތް އަންނަ އަހަރު ފެށި، 2023 އަށް ނިންމާލެވޭނެ ކަމުގައި އަންދާޒާ ކުރެއްވި އެވެ.
މީގެ އިތުރުން އެކުދިނަށް ހާއްސަ ޕްރޮގްރާމެއް އެކުލަވާލުމަށް ހާއްސަ ކޮމިޓީއެއް އެކުލަވާލެވިފައިވާކަން ވެސް މިނިސްޓަރު ފާހަގަކުރެއްވި އެވެ.
