ސައޮ ޕޯލޯ (ނޮވެމްބަރު 14) - ސައޮ ޕޯލޯ ގްރޯން ޕްރީގެ ސްޕްރިންޓް ކޮލިފައިން މަރްސެޑީސްގެ ވަލްޓޭރީ ބޯޓާސް ކާމިޔާބުކުރިއިރު، މި ރޭހުގެ ކުރިން ޓެކްނިކަލް ގަވައިދާ ހިލާފުވެގެން އަދަބު ލިބުނު މަރްސެޑީސްގެ ލެވިސް ހެމިލްޓަން ރޭސް ނިންމީ ފަސް ވަނައިގަ އެވެ.
ހެމިލްޓަން އަށް އަދަބު ދިނީ އޭނާ ދުއްވާ ކާރުގެ މައްސަލައަކާ ގުޅިގެންނެވެ. ޓެކްނިކަލް ގަވައިދަކާ ހިލާފުވުމުން، ހެމިލްޓަން ވަނީ ސައޮ ޕޯލޯ ގްރޯން ޕްރީގެ ކޮލިފައިން ރޭހުން ޑިސްކޮލިފައިކޮށްފަ އެވެ. ކޮލިފައިން ނިންމި މަގާމާ އެކު، ހެމިލްޓަން އަށް ސްޕްރިންޓް ފެށުމަށް ލިބިފައި އޮތީ އެންމެ ކުރީ މަގާމެކެވެ. އެކަމަކު އަދަބާ އެކު، އޭނާ ސްޕްރިންޓް ފެށީ އެންމެ ފަހަތުންނެވެ. އެހެން ނަމަވެސް، ހެމިލްޓަން ވަނީ ފަސް ވަނައިގައި ސްޕްރިންޓް ނިންމައިފަ އެވެ.
ބޯޓާސް އެއްވަނައިގައި ސްޕްރިންޓް ނިންމުމުން، މިއަދު އޮންނަ ސައޮ ޕޯލޯ ގްރޯން ޕްރީ ރޭސް އޭނާ ފަށާނީ އެއްވަނަ މަގާމުގަ އެވެ. ސްޕްރިންޓްގެ ދެވަނަ ހޯދީ ރެޑްބުލްގެ މާކް ވެސްޓާޕެންނެވެ. ތިން ވަނަ އަށް ދިޔައީ ފެރާރީގެ ކާލޮސް ސައިންޒް އެވެ.
ހުއްދަ ދީފައިވާ ވަރަށް ވުރެ ގިނައިން އިންޖީނު ބަދަލުކުރުމާ ގުޅިގެން، ހެމިލްޓަން އަށް ގްރޯން ޕްރީ ރޭސް ފަށަންޖެހޭނީ ފަސް މަގާމު ފަހަތުންނެވެ. މި ރޭސް ހެމިލްޓަން ފަށާނީ 10 ވަނަ މަގާމުގަ އެވެ.
އެހެންކަމުން، ޗެމްޕިއަންކަން ހޯދުމަށް ހެމިލްޓަން ކުރަމުންދާ އުންމީދުތައް ވަނީ ފަނޑުވެފަ އެވެ. ސީޒަންގައި ބާކީ ހަތަރު ރޭސް އޮތްއިރު، ހެމިލްޓަން އަށް 19 ޕޮއިންޓް ކުރީގައި އޮތް ވެސްޓާޕެންނެވެ.
ކޮލިފައިންގެ ރޭސް ނިންމުމަށް ފަހު، ހެމިލްޓަންގެ ކާރުގައި އަތްލުމުގެ ސަބަބުން، ރެޑްބުލްގެ ވެސްޓާޕެން އަށް ވެސް ވަނީ އަދަބު ދީފަ އެވެ. ވެސްޓާޕެން ވަނީ 50،000 ޔޫރޯ އިން ޖޫރިމަނާކޮށްފަ އެވެ. -- ބީބީސީ
