އަންނަ ޖެނުއަރީން ފެށިގެން ފުލުހުން ބޮޑީ ކެމެރާ ބޭނުން ކުރަން ފަށާނެ ކަމަށް ކޮމިޝަނާ އޮފް ޕޮލިސް (ސީޕީ) މުހައްމަދު ހަމީދު ވިދާޅުވެއްޖެ އެވެ.
ހޯމް މިނިސްޓަރު އިމްރާން އަބްދުﷲ އާ އެކު އުތުރުގެ ބައެއް ރަށްރަށަށް ކުރެއްވި ރަސްމީ ދަތުރަށް ފަހު އިއްޔެ ވެލާނާ އިންޓަނޭޝަނަލް އެއާޕޯޓުގައި ނޫސްވެރިން ގާތު ހަމީދު ވިދާޅުވީ ފުލުހުން މިހާރު އަމަލު ކުރަމުންދާ އާ ގާނޫނުގެ ދަށުން ފުލުހުންގެ ހިންގުމުގެ ދާއިރާއަށް ބޮޑެތި ބަދަލުތަކެއް ގެންނަމުންދާކަމަށެވެ.
އެގޮތުން ބޭނުން ކުރެވޭ ވަސީލަތްތަކާއި، އަމަލުކުރަމުންދާ އުސޫލުތަކަށް ބަދަލު ގެނެސް ރައްޔިތުންނާއި ގާތުން ހިދުމަތްދެވޭނެ މަގު ފަހި ކުރުމަކީ ފުލުހުންގެ އެންމެ ބޮޑު އަމާޒުކަމަށް ހަމީދު ވިދާޅުވި އެވެ.
"ފުލުހުންގެ އިންސާނީ ވަސީލަތް ބޭނުން މިކުރެވެނީ އެންމެ ރަނގަޅަށްތޯ ބެލުމަށް ދިރާސާއެއް ކުރުމަށް އަޅުގަނޑުމެން އެބަ މަސައްކަތް ކުރަން. އަދި ފުލުހުންގެ ހިދުމަތް ފުޅާކުރުމަށް ބޮޑީ ވޯން ކެމެރާވެސް އަންނަ އަހަރު ޖެނުއަރީން ފެށިގެން ބޭނުން ކުރަން ފެށޭނެ،" ސީޕީ ވިދާޅުވި އެވެ.
ފްރަންޓްލައިންގައި ހަރަކާތްތެރިވާ ފުލުހުންގެ ފަރާތުން މިހާރު މަދުން ނަމަވެސް ފެންނަ މައްސަލަތައް ބޮޑީ ވޯން ކެމެރާ ބޭނުން ކުރަން ފެށުމުން ހައްލު ކުރުމަށް ފަސޭހަ ވެގެންދާނެ ކަމަށްވެސް ސީޕީ ވިދާޅުވެ އެވެ.
މިނިސްޓަރު އިމްރާން ވިދާޅުވީ ފުލުހުންގެ ހިދުމަތް ފުޅާ ކުރުމަށްޓަކައި، ބޭނުންވާ ވަސީލަތްތައް ހޯދުމަކީ އެންމެ އިސްކަމެއް ދީގެން ކުރަމުންދާ މަސައްކަތެއް ކަމަށެވެ.
ފުލުހުން މީގެ ކުރިން 1400 ބޮޑީ ކެމެރާ ހޯދަން އިއުލާން ކުރި އެވެ. ނަމަވެސް ފަހުން ވަނީ އެ އަދަދު 200 އަށް ބަދަލުކޮށްފަ އެވެ. އަޖުމަ ބެލުމުގެ ގޮތުން ބޮޑީ ކެމަރާތަކެއް މިދިޔަ އަހަރުގެ ފެބްރުއަރީ މަހު ބޭނުން ކުރި އެވެ.
