ރައްޔިތުންގެ މަޖިލިސް ތަމްސީލުކުރާ ސިޔާސީ ޕާޓީތަކުގެ ދަފްތަރުގައި މޯލްޑިވްސް ނެޝަނަލް ޕާޓީ (އެމްއެންޕީ) އިއްޔެ ހިމެނުމާއެކު، އެ ޕާޓީގެ ޕާލިމަންޓްރީ ގުރޫޕުގެ ލީޑަރަކަށް ތިމަރަފުށި ދާއިރާގެ މެމްބަރު އަބްދުﷲ ރިޔާޒް އައްޔަނުކޮށްފި އެވެ.
އެމްއެންޕީއަކީ ޖުމްހޫރީ ޕާޓީ (ޖޭޕީ) ގެ މެމްބަރުންގެ ގޮތުގައި މަޖިލިސް ތަމްސީލު ކުރައްވަމުން ގެންދެވި ރިޔާޒްގެ އިތުރުން ދަނގެތި ދާއިރާގެ މެމްބަރު މުހައްމަދު ނާޒިމް އިސްވެ އުފައްދަވާފައިވާ ޕާޓީއެކެވެ.
ނާޒިމާއި ރިޔާޒްގެ އިތުރުން، ވިލިމާލެ ދާއިރާގެ މިނިވަން މެމްބަރު އަހްމަދު އުޝާމް ވެސް އެ ޕާޓީއާ ވަނީ ގުޅިވަޑައިގެންފަ އެވެ. އޭނާ ވަނީ ޕާލިމަންޓްރީ ގުރޫޕުގެ ޑެޕިއުޓީ ލީޑަރަކަށް ހަމަޖައްސައިފަ އެވެ.
މަޖިލީހުގެ އިއްޔެގެ ޖަލްސާގައި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވަނީ އެ ތިން މެމްބަރުންނަކީ މަޖިލީހުގައި އެމްއެންޕީ ތަމްސީލު ކުރައްވާ ތިން މެމްބަރުން ކަމަށް އިއުލާނުކުރައްވައި، މަޖިލީހުގައި ސިޔާސީ ޕާޓީތައް ތަމްސީލުކުރާ ތަރުތީބަށް އައި ބަދަލުތައް ވެސް ހާމަކޮށްދެއްވައިފަ އެވެ.
އަދި މި ބަދަލާ ގުޅިގެން، މަޖިލީހުގެ ކޮމިޓީތަކުގައި ޕާޓީތައް ތަމްސީލުކުރުމަށް އަންނަ ބަދަލު ފާސްކުރަން ހުށަހަޅުއްވާނެކަމަށް ވެސް އެމަނިކުފާނު ވިދާޅުވި އެވެ.
އެއާއެކު އެމްއެންޕީން ނެރުނު ބަޔާނެއްގައި ބުނީ، އެމްއެންޕީއަކީ މަޖިލިސް ތަމްސީލުކުރާ ޕާޓީއެއްގެ ގޮތުގައި ހަމަޖެއްސުމާ ގުޅިގެން، އެ ޕާޓީގެ ޕީޖީ ގުރޫޕުގެ ލީޑަރުގެ ގޮތުގައި ރިޔާޒް އައްޔަނުކުރެވިފައިވާ ކަމަށެވެ.
އަދި ޑެޕިޔުޓީ ޕީޖީ ގުރޫޕުގެ ލީޑަރުގެ ގޮތުގައި އުޝާމް އައްޔަނުކުރެވިފައިވާ ކަމަށް ވެސް އެ ޕާޓީން ބުންޏެވެ.
މަޖިލީހުގެ ދަފްތަރަށް އައި ބަދަލު
- އެމްޑީޕީ - 65 މެމްބަރުން
- ޕީޕީއެމް - 6 މެމްބަރުން
- ޖޭޕީ - 3 މެމްބަރުން
- ޕީއެންސީ - 3 މެމްބަރުން
- އެމްއެންޕީ - 3 މެމްބަރުން
- އެމްޑީއޭ - 2 މެމްބަރުން
- ވަކި ޕާޓީއަކަށް ނިސްބަތް ނުވާ - 5 މެމްބަރުން
މިނިވަން މެމްބަރުންގެ ގޮތުގައި ތިއްބަވާ ނިލަންދޫ ދާއިރާގެ މެމްބަރު އަބްދުލްމުހްސިން ހަމީދާއި ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) އެމްއެންޕީއާ އުފެއްދިއިރު އެ ޕާޓީއާ ގުޅިވަޑައިގަންނަވާނެ ކަމަށް ވިދާޅުވި އެވެ.
ނަމަވެސް، ފަހުން އެ ދެ މެމްބަރުން ވެސް ވަނީ އެ ހިޔާލު ބަދަލުވެއްޖެކަމަށް ވިދާޅުވެ، އެމްއެންޕީއާ ގުޅިވަޑައިގަތުމަށް ނިންމި ނިންމުން އަނބުރާ ގެންގޮސްފަ އެވެ.
އެމްއެންޕީގެ އަމާޒަކީ މަޖިލީހުގެ މައިނޯރިޓީ ޕާޓީއަށް ވުން ކަމުގައި ނާޒިމް މީގެ ކުރިން ވަނީ ވިދާޅުވެފަ އެވެ.
