ގާނޫނު އަސާސީން ކަށަވަރުކޮށްދީފައިވާ މައުލޫމާތު ހޯދައި ލިބިގަތުމުގެ ހައްގުގެ ބޭނުން އެންމެ ފުރިހަމަ ގޮތުގައި ހިފުމުގެ ގޮތުން އަމަލުކުރަމުން އަންނަ އާރުޓީއައި ގާނޫނު އޮންނަ ގޮތުން މައުލޫމާތު ހޯދުމުގެ ނަމުގައި އެ ގާނޫނު "އެބިއުސް" ކުރަމުން އަންނަ ބަންޑާރަނައިބު އަހުމަދު އުޝާމް މިއަދު ވިދާޅުވެއްޖެ އެވެ.
އާރުޓީއައި ގާނޫނުގެ ނާޖާއިޒު ގޮތެއްގައި ބޭނުންކުރާ ކަމަށް އުޝާމް ވިދާޅުވީ، އެ ގާނޫނުގައި ބަޔާންކުރާ މުއްދަތުތަކުގެ ތެރޭގައި އާރުޓީއައި ހުށަހެޅުންތަކަށް ރައީސް އޮފީހުން ޖަވާބު ނުދޭ މައްސަލައިގައި ނޫސްވެރިޔަކު ސުވާލުކުރުމުންނެވެ.
އުޝާމް ދެއްވީ ޖަވާބުގައި އޭނާ ވަނީ އެ ގާނޫނަކީ މުހިންމު މަގުސަދެއްގައި އެކުލަވާލާފައިވާ ގާނޫނެއް ކަމަށް ވިދާޅުވެފަ އެވެ. އަދި، އެ ގާނޫނުގެ ބޭނުން "ހެޔޮ ގޮތުގައި" ކުރާ މީހުންނަށް މައުލޫމާތު ދިނުމަކީ މުހިންމު ކަމެއް ކަމަށް އޭނާ ވިދާޅުވި އެވެ.
"އެހެން ނަމަވެސް އަޅުގަނޑުމެންނަށް ވަރަށް ގިނަ ފަހަރަށް ފެނިގެން މިދަނީ މިހާރަކަށް އައިސް އަމުދުން، ގިނަ ފަހަރު އަޅުގަނޑުމެންނަށް ފެނިގެން މިދަނީ އާރުޓީއައި ގާނޫނު ވަރަށް ބޮޑަށް އެބިއުސްކުރާތަން ވެސް އަޅުގަނޑަށް އެބަ ފެނޭ،" އުޝާމް ވިދާޅުވި އެވެ.
އާރުޓީއައި ގާނޫނުގެ ބޭނުން އެ ގޮތަށް ހިފާތީ، އުޝާމް ވިދާޅުވީ، އާރުޓީއައިތަކަށް ޖަވާބު ދިނުމުގައި ސަރުކާރުގެ އިދާރާތަކުން ހޭދަކުރަން ޖެހޭ ވަގުތު ވަރަށް ގިނަ ކަމަށެވެ. އަދި، މިއީ އެ ގާނޫނު ބޭނުންކޮށްގެން ކުރާ "ކަންތައްތަކުގެ" ސަބަބުން ވާކަމެއް ކަމަށް އޭނާ ވިދާޅުވި އެވެ. ނަމަވެސް އޭގެ އިތުރު ތަފުސީލެއް ނުދެއްވަ އެވެ.
މައުލޫމާތު ހޯދަން ލިބޭ ހުށަހެޅުންތަކުގެ ސަބަބުން ދަތިވާ ކަމަށް އުޝާމް ވިދާޅުވިއިރު، މިދިޔަ އަހަރު ހޯމް މިނިސްޓަރު އަލީ އިހުސާން ވެސް އާރުޓީއައި ގާނޫނާ ގުޅޭ ގޮތުން މި މޭރުމުން ވާހަކަ ދައްކަވަމުން، އެއީ ހަރަދު ބޮޑު ކަމެއް ކަމަށް ވިދާޅުވެފަ އެވެ.
ސަރުކާރުގެ ވަޒީރުން މި މޭރުމުން ވާހަކަ ދެއްކެވިއިރު، އާރުޓީއައިތަކަށް ޖަވާބު ނުދީ ތިބުމާއި، ގާނޫނުގައި މައުލޫމާތު ސިއްރުކުރަން ލިބޭ އެކި މާއްދާތަކުގެ ބޭނުން ހިފައި ގިނަ މައުލޫމާތުތައް ސަރުކާރުން ހިފަހައްޓާ ކަމުގެ ޝަކުވާ ބޮޑެވެ. އަދި މައުލޫމާތު ފޯރުކޯށްދޭއިރު، ގޯސް ނޫނީ ފުރިހަމަ ނޫން މައުލޫމާތު ދޭ ކަމުގެ ޝަކުވާތަކެއް ވެސް އެބައުޅެ އެވެ.
އިންފޮމޭޝަން ކޮމިޝަނަރުގެ އޮފީހުން އާންމުކޮށްފައިވާ މިދިޔަ އަހަރުގެ ތަފާސްހިސާބުތަކުން ދައްކާ ގޮތުގައި އެ އޮފީހަށް ހުށަހެޅި 712 ޝަކުވާގެ ތެރޭގައި ގިނައީ އެއްވެސް ޖަވާބެއް ނުލިބިގެން ހުށަހަޅާފައިވާ ޝަކުވާ (487) އެވެ.
އެންމެ ގިނަ މައްސަލަތައް ރައްދުވާ އެއް އިދާރާއަކީ ރައީސް އޮފީހެވެ. އެ އޮފީހަށް ހުށަހެޅި ގިނަ ހުށަހެޅުންތަކަށް އެއްވެސް ޖަވާބެއް ނުލިބޭ ތަނުގައި، ބައެއް މައްސަލަތަކުގައި އައިކޮމް އިން އެންގުމުން ވެސް އެ މައުލޫމާތު ނުދީ ގިނަ ދުވަސްތަކެއް ކޮށްފައިވެ އެވެ.
