ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއްޔެ ހދ. ކުޅުދުއްފުއްޓަށް ވަޑައިގަތުމުން އެމަނިކުފާނާ ދެކޮޅަށް ޝުއޫރު ފާޅު ކުރި މީހަކު ހައްޔަރުކޮށް ރައީސް ވަޑައިގެންނެވި ސަރަހައްދުގައި ހުރި ބެނާތަކާއި ޕޯސްޓަރުތައް ފުލުހުން އަތުލައިފި އެވެ.
ރައީސް ސޯލިހާ ދެކޮޅަށް އަޑުއުފުލާފައި ވަނީ ރޭ ބޭއްވި ޒުވާނުންގެ ދުވަހުގެ ޖަލްސާގައި ބައިވެރިވަޑައިގަތުމަށް އެމަނިކުފާނު ކުޅުދުއްފުއްޓަށް ވަޑައިގަތުމަށްފަހު މެންދުރު ފަހު ރަށުގެ ހޮވާލެވުނު ޓީމަކާއި ގައުމީ ފުޓުބޯޅަ ޓީމާއެކު ކުޅުނު މެޗެއް ބެއްލެވުމަށް ދަނޑަށް ވަޑައިގެންނެވި ތަނުންނެވެ.
ފުލުހުންގެ އަމުރަށް ނުކިޔަމަންތެރިވިކަމުގެ ތުހުމަތުގައި އިއްޔެ ހައްޔަރު ކުރި އިދިކޮޅު ޕީޕީއެމްއަށް ނިސްބަތްވާ މުޖްތަބާ އަހުމަދު ބުނީ އޭނާ ހައްޔަރު ކުރީ "ރައީސުލްޖުމްހޫރިއްޔާއަށް ފެންނަ ފަށުގައި ފޮތި ދެމުމަކީ އެމަނިކުފާނުގެ ދަތުރުފުޅަށް ހުރަސްއެޅުން" ކަމުގައި ބުނުމަށް ފަހު ކަމަށެވެ.
"ފުލުހުން ބުނީ ބެރިކޭޑު ޖަހާފައި ހުރި ސަރަހައްދަށް ބެނާތައް ހިފައިގެން ނުވަދެވޭނެ ކަމަށް. އަޅުގަނޑު ބުނިން ބޭނުންވަނީ ރައީސުލްޖުމްހޫރިއްޔާއަށް އަޅުގަނޑުމެންގެ ޝުއޫރުތައް އިއްވާށޭ. ބެނާތައް ވެއްދީ ވެސް އެއްގެއިން އަނެއްގެއިން. ގޭގެ ވެރިފަރާތުގެ ހުއްދަ ހޯދައިގެން ބެނާ ދެމީ ވެސް،" މުޖްތަބާ ކިޔައިދިނެވެ.
ބޯޅަދަނޑު ފަހަތުގައި ހުރި ގެއެއްގައި ހަރު ކުރި ފިޔާތޮށި ކުލައިގެ ފޮތިގަނޑުގައި ބުނެފައި ވަނީ "އިންޑިއާ އައުޓް، އިބޫ އިސްތިއުފާ، ރައީސް ޔާމީން މިނިވަންކުރޭ" މިހެންނެވެ. ފޮތިގަނޑު ދެމި ސަރަހައްދުގައި އެއްވެސް ކަހަލަ ހަމަނުޖެހުމެއް ހިންގި ތަން ފުލުހުން އެ ފޮތިގަނޑު ނެގި މަންޒަރުގެ ވީޑިއޯއަކުން ނުފުނެ އެވެ.
މުޖްތަބާ ބުނީ ހިޔާލުފާޅުކުރަން ދަމާފައި ހުރި ފޮތިގަނޑު އަތުލުމަށްފަހު އޭނާ ހައްޔަރު ކުރީ ވަރަށް އަނިޔާވެރި ގޮތަކަށް ކަމަށެވެ. އަދި އެއީ ގާނޫނު އަސާސީން އޭނާއަށް ކަށަވަރުކޮށްދީފައި އޮތް މިނިވަންކަން ނިގުޅައިގަތުން ކަމުގައި ދެކޭ ކަމަށް ވެސް މުޖްތަބާ ބުންޏެވެ.
"ރައީސްގެ ދަތުރުފުޅަށް ހުރަސް އެޅެންވީ ކީއްވެގެންތޯ އަޅުގަނޑުމެން ޝުއޫރުފާޅުކޮށްގެން. ކޮން ގާނޫނަކުންތޯ އެކަން މަނާ ވަނީ؟ ކީއްވެގެންތޯ ރައީސްއަށް ފެންނަ ފަށުގައި ބެނާ ނުދެމެންވީ؟،" އޭނާ ސުވާލު ކުރި އެވެ.
އެކަމާ ގުޅިގެން އިދިކޮޅު ޕީޕީއެމް/ޕީއެންސީ ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވީ "ރައީސްގެ ދަތުރުފުޅުތަކުން ފެންނަނީ ހުދުމުހުތާރު ވެރިއެއްގެ ސިފަތައް" ކަމަށެވެ. އަދި ހިޔާލުފާޅު ކުރުމުގެ މިނިވަން ދެއްވާނެ ކަމަށް ވައުދުވެވަޑައިގެން ވެރިކަމާ ހަވާލުވެލެއްވި ނަމަވެސް ރައީސް ސޯލިހު ފަރާތްޕުޅުން މިހާރު ފެންނަނީ އަޑު އުފުލުމުގެ މިނިވަންކަން ނައްތާލާ މަންޒަރު ކަމަށް ވެސް އަބްދުއްރަހީމް ވިދާޅުވި އެވެ.
މިކަމާ ގުޅިގެން ފުލުހުންގެ އިދާރާ އަދި ރައީސުލްޖުމްހޫރިއްޔާގެ އޮފީހާ މި ނޫހުން ގުޅުމުން މިހާތަނަށް ކޮމެންޓެއް ނުކުރެ އެވެ.
ރައީސް ސޯލިހު ވެރިކަމުގެ ހުވާ ކުރެއްވުމަށްފަހު ނޮވެމްބަރު 17، ގައި ގައުމާ މުހާތަބުކޮށް ދެއްވި ހިތާބުގައި، ޑިމޮކްރަސީ ހަރުދަނާ ކުރައްވާނެ ކަމަށާއި ތަފާތު ސިޔާސީ ފިކުރުތަކަށް ފުރުސަތު ދެއްވާނެ ކަމަށް ވަނީ ވައުދުވެވަޑައިގެންފަ އެވެ.
"އަޅުގަނޑު ދެކޭގޮތުގައި، މި ރާއްޖެ ތަރައްގީ ކުރުމަށް އޮތް މަގަކީ ރައްޔިތުން ބާރުވެރިކުރުވުން. އަދި މި ރާއްޖޭގެ ޑިމޮކްރެޓިކް ވެށި ހަރުދަނާކޮށް ދެމެހެއްޓޭނީ ވެސް އެމަގަށް އަޅުގަނޑުމެންގެ މަސައްކަތްތައް މިސްރާބު ކުރެވިގެން،" ރައީސް ސޯލިހު ވިދާޅުވެފައިވެ އެވެ.
އަދި އިތުރަށް ރައީސް ވިދާޅުވެފައި ވަނީ "ތަފާތު ސިޔާސީ ފިކުރުތައް ބަދަހިކަމާއެކު ހިފެހެއްޓުމަށް އަޅުގަނޑު ކުރަންޖެހި، ނުކޮށް އޮތީ މިވެނި ކަމެކޭ ބުނެވޭނޭ އެއްވެސް ކަމެއް ދޫކޮށެއްނުލާނަން" ކަމަށެވެ.
