މެނީލާ، ފިލިޕީންސް (ސެޕްޓެމްބަރު 30) - ފިލިޕީންސްގެ ރައީސް ކަމަށް ކުރިމަތިލެއްވުމުގެ ޝައުގުވެރިކަން ގެންގުޅުއްވާތީ ފިލިޕީންސްގެ ގާނޫނު ހަދާ މަޖިލީހުގައި މި ވަގުތު މަސައްކަތް ކުރައްވަމުން އަންނަ ލެޖެންޑް މެނީ ޕަކިއާއޯ ރަސްމީކޮށް ރިޓަޔާމެންޓް އިއުލާނުކޮށްފި އެވެ.
އުމުރުން 42 އަހަރުގެ ޕަކިއާއޯ ވަނީ 26 އަހަރު ޕްރޮފެޝަނަލް ބޮކްސިންގައި ހޭދަކޮށްފަ އެވެ. އޭނާ އެ މުއްދަތުގެ ތެރޭގައި 72 މެޗު ތެޅިިއިރު، 62 މެޗުން މޮޅުވި އެވެ. އަށް މެޗުން ބަލިވިއިރު، ދެ މެޗު ނިމުނީ އެއްވަރުވެގެންނެވެ. ޕަކިއާއޯ އަކީ ތަފާތު އެކި ބަރުދަންތަކުގެ ތެޅުމަށް ބަލާއިރު، އަށް ޑިވިޝަނެއްގެ ތަށި ހޯދި ހަމައެކަނި ބޮކްސަރެވެ.
ޕަކިއާއޯ ރިޓަޔާކުރިކަން އިއުލާނުކުރެއްވީ ސޯޝަލް މީޑިއާ އަށް ދޫކުރި ވީޑިއޯ އެއް މެދުވެރިކޮށެވެ. އޭނާ ވިދާޅުވީ ގަބޫލުކުރަން އުނދަގޫވި ކަމުގައި ވިޔަސް ބޮކްސިންގެ ހަޔާތް މި ހިސާބުން ނިމުމަކަށް ގެންނަން ޖެހޭ ކަމަށާއި ސަބަބަކީ ކެރިއަރުގައި އެހެން މިސްރާބަކަށް ދޭން ޖެހުން ކަމަށެެވެ.
2015 ވަނަ އަހަރު ޕަކިއާއޯ (ކ) އާއި ފްލޮއިޑް މޭވެދާގެ ތެޅުމުގެ ތެރެއިން.
އިސްކޮޅުން ކުރު ނަމަވެސް ޖެހިލުންކުޑަ ތެޅުންތެރިއެއްގެ ގޮތުގައި ފެންނަ ޕެކިއާއޯ ކެރިއަރުގައި މޮޅުވި 62 މެޗުގެ ތެރެއިން 39 މެޗަކީ އިދިކޮޅު ތެޅުންތެރިޔާ އަށް ފުރުސަތެއް ނުދީ ނޮކައުޓްކޮށް މޮޅުވި މެޗުތަކެވެ. އަނެއް 23 މެޗަކީ އިދިކޮޅު ކުޅުންތެރިޔާ މެޗު ދޫކޮށްލުމުން ލިބުނު މޮޅުތަކެވެ.
އެންމެ ފަހުން ޕަކިއާއޯ ތެޅީ މިދިޔަ މަހު ކިއުބާގެ ޔޯދެނިސް ޔޫގަސްއާ އެވެ. ޔޫގަސް އަތުން ޕެކިއާއޯ ބަލިވިއިރު، މިއީ ފާއިތުވި ދެ އަހަރެއްހާ ދުވަސް ތެރޭ ޕެކިއާއޯގެ ފުރަތަމަ ތެޅުމެވެ.
ކުއްލިގޮތަކަށް ޕެކިއާއޯ ރިޓަޔާމެންޓް އިއުލާނުކުރި ސަބަބާ ބެހޭގޮތުން ތަފާތު ވާހަކަތައް އަންނަނީ ދެކެވެމުންނެވެ. އެ ގޮތުން ފިލިޕީންސްގެ މީޑިއާތަކުން ރިޕޯޓްކުރަމުން އަންނަ ގޮތުގައި ޕެކިއާއޯ ނިންމާފައިވަނީ އަންނަ އަހަރު މެއި މަހު ބާއްވާ ފިލިޕީންސްގެ ރިޔާސީ އިންތިހާބުގައި ވާދަކުރާށެވެ.
