ހިއުމަން ރައިޓްސް ކޮމިޝަން (އެޗްއާރުސީއެމް) ގެ ހުސްވެފައިވާ މެމްބަރުކަމަށް ގދ. ތިނަދޫ / އަސާގެ، ސަމާއު އަހުމަދު ނަޖީބު އައްޔަން ކުރަން ރައްޔިތުންގެ މަޖިލީހުން ރުހުން ދީފި އެވެ.
އެ ކޮމިޝަންގެ ކުރީގެ މެމްބަރު ނައިވީން އަބްދުﷲ ގެ ދައުރު ހަމަވެ އެ މަގާމު ހުސްވުމުން ހުޅުވައިލި ފުރުސަތުގައި ކުރިމަތިލި ފަރާތްތަކުގެ ތެރެއިން ސަމާއުގެ އިތުރުން 13 ބޭފުޅެއްގެ ނަން ރައީސް އިބްރާހިމް މުހައްމަދު މަޖިލީހަށް ހުށަހެޅުއްވި އެވެ.
ކުރިމަތިލި ފަރާތްތަކުގެ ތެރެއިން ދެ ބޭފުޅަކު ނަން އަނބުރާ ނަގާފައިވާއިރު، އެހެން ތިން ބޭފުޅަކު މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއިން ކުރިއަށް ގެންދިޔަ އިންޓަވިއުގައި ބައިވެރިވާން ބޭނުންނުވާކަމަށް އެނގި ކަމަށް ކޮމިޓީ ރިޕޯޓުގައި ބުންޏެވެ.
ކޮމިޓީ ރިޕޯޓުގައިވާ ގޮތުން، ބާކީ ތިބި ފަރާތްތަކާ އިންޓަވިއު ކުރިއިރު، އެ މަގާމަށް އެންމެ އެކަށީގެންވާ ބޭފުޅަކީ، ރައީސް ފޮނުއްވި ލިސްޓުގައި ވެސް އެންމެ ކުރީގައި އޮތް ސަމާއު އެވެ.
ހުރިހާ ގޮތަކުން ވެސް ސަމާއު ގާބިލު
އިންޓަވިއު މަރުހަލާގެ ތެރެއިން، އެ މަގާމަށް އެންމެ ގާބިލު ބޭފުޅަކީ ސަމާއުކަމަށް ކޮމިޓީއަށް ފާހަގަކުރެވުނު ކަމަށް ރިިޕޯޓުގައި ބުނެފައި ވެ އެވެ.
އެގޮތުން، ސަމާއު އަކީ ހިއުމަން ރައިޓްސްއާ ގުޅޭ ދާއިރާގައި އަށް އަހަރަށް ވުރެ ގިނަ ދުވަހު މަސައްކަތް ކުރެއްވުމުގެ އިތުރުން، ގާނޫނީ ދާއިރާއިން ބެޗެލާޒް އަދި ހިއުމަން ރައިޓްސް ލޯއިން މާސްޓާސް ޑިގްރީ ފުރިހަމަ ކުރައްވާފައިވާކަން ފަރާތެއްކަން ވަނީ ފާހަގަކޮށްފަ އެވެ.
އަދި މިވަގުތު ކޮމިޝަނުގައި ތިއްބެވި ބޭފުޅުންގެ ތެރޭގައި ގާނޫނީ ދާއިރާގެ ބޭފުޅަކު ނެތްކަމަށް ވެސް ރިޕޯޓުގައި ފާހަގަކޮށްފައި ވެ އެވެ.
އޭގެ އިތުރުން، ކޮމިޓީން ކުރި ސުވާލުތަކަށް ޖަވާބު ދެއްވުމުގައި އެހެން ކެންޑިޑޭޓުންނާ އަޅާބަލާއިރު، ކޮމިޝަނުގެ މަސައްކަތްތަކުގެ ފުރިހަމަ މައުލޫމާތު ސަމާއުއަށް ލިބިވަޑައިގެންފައިވާ ކަމަށާއި، އިންސާނީ ހައްގުތަކާ ގުޅޭގޮތުން މިވަގުތު ރާއްޖޭގައި ހުރި މައްސަލަތައް ހައްލުކުރުމުގެ ރަނގަޅު ތަސައްވުރެއް އޮތް ކަން ކޮމިޓީން ބުންޏެވެ.
އެއާއެކު، ސަމާއުގެ ގާބިލުކަމަށް ބަލައި، އެ މަގާމަށް އައްޔަނުކުރަން ފެންނަކަމަށް ކޮމިޓީން ފާސްކޮށްފައިވަނީ ހަމައެކަނި އޭނާގެ ނަމެވެ.
ކޮމިޓީން ނިންމި ގޮތަށް، މިއަދުގެ ޖަލްސާގައި ފާސްކޮށްފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 42 މެމްބަރުންގެ އިއްތިފާގުންނެވެ.
އެޗްއާރުސީއެމްގެ މެމްބަރުކަމަށް އައްޔަނުކުރަން މަޖިލީހުން މިއަދު ރުހުންދިން ސަމާއު ވަނީ މީގެ ކުރިން ވަނީ ބަންޑާރަ ނައިބުގެ އޮފީހުގައި ސީނިއާ ސްޓޭޓް އެޓާނީގެ މަގާމު އަދާކުރައްވައިފަ އެވެ. އޭގެ ކުރިން އޭނާ ފޮރިން މިނިސްޓްރީގައި ވެސް ހިދުމަތް ކުރެއްވި އެވެ.
ފަސް މެމްބަރުންގެ މައްޗަށް އެކުލެވޭ އެޗްއާރުސީއެމްގައި މި ވަގުތު ތިއްބެވީ ހަތަރު މެމްބަރުންނެވެ.
