މޯލްޑިވިއަން ޑިމޮކްރަޓިކް ޕާޓީގެ ރިޔާސީ ޕްރައިމަރީގައި ވާދަކުރައްވާ ފައްޔާޒު އިސްމާއިލް އެދިގެން މަޝްހޫރު ވިޔަފާރިވެރިޔާ މުހައްމަދު ޝަފީގު (ތަނޑިރަތްމާގެ ޝަގީގު) ބެންކަށް ގެރެންޓީއެއް ދިން ކަމަށް ބުނެ ފަތުރަމުންދާ ވާހަކަތައް އޭނާ ދޮގުކުރައްވައިފި އެވެ.
އަދަދު ނޫހުން ގެނެސްދިން ޕްރޮގްރާމެއްގައި އެ ޕާޓީގެ ކުރީގެ ޗެއާޕާސަން ފައްޔާޒު ވިދާޅުވީ ޝަފީގު ކައިރީ އެއްވެސް އިރެއްގައި ބެންކަށް ގެރެންޓީއެއް ދިނުމަށް އެދިފައި ނުވާނެ ކަމަށާއި އެގޮތަށް ޝަފީގު ވާހަކަ ދެއްކެވީ ހަނދާނުން އެކަން ކައްސާލުމުން ކަމަށެވެ.
"ޝަފީގު އެ ދެއްވި ގެރެންޓީއަކީ އަޅުގަނޑަށް އެއްވެސް ހާލަތެއްގައި ޝަފީގު ދެއްވި ގެރެންޓީއެއް ނޫން. އަދި އަޅުގަނޑު ޝަފީގު ކައިރީގައި އެދުނު ކަމެއްވެސް ނޫން އެނގޭތޯ. އެ ޕްރޮޖެކްޓުގެ މައި ހިއްސާދާރަކީ ޝަފީގުގެ ވަރަށް ގާތް ބޭފުޅެއް. ޝަފީގު އެ ބޭފުޅާއަށް ކޮށްދެއްވި އެ ގެރެންޓީ ދެއްވުމަކީ،" ފައްޔާޒް ވިދާޅުވި އެވެ.
ފައްޔާޒް ވިދާޅުވީ ޝަފީގު ބެންކަށް ދިން ގެރެންޓީއެއްގެ ދަށުން ދޫކުރި ލޯނުން ޒުވާން ވިޔަފާރިވެރިންތަކެއް ކުރިއަށްގެންދިޔައީ ރިސޯޓެއް ތަރައްގީކުރުމުގެ މަޝްރޫއެއް ކަމަށެވެ. ނަމަވެސް އެ މަޝްރޫއު ނިމުމަކާ ހިސާބަށް ގޮސްފައި އޮއްވާ ފެއިލްވީ ކަމަށް ފައްޔާޒު ވިދާޅުވި އެވެ.
މި މައްސަލަ ކޯޓުގައި އޮންނަތާ 15 އަހަރުވެފައިވާ ކަމަށާއި ޝަފީގަށް އެކަމާ ގުޅިގެން މާލީގޮތުން އެއްވެސް ގެއްލުމެއް ލިބުނުކަމުގެ މައުލޫމާތު ނުލިބޭ ކަމަށް އޭނާ ވިދާޅުވި އެވެ.
"ކޮންމެޔަކަސް އެ ޕްރޮޖެކްޓް ފެއިލްވީ އެނގޭތޯ. އެކިއެކި ސަބަބުތަކަށްޓަކައި ޕްރޮޖެކްޓް ކުރިއަށް ނުގޮސް އެ ރިސޯޓު ނުނިންމިގެން، އެއީ ދެން އެންމެންވެސް ދަންނަ ކަމެއް ދިވެހިރާއްޖޭގައި އިނގޭތޯ. ވަރަށް ބޮޑަށް ނިމިފައި އޮއްވާ ދިމާވި އެތައް ސަބަބުތަކަށްޓަކައި ހެދި މިހާރު އެ ރިސޯޓު ވިރާނާވެގެން ވަރަށް ބޮޑަށް ގޮސް ބޭންކުން އެ ލޯނު ހޯދަން މަސައްކަތްކުރާނެތާ،" އޭނާ ވިދާޅުވި އެވެ.
ސޯޝަލް މީޑިއާގައި ފައްޔާޒްއާ ބެހޭގޮތުން ޝަފީގު ދެއްކި ވާހަކަ ހިމެނޭ ވީޑިއޯއެއް ދައުރުކުރަމުންދަނީ ޝަފީގުގެ ބަލި ހާލަތުގެ ނާޖާއިޒް ފައިދާ ނަގައިގެން ފާހަގަކުރައްވާ ފައްޔާޒް ވިދާޅުވީ ޝަފީގާ ބައްދަލުކުރައްވާނެ ކަމަށެވެ. އެގޮތުން ޝަފީގު ދެއްކެވި ވާހަކަތަކަކީ އަމިއްލަ އިހުތިޔާރުގައި ދެއްކި ވާހަކަތަކެއްތޯ ކަށަވަރުކުރައްވާނެ ކަމަށް ފައްޔާޒް ވިދާޅުވި އެވެ.
