ކޯޓު އަމުރަކާ ހިލާފުވި ކަމަށް ނިންމާ، ޖަލުގައި ބަންދުކޮށްފައިވާ އަދަދުގެ ދެ ނޫސްވެރިންނާ މެދު އަމަލުކުރަމުންދާ ގޮތުގެ ތަހުގީގެއް ހިންގަން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ނިންމައިފި އެވެ.
އަދަދުން ނެރުނު "އައިޝާ" ޑޮކިޔުމެންޓްރީގެ ވާހަކަދެއްކުން ހުއްޓުވުމަށް ކްރިމިނަލް ކޯޓުން ނެރުނު އަމުރާ ހިލާފުވެ، ކޯޓުގެ ހުރުމަތް ކެނޑިކަމަށް ހުކުމްކޮށް ޖަލަށްލާފައިވަނީ މުހައްމަދު ޝަހުޒާން އާއި ލީވާން އަލީ ނަސީރެވެ.
އެޗްއާރްސީއެމްއިން ރޭ ސޯޝަލް މީޑިއާގައި ކުރި ޕޯސްޓެއްގައި ބުނީ ދެ ނޫސްވެރިންނާއި އެ މީހުންގެ ހައްގުގައި ކުރަމުންދާ ސިލްސިލާ މުޒާހަރާތަކުން ހައްޔަރުކޮށްފައިވާ ފަރާތްތަކާ ކޮމިޝަނުން ބައްދަލުކޮށްފައިވާ ކަމަށެވެ.
"ކޮމިޝަނުގެ މި ޒިޔާރަތްތަކުގައި، އެ ފަރާތްތަކުން ފާހަގަކުރި ކަންކަމުގެ މައްޗަށް ރިއާޔަތްކޮށް ތަހުގީގު ކުރަންޖެހޭ ކަންކަން، ކޮމިޝަނުން ތަހުގީގު ކުރުމަށް ވަނީ ނިންމާފައެވެ،" އެ ޕޯސްޓުގައި ބުންޏެވެ.
ކޯޓުގެ އަމުރު ރިޕޯޓުކުރުމުން ކުށްވެރިވި ލީވާން އާއި ރައީސް މުހައްމަދު މުއިއްޒުއާ ސުވާލެއް ކުރުމުން ކުށްވެރިވި ޝަހުޒާން އެންމެ ފުރަތަމަ ތިބީ މާފުށީ ޖަލުގެ ޔުނިޓް 12 ގެ ގޮޅިއެއްގައި އެވެ. އެކަމަކު މިދިޔަ ހުކުރު ދުވަހު ކުއްލި ގޮތަކަށް ލީވާން އެކަހެރިކޮށް ޔުނިޓް 19 ގެ ގޮޅިއަކަށް ބަދަލުކުރި އެވެ.
ލީވާން އެކަހެރިކޮށްފައި ވަނީ ބޮޑެތި މަރުތަކުގެ މައްސަލަތަކުގައި ހިމެނޭ ފަރާތްތައް ބަންދުކޮށްފައިވާ ޔުނިޓެއްގަ އެވެ. އެއީ ކީއްވެ އެޅި ފިޔަވަޅެއް ކަމެއް ކަރެކްޝަންސްއިން ހާމައެއް ނުކުރެ އެވެ.
ލީވާންގެ ހަމުގެ މައްސަލައެއް ހުންނާތީ އޭނާ ބޭނުންކުރަން ޖެހެނީ ވަކި ހާއްސަ ލޯޝަނެކެވެ. އެކަމަކު އެ ލޯޝަން ލިބޭނެ ގޮތް ނުހަދާ، ސިއްހީ ފަރުވާއަށް ހުރަސްއަޅަމުންދާ ކަމަށް މިދިޔަ އާދީއްތަ ދުވަހު އޭނާގެ ވަކީލުން ބުންޏެވެ.
އޭގެ އިތުރުން ލީވާން އެކަހެރިކޮށްފައި އޮތް ގޮޅިއަކީ މުޑުދާރު ތަނެއް ކަމަށާއި އެތަނުގައި އެކި ސޫފާސޫތްޕާއި މީދާ ފަދަ ތަކެތި އުޅޭ އިރު، ނިދަން ޖެހެނީ ބިންމަތީގައި ކަމަށް ބުނެ ވެސް ވަކީލު ކަންބޮޑުވުން ފާޅުކުރި އެވެ.
އެކަން މީޑިއާތަކުން ރިޕޯޓުކުރުމުން ކަރެކްޝަންސްގެ އޮފިސަރުން ވަނީ ގޮޅި ތެރެ ކުނިކަހައި، ނިދަން ބޭނުންކުރާނެ ގޮދަޑިއެއް ލީވާންއަށް ފޯރުކޮށްދީފަ އެވެ. ނަމަވެސް އާއިލާގެ ފަރާތުން ފޮނުވި ފައިސާއިން ތަކެތި ގަނެވޭނެ ގޮތް އަދިވެސް ހަދައިދީފައެއް ނުވެ އެވެ.
ލީވާން ތަންފީޒުކުރަމުން ދަނީ 10 ދުވަހުގެ ޖަލު ހުކުމެކެވެ. އަދި ޝަހުޒާންގެ މައްޗަށް އިއްވީ 15 ދުވަހުގެ ޖަލު ހުކުމެކެވެ. އޭގެ އިތުރުން ދެ ނޫސްވެރިން ވެސް ބޮޑު އަދަދަކުން ޖޫރިމަނާކޮށްފައިވެ އެވެ. އެ މީހުންގެ ފަރާތުން ހުކުމް ވަނީ އިސްތިއުނާފަށް ހުށަހަޅައިފަ އެވެ.
