އިދިކޮޅު އެމްޑީޕީ އާއި ޕީއެންއެފް އިން މާލޭގައި ސިލްސިލާކޮށް ކުރިއަށްގެންދާ މުޒާހަރާތަކާ ގުޅިގެން ރައީސް މުހައްމަދު މުއިއްޒު ދެއްކެވި ވާހަކަތަކަށް ހިތްވަރުދީ، މުޒާހަރާކުރާ މީހުން ކުަށްވެރިކޮށް ހިއުމަން ރައިޓްސް ކޮމިޝަނުން ނޫސް ބަޔާނެއް ނެރެފި އެވެ.
އެޗްއާރްސީއެމް އިން ނެރުނު ނޫސް ބަޔާނުގައި ބުނީ ބައެއް ސިޔާސީ ޕާޓީތަކުން ސިލްސިލާ ގޮތެއްގައި މާލޭގައި ބާއްވާ މުޒާހަރާތަކުގައި، އާންމު އިޖްތިމާއީ މިންގަނޑުތަކާ ހިލާފު ވާހަކަ ދައްކައި، އެވާހަކަތައް މީޑިޔާގެ ޒަރީއާއިން އާންމުވެ، އެކަމުގެ ސަބަބުން، އާންމުންގެ މެދުގައި ނަފުރަތު އުފައްދައި، ހަމަނުޖެހުމަށް ހިތްވަރުލިބޭ ގޮތަށް ވާހަކަ ދައްކަމުންދާ ކަމަށެވެ.
"ސިޔާސީ ޕާޓީތަކުން ބާއްވާ ޖަލްސާތަކާއި އެއްވުންތަކާއި، މީޑިއާ އަދި ސޯޝަލް މީޑިއާގެ ޒަރީޢާއިން ފާޅުކުރެވޭ ހިޔާލުތަކުގައިވެސް، މީހުންގެ މެދުގައި ނަފްރަތު އުފެއްދުމަށާއި، މުޖުތަމައުގެ ހަމަޖެހުމާއި މަސްލަހަތު ނަގާލުމަށް ގޮވާލުމުގެ އިތުރުން، އަނިޔާވެރި އަމަލުތައް ކުރުމަށް ހިތްވަރު ލިބޭގޮތަށް ފާޅުކުރެވޭ ހިޔާލުތަކަކީ، ގާނޫނުއަސާސީ އިން ދިވެހި ރައްޔިތުންނަށް ކަށަވަރުކޮށްދީފައިވާ ހިޔާލުފާޅުކުރުމުގެ މިނިވަންކަމުގެ ހައްގުގެ ރޫހާ ހިލާފު އަމަލުތަކެއްކަން ފާހަގަކުރަން،" އެޗްއާރްސީއެމް އިން ބުންޏެވެ.
ނަމަވެސް އަނިޔާވެރިވާން ހިތްވަރުދީ މުޒާހަރާ ކުރަމުންދާ މީހުން ކުރި އަމަލެއް އެ ކޮމިޝަނަކުން ނުބުނެ އެވެ. އަދި އެފަދަ މައްސަލައެއް ބަލަމުންދާ ކަމަކަށް ވެސް އެ ކޮމިޝަނުން ނުބުނެ އެވެ.
އިދިކޮޅުގެ ޕާޓީތަކުގެ އަމަލުތަކާ ގުޅިގެން ކަންބޮޑުވުން ފާޅުކޮށް އެޗްއާރްސީއެމް އިން ބުނީ ޕާޓީތަކުގެ އިސްވެރިން އެފަދަ އަމަލުތައް ނުކުރުމަށާއި ކަމާ ގުޅުންހުރި ދައުލަތުގެ މުއައްސަސާތަކުން އެކަމާ ގުޅިގެން އަޅަންޖެހޭ ހަރުދަނާ ފިޔަވަޅުތައް ގާނޫނީ އިމުގެ ތެރެއިން އެޅުމަށް ގޮވާލާ ކަމަށެވެ.
އެޗްއާރްސީއެމް އިން މި ނޫސްބަޔާން ނެރުނީ އިއްޔެ ބޭއްވި ނޫސްވެރިންގެ ބައްދަލުވުމުގައި މުޒާހަރާކުރުމުން ރައްޔިތުންނަށް އުނދަގޫވާ ކަމަށާއި މުޒާހަރާތަކުގައި ގާނޫނުތަކާއި ގާނޫނުއަސާސީ އާއި އިސްލާމީ ހުދޫދުތަކުގެ ތެރޭގައި އަމަލުތައް ބަހައްޓަން ޖެހޭ ކަމަށް މުއިއްޒު ވިދާޅުވިތާ 12 ގަޑިއިރުވެސް ނުވަނީސް އެވެ.
"ކޮންމެތަނެއްގައި ވާހަކަ ދެއްކިޔަސް އަޅުގަނޑުމެން ހަމަ ގާނޫނުތަކާއި ގާނޫނުއަސާސީ އާއި އިސްލާމީ ހުދޫދުތަކުގެ ތެރެއިން އަޅުގަނޑުމެންގެ އަމަލުތަކާއި އަޅުގަނޑުމެންގެ ބަހުރުވަ ހުންނަންޖެހޭނީ. އެކަކު އަނެކަކަށް ކުރަންޖެހޭ ރެސްޕެކްޓް ކުރަންޖެހޭނެ. އެއީކަންނޭނގޭ ރައްޔިތުން ބޭނުންވާ ގޮތަކީ،" މުއިއްޒު ވިދާޅުވި އެވެ.
"އަޅުގަނޑުމެން އެންމެންގެވެސް އެބަހުރި ހައްގުތަކެއް. ހިޔާލުފާޅުކުރުމުގެ ހައްގު އެބައޮތް. އަދި އެއްވެ އުޅުމުގެ ހައްގު އެބައޮތް. އެ ހައްގުގެ ބޭނުން ހިފަންވީ އަޅުގަނޑުމެންގެ ހުދޫދުތަކުގެ ތެރޭގައި. އެއީ އަޅުގަނޑުމެންގެ މާތްވެގެންވާ އިސްލާމްދީނާއި ގާނޫނުއަސާސީގެ ހުދޫދުތަކުގެ ތެރެއިން."
މިނިވަންކަމާއެކު ފިކުރުކުރުމާއި އިސްލާމްދީނުގެ އަސްލަކާ ހިލާފުނުވާ ގޮތެއްގެމަތީން، އެމީހެއްގެ ބުއްދިއަށް ފެންނަ ގޮތްތަކާއި، ހިޔާލުތައް ދުލާއި ގަލަމުން އަދި އެނޫން ވެސް ގޮތްގޮތަށް ފާޅުކުރުމުގެ މިނިވަންކަމަކީ ގާނޫނުއަސާސީން ކަށަވަރުކޮށްދީފައިވާ އަސާސީ ހައްގަކަށްވީ ނަމަވެސް، އެ ހައްގުގެ ބޭނުން ހިފަންވާނީ ވަކި ހުދޫދެއްގެ ތެރެއިން، އަނެކާގެ ހައްގުތަކަށް އިހްތިރާމް ކުޑަނުވާނެގޮތަށް ކަމަށް އެޗްއާރްސީއެމް އިން ބުންޏެވެ.
