ހުޅުމާލޭ ޖަލުގައި މީހަކު މަރުވެ, ހަމަނުޖެހުމެއް ހުޅުމާލޭގައި މިރޭ ހިނގައިފި އެވެ.
ހުޅުމާލޭގައި ހުންނަ ޖަލުގައި ހުރި ގައިދީއަކު މަރުވެގެން ކަރެކްޝަނަލް ސާވިސްގެ އޮފިސަރުން މިރޭ ވަނީ އޭނާގެ ހަށިގަނޑު ހުޅުމާލެ ހޮސްޕިޓަލަށް ގެންގޮސްފަ އެވެ.
އޭގެފަހުން އެ ސަރަހައްދަށް ދިޔަ އެމީހާގެ އާއިލާ އަދި ރައްޓެހިން ވަނީ ކަރެކްޝަންއާ ދެކޮޅަށް އަޑުއުފުލައި ހަމަނުޖެހުން ހިންގާފަ އެވެ. އެހެންވެ, މިހާރު އެ ސަރަހައްދުގައި ގިނަ އަދަދެއްގެ ފުލުހުން އަންނަނީ ހަރަކާތްތެރިވަމުންނެވެ.
ކަރެކްޝަނަލް ސާވިސްއިން މައުލޫމާތު ދިން ގޮތުގައި މިރޭ މަރުވީ ތިން އަހަރުގެެ ޖަލު ހުކުމެއް ތަންފީޒު ކުރަމުންދިޔަ ގދ. ވާދޫ/ ޖަނަވަރީގެ މުހައްމަދު އަސްލަމެވެ.
އޭނާ މިރޭ ގާތްގަނޑަކަށް 6:00 އެހާ އިރު ޔާޑު ސަރަހައްދުގައި އިށީދެގެން އިންދާ ކުއްލިއަކަށް ވެއްޓުމާ ގުޅިގެން އެމަޖެންސީ ހާލަތުގައި ހުޅުމާލެ ހޮސްޕިޓަލަށް ގެންދިޔަ ކަމާއި ހޮސްޕިޓަލުން ބެލުމަށްފަހު އޭނާ މިރޭ 20:23 ގައި މަރުވެފައިވާ ކަމަށް ވަނީ މައުލޫމާތު ދީފައިވާ ކަމަށް ކަރެކްޝަނަލްއިން ބުންޏެވެ.
ސާޅީސް އަހަރުގެ އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޒުކުރަމުންދިޔަ މީހެކެވެ. އޭނާއަކީ ބޮޑު ބައްޔަކަށް ބޭސްފަރުވާ ކުރަމުންދިޔަ މީހެއް ނޫނެވެ.
ކަރެކްޝަނަލްއިން ބުނި ގޮތުގައި އަސްލަމް ހުޅުމާލެ ހޮސްޕިޓަލަށް ގެންދިއުމާ ގުޅިގެން އެކަން އިންސްޕެކްޓާ އޮފް ކަރެކްޝަނަލް ސާވިސް، ފުލުހުން އަދި ހިއުމަން ރައިޓްސް ކޮމިޝަންއަށް އެންގި އެވެ.
އޭނާގެ ޖަނާޒާގެ ކަންތައްތައް އާއިލާއާ ގުޅިގެން ކުރިއަށް ގެންދާ ކަމަށް ވެސް ކަރެކްޝަނަލް ސާވިސްއިން ބުންޏެވެ.
އެ ސަރަހައްދުގައި ހުރި މަރުވި މީހާގެ އާއިލާ މީހަކު "އަދަދު"އަށް ބުނި ގޮތުގައި އަސްލަމަށް އަނިޔާވެފައިވާ ކަމަށް އާއިލާއަށް ބެލެވެ އެވެ. އެހެންވެ, ބަލައިދިޔަ ގޮތް ސާފު ކުރުމަށް އެ އާއިލާއިން ވަނީ އެދިފަ އެވެ.
އަދި, އަސްލަމް ހޮސްޕިޓަލަށް ގެނެސް އޭނާ މަރުވިކަން ވެސް އާއިލާއަށް ނާންގާ ލަސްކުރި ކަމަށް ވެސް އެ އާއިލާއިން ތުހުމަތުކުރެ އެވެ.
