ދިވެހިރާއްޖޭގައި އަންނަ މަހު ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕުގެ ރާއްޖޭގެ ޕްރޮމޯޝަނަލް ކެމްޕެއިން "މަގޭ މަހަލްދީބް" މިރޭ ލޯންޗްކޮށްފި އެވެ.
ގަލޮޅު ރަސްމީ ދަނޑުގައި މިރޭ ބޭއްވި ހާއްސަ ރަސްމިއްޔާތެއްގައި، ސާފް ޗެމްޕިއަންޝިޕްގެ ކެމްޕޭން ރަސްމީކޮށް ލޯންޗްކޮށްދެއްވީ ރައީސް އިބްރާހިމް މުހައްމަދު ސޯލިހެވެ. މި ރަސްމިއްޔާތުގައި ދައުލަތުގެ އެހެން ވުޒާރާތަކުގެ ވަޒީރުންނާއި، ކުންފުނިތަކުގެ ވެރިން ވެސް ބައިވެރިވެވަޑައިގަތެވެ.
މިއީ ރާއްޖޭގައި މި މުބާރާތް ބާއްވާ ދެ ވަނަ ފަހަރެވެ. މީގެ ކުރިން 2008 ގައި ބޭއްވި ސްރީ ލަންކާއާ ގުޅިގެންނެވެ. އެހެންވެ މިއީ ރާއްޖޭން މުބާރާތް ފުލީ ހޯސްޓްކުރާ ފުރަތަމަ ފަހަރެވެ،
މިރޭގެ ރަސްމިއްޔާތުގައި، ސާފް ޗެމްޕިއަންޝިޕްގެ ރަސްމީ ލޯގޯ އާއި މެސްކޮޓާއި، ތީމް ނަން އަދި ބްރޭންޑިން ވެސް ދައްކާލައިފަ އެވެ.
މި ފަހަރުގެ ކެމްޕޭންގެ ރަސްމީ ނަމަކީ "މަގޭ މަހަލްދީބް" އެެވެ. މިއީ ރާއްޖެ އަށް އަވަށްޓެރި ގައުމުތަކުން މުހާތަބުކުރާ ނަމެކެވެ. ދަނޑުގައި ސަޕޯޓަރުން ފޯރިއަރުވަން ބޭނުންކުރާނެ ޝިޔާރަކީ ވެސް މިއީ އެވެ. ސާފް ޗެމްޕިއަންޝިޕްގެ ބްރޭންޑިންގައި ބޭނުންކޮށްފައިވާ ޑިޒައިންތަކުގައި ހިމަނާފައިވަނީ ރާއްޖޭގެ ކަނޑުގެ ދިރުންތަކެވެ. ލޯގޯ ޑިޒައިންގައި ވެސް ބޭނުންކޮށްފައިވަނީ މަސްތަކެކެވެ.
މި އަހަރުގެ މުބާރާތުގެ މެސްކޮޓަށް ދީފައިވާ ނަމަކީ ރާއްޖޭގެ ގައުމީ ޓީމުގެ ވަނަމަކީ "ރެޑް ސްނެޕާ" އާ ގުޅުވައިގެން "ސްނެޕާ" އެވެ. ރަތް މަހެއް ރަމްޒުކޮށްދޭ "ސްނެޕާ" ވެސް ވަނީ މިރޭގެ ރަސްމިއްޔާތުގައި ދައްކާލައިފަ އެވެ.
މިރޭގެ ރަސްމިއްޔާތުގައި މި މުބާރާތުގެ ޕާޓްނަރުން އިއުލާންކޮށް، ޕާޓްނަރުންނަށް ވަނީ ހަނދާނީ ފިލާ ހަވާލުކޮށްފަ އެވެ.
މުބާރާތުގެ ކޯ ސްޕޮންސާ އަކީ އެސްޓީއޯ އެވެ. ޑިޖިޓަލް ޕާޓްނަރަކީ ދިރާގެެވެ. މެޑިކަލް ޕާޓްނަރަކީ އޭޑީކޭ ހޮސްޕިޓަލް އެވެ. އިންޝުއަރަންސް ޕާޓްނަރަކީ އެލައިޑެވެ. އޮންލައިން އެންޑް ޕީއާރް ޕާޓްނަރަކީ "އަދަދު" އެވެ.
މީގެ އިތުރުން 2008 ވަނަ އަހަރާއި 2018 ވަނަ އަހަރުގެ ސާފް ޗެމްޕިއަންޝިޕް ރާއްޖެ ކާމިޔާބުކުރުމާ ގުޅޭ ގޮތުން ތަޖުރިބާކާރު ކުޅިވަރު ނޫސްވެރިޔާ އަބްދުﷲ އަޒްމީން ތައްޔާރުކޮށްފައިވާ ފޮތެއް ވެސް ވަނީ ލޯންޗްކޮށްފަ އެވެ.
މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ހަމަޖެހިފައިވަނީ އޮކްޓޯބަރު މަހުގެ 1 - 15 އަށެވެ. މި އަހަރުގެ މުބާރާތުގައި ވާދަކުރާނީ ރާއްޖޭގެ އިތުރުން އިންޑިއާ، ލަންކާ، ބަންގްލަދޭޝް އަދި ނޭޕާލް އެވެ. ފައިނަލަށް ހޮވޭނީ ލީގު އުސޫލުން އެއް ބުރު ކުޅެ އެންމެ ގިނަ ޕޮއިންޓް ހޯދާ ދެ ޓީމެވެ.
މި މުބާރާތް ވެގެންދާނީ ރާއްޖޭން ހޯސްޓްކުރާ ބައިނަލްއަގްވާމީ ހަތަރު ވަނަ މުބާރާތަށެވެ. އަނެއް ތިން މުބާރާތަކީ ސާފް ޗެމްޕިއަންޝިޕުގެ އިތުރުން 2000 ވަނަ އަހަރުގެ ގޯލްޑަން ޖުބިލީ މުބާރާތާއި 2014 ވަނަ އަހަރުގެ އޭއެފްސީ ޗެލެންޖް ކަޕެވެ.
