ރ. އަލިފުށީގެ ފަޅު ހިއްކައިގެން އަގުބޮޑުކޮށް އެއާޕޯޓެއް އެޅުމަށް ކުއްލިއަކަށް ސަރުކާރުން ނިންމި ނިންމުމަށް ޖަވާބު ދެއްވަން ޕްލޭނިން މިނިސްޓަރު މުހައްމަދު އަސްލަމް މިއަދު ދެކޮޅު ހައްދަވައިފި އެވެ.
ރ. އަތޮޅަށް ދެ ވަނަ އެއާޕޯޓެއް ބޭނުންވާ ވާހަކަ ކުރީ ސަރުކާރާއި މި ސަރުކާރުން ވެސް ދައްކާފައިވެ އެވެ. ރައީސް އަބްދުﷲ ޔާމީންގެ ވެރިކަމުގައި ރ. ފައިނުގައި އެއާޕޯޓެއް ތަރައްގީކުރަން ނިންމި އެވެ. ނަމަވެސް، އެއްވެސް ހިސާބެއްގައި އަލިފުށީގެ ނަން އައިސްފައެއް ނެތެވެ.
ޕްލޭނިން މިނިސްޓްރީން މި މަސައްކަތް އެމްޓީސީސީއާ ހަވާލުކުރީ 451 މިލިއަން ރުފިޔާއަށެވެ. އަދި އެއްބަސްވުމުގެ ދަށުން 750 ދުވަހުގެ (ގާތްގަނޑަކަށް ދެ އަހަރު) ތެރޭގައި އެ މަސައްކަތް ނިންމަން ޖެހެ އެވެ.
މިހާރު ވެސް ރ. އިފުރުގައި އެއާޕޯޓެއް އޮތް ނަމަވެސް އެ އަތޮޅުގެ ބައެއް ރަށްރަށާ މި އެއާޕޯޓު މާދުރުކަމަށް އެ ރަށްރަށުގެ ރައްޔިތުން އައީ ބުނަމުންނެވެ. އަދި އިތުރު އެއާޕޯޓެއް އަޅާނެ ކަމަށް ސަރުކާރުން ވައުދުވީ ވެސް ރައްޔިތުންގެ އެ ކަންބޮޑުވުންތަކާ ގުޅިގެންނެވެ.
ށ. އަތޮޅުގެ ހަތަރު ރަށެއްގެ ފެނާއި ނަރުދަމާގެ މަސައްކަތް ނުފެށި ލަސްވާތީ ކަނޑިތީމު ދާއިރާގެ މެމްބަރު އަބްދުﷲ ޝަހީމް އަބްދުލްހަކީމް ކުރެއްވި ސުވާލަށްފަހު، އިތުރު ސުވާލު ކުރަން ހުޅުވައިލި ފުރުސަތުގައި މަޑުއްވަރީ ދާއިރާގެ އިދިކޮޅު މެމްބަރު އާދަމް ޝަރީފް ވަނީ އަލިފުށީގައި އެއާޕޯޓެއް އަޅަން ކުއްލިއަކަށް ނިންމި ނިންމުމާ ގުޅޭގޮތުން ސުވާލު ކުރައްވައިފަ އެވެ.
އާދަމް ޝަރީފް އެއްސެވީ އަލިފުށީގެ ބަޖެޓުގައި ނެތް ކަމެއް ކުއްލިއަކަށް ފެށުމަކީ އެ ރަށުގެ ރައްޔިތުންނަށް "ލަނޑަކަށް" ނުވާނެތޯ އެވެ.
"އަނެއް ވާހަކައަކީ ރ. އަތޮޅު ދެކުނުގަ 12،000 މީހުންނާއި 15 ޕްލަސް ތިން ރިސޯޓު ހަމަޖެހިފައިވާއިރު، ދެކުނުގަ އެއާޕޯޓެއް ރ. އަތޮޅުގައި ނާޅުއްވާނެތޯ؟" އޭނާ ސުވާލު ކުރެއްވި އެވެ.
އަދި އަލިފުށީގައި އެއާޕޯޓު އަޅަން ނިންމުމުން އަތޮޅުގެ ރަށްތަކުގެ މެދުގައި ބޮޑެތި ހިލާފުތަކެއް އުފެދިފައިވާއިރު އެކަމުގައި މިނިސްޓަރު ދެއްވާ ޖަސްޓިފިކޭޝަނަކީ ކޮބައިތޯ އާދަމް ޝަރީފް އެއްސެވި އެވެ.
އެ ސުވާލާ ގުޅިގެން އަސްލަމް ވިދާޅުވީ މިއަދުގެ ޖަވާބުތައް ހިފަހައްޓަވަމުން ގެންދަވަނީ ރަސްމީ ސުވާލު ވެސް އަމާޒުވި ފެނާއި ނަރުދަމާގެ މަޝްރޫއުތަކާ ގުޅޭގޮތުން ކަމަށެވެ.
"އެހެން މެމްބަރުންގެ ސުވާލުތަކަށް ވެސް އިންސާފުވެރިކަމާއެކު ގެންދިއުމަށްޓަކައި މެމްބަރު ކުރެއްވި ސުވާލަށް ޖަވާބެއް ނާރުވާނަން މިއަދަކު،" އެ ސުވާލަށް ޖަވާބު ދެއްވަން ދެކޮޅު ހައްދަވަމުން އަސްލަމް ވިދާޅުވި އެވެ.
ކޮންމެ ރަށަކުން ފުރައިގެން 20 މިނެޓުން އެއާޕޯޓަކަށް ދެވޭ ސިޔާސަތުގެ މައްޗަށް ހިސާބު ޖަހާއިރު، އަލިފުށިން ފުރައިގެން، މިހާރު ވެސް އެ އަތޮޅުގައި އޮތް އިފުރު އެއާޕޯޓަށް 20 މިނެޓުގެ ދަތުރަކުން ދެވެ އެވެ. ނަމަވެސް އަތޮޅުގެ ދެކުނު ބިތުގައި ރަށްރަށުން ފުރައިގެން އިފުރަށް 20 މިނެޓުން އެއާޕޯޓަކަށް ނުދެވެ އެވެ. އެހެންވެ، އަތޮޅުގެ އެންމެ އުތުރުގައި، ވަކިން އޮތް އަލިފުށީގައި އެއާޕޯޓެއް ހެދިޔަސް، ސަރުކާރުގެ ސިޔާސަތުގެ މިންގަނޑަށް ނުފެތޭނެ އެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން 2021 ވަނަ އަހަރަށް އަންދާޒާކޮށް ނެރުނު ޕްރޮޖެކްޝަންސްތަކަށް ބަލާއިރު، ރ. އަތޮޅުގެ ދެކުނު ބިތުގައިވާ ނުވަ ރަށުގެ އާބާދީ ގާތްގަނޑަކަށް 12،000 އެވެ. އުތުރު ބިތުގައި އިފުރު އަދި އަލިފުށި ހިމެނޭ ގޮތަށް މީހުން ދިރިއުޅޭ ރަށްރަށުގެ އާބާދީ އުޅެނީ 7،000 އާ ގާތްކުރާ ވަރުގަ އެވެ. އެ އަތޮޅުގައި ޖުމްލަ 13 ރިސޯޓު އޮތްއިރު، އޭގެ ތެރެއިން ގިނަ ރިސޯޓުތަކެއް އޮތީ ދެކުނު ބިތުގަ އެވެ.
