އަންނަ ޖޫން މަހުގެ ހަވަނަ ދުވަހު ބާއްވާ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި އެންމެ ބޮޑު ދެ ޕާޓީން ވާދަކުރާ ކެންޑިޑޭޓުން ކަށަވަރުވެއްޖެ އެވެ.
އެ ދާއިރާގެ ގޮނޑި ހުސްވީ އެ ގޮނޑި ފުރުއްވަމުން ގެންދެވި މުހައްމަދު ސިނާނު (ސިނާ) ގެ މެންބަރުކަމުގެ ޝަރުތުހަމަނުވެގެން މަގާމު ގެއްލުމުންނެވެ. ސާބިތު ދަރަންޏެއް އޮވެ އެ ދަރަންޏާ އެއްގޮތަށް ފައިސާ ދައްކަމުންނުދިޔުމުން ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ނިސަބަތްވާ ސިނާނުގެ ގޮނޑި ގެއްލިފައިވާ ކަމަށް ސުޕްރީމް ކޯޓުން ހުކުމް ކުރީ އެޕްރީލް 12، ގަ އެވެ.
އެހެން ނަމަވެސް، ސިނާނު ވަނީ އިއްޔެ ބޭއްވި ޕީއެންސީގެ ޕްރައިމަރީ ކާމިޔާބުކޮށް އަނެއްކާ ވެސް ގޮނޑިއަށް ވާދަކުރުމަށް އެ ޕާޓީގެ ޓިކެޓު ކަށަވަރު ކުރައްވާފަ އެވެ. ސިނާނަށް 226 ވޯޓު ލިބުނުއިރު އޭނާއާ ވާދަ ކުރެއްވި އަހުމަދު ސައީދަށް ލިބުނީ 187 ވޯޯޓެވެ.
އިދިކޮޅު އެންމެ ބޮޑު ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޓިކެޓަށް އެހެން އެއްވެސް މީހަކު ވާދަނުކުރުމުން ޓިކެޓް ލިބުނީ ކުރީގެ މޭޔަރު އަބްދުﷲ ސޯދިގު (ސޯބެ) އަށެވެ. އައްޑޫގެ މޭޔަރުގެ މަގާމުގައި ޖެހިޖެހިގެން ތިން ދައުރު ހުންނެވި ސޯބެ ޕްރައިމަރީގައި ވާދަ ކުރައްވަން ނިންމެވި ހިސާބުން ވެސް ވަރަށް ގިނަ ބައެއްގެ ތާއިދު އޭނާއަށް ލިބުނެވެ.
އެޕްރީލް 2024، ގައި ބޭއްވި މަޖިލިސް އިންތިހާބުގައި ސިނާނު ގޮނޑި ކާމިޔާބު ކުރެއްވީ 1079 ވޯޓާއެކު 39 ޕަސެންޓުންނެވެ. ސިނާނު ވާދަ ކުރެއްވީި ރައްޔިތުންގެ މަޖިލީހުގެ ރައީސްގެ މަގާމުގައި އަދި ރިޔާސީ އިންތިހާބުގައި އިދިކޮޅު އެމްޑީޕީގެ ރަނިންމޭޓަކަށް ވެސް ހުންނެވި މުހައްމަދު އަސްލަމްއާ އެވެ. އަސްލަމްއަށް ލިބިވަޑައިގަތީ 838 ވޯޓެވެ.
2011 ވަނަ އަހަރު ސޯބެ އެންމެ ފުރަތަމަ އައްޑޫ ސިޓީ ކައުންސިލަށް އިންތިހާބުވެވަޑައިގަތީ ވެސް ހިތަދޫ އުތުރު ދާއިރާއިންނެވެ. އެއަށް ފަހު ޖެހިގެން އައި ދެ އިންތިހާބުގައި ވެސް ތަނަވަސް އަގުލަބިއްޔަތަކުން އެ ގޮނޑި ސޯބެ ދިފާއުކުރެއްވި އެވެ. 2014 ވަނަ އަހަރު 1،147 ވޯޓު ސޯބެއަށް ލިބިވަޑައިގެންނެވިއިރު 2017 ވަނަ އަހަރު 1،376 ވޯޓު އޭނާ ކާމިޔާބު ކުރެއްވި އެވެ.
ނަވާރަވަނަ މަޖިލީހުގައި ދެ ބައި-އިލެކްޝަނެއް ބޭއްވި އެވެ. އެއީ ކޮމަންޑޫ ދާއިރާ އާއި މާލެ އަތޮޅު ގުރައިދޫ ދާއިރާގެ މެންބަރުކަން ކުރައްވަމުން ގެންދެވި ބޭފުޅުން ނިޔާވުމުން ބޭއްވި ބައި-އިލެކްޝަންތަކެކެވެ. އެ ދެ އިންތިހާބު ވެސް ކާމިޔާބުކުރީ އޭރު ވެރިކަމުގައި އޮތް އެމްޑީޕީ އެވެ.
އެ ދެ އިންތިހާބު ކާމިޔާބު ކުރުމަށް އެމްޑީޕީން ބޮޑު ހަރަދުތަކެއް ކުރި އެވެ. އިންތިހާބު ކާމިޔާބު ކުރުމަށް ދައުލަތުގެ ވަސީލަތްތައް ބޭނުންކޮށް ނުފޫޒު ފޯރުވުމުން އޭރު އިދިކޮޅުގައި ތިބި ފަރާތްތަކުން އެމްޑީޕީއަށް ވަރަށް ބޮޑަށް ފާޑުކިޔުުން ވެސް އަމާޒުކުރި އެވެ. ބޮޑު ހަރަދުތަކެއް ކޮށްގެން ހޮވި ދެ މެންބަރުން ވެސް އެމްޑީޕީގެ ވެރިކަން ނިމުމާއެކު ޕީއެންސީއާ ގުޅުނެވެ.
މިފަހަރުގެ ލޯކަލް ކައުންސިލް އިންތިހާބާ ދިމާކޮށް މި ސަރުކާރުން ވަރަށް ބޮޑަށް ހޭދަކުރި އެވެ. ނަމަވެސް، ނަތީޖާއިން އެ ހޭދައިގެ އަސަރު ފެނިފައެއް ނުވެ އެވެ. ބެލެވޭ ގޮތުގައި ހިތަދޫ ގޮނޑި ނެގުމަށް މި ސަރުކާރުން ވެސް ބޮޑުކޮށް ހޭދަކުރާނެ އެވެ.
