މަނީ ލޯންޑްރިންގެ ކުށް ސާބިތުވެ، ކުރީގެ ރައީސް އަބްދުﷲ ޔާމީންގެ މައްޗަށް ކުރި ހުކުމާ ގުޅޭގޮތުން، އެ މައްސަލަ ބެލި ބެންޗުގައި އިންނެވި ފަނޑިޔާރަކު ދެއްކެވި ވާހަކައެއް ކަމަށް ބުނާ އޯޑިއޯއެއް ލީކުވެފައިވާއިރު، އެކަން ތަހުގީގުކޮށް ދިނުމަށް ކަމާބެހޭ އިދާރާތަކަށް ހުށަހަޅާނެކަމަށް އިދިކޮޅުން ބުނެފި އެވެ.
އެ އޯޑިއޯއަކީ ޔާމީންގެ މައްސަލަ ބެލި ފަސް ފަނޑިޔާރުންގެ ބެންޗުގައި އިންނެވި ގާޒީ ހުސެއިން ފާއިޒް ރަޝާދު އޭނާގެ ރަހުމަތްތެރިއަކާ އެކު ދެއްކި ވާހަކައެއް ކަމުގެ ތުހުމަތު ދަނީ ކުރެވެމުންނެވެ.
އެގޮތުން، އެ އޯޑިއޯގައި ފާއިޒް ވިދާޅުވެފައިވަނީ ރަހީނު ކުރެވޭނެ ބައިވަރު ގޮތްތައް ހުންނާނެ ކަމަށެވެ.
އޭނާ ރަހީނު ނުކުރި ނަމަވެސް އޭނާގެ އަނބިމީހާ ނުވަތަ ގާތްމީހަކު ރަހީނުކޮށްގެން ވެސް އަމަލެއް ހިންގިދާނެ ކަމަށް ޔާމީންގެ ޝަރީއަތާ ހަވާލާދީ އެ ރިކޯޑިންގައި ވިދާޅުވެފައި ވެ އެވެ.
އެ އޯޑިއޯއާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި އިދިކޮޅު ޕީޕީއެމް/ޕީއެންސީ ކޯލިޝަނުގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވީ، ޔާމީނަށް ހުކުމްކުރީ ބޭއިންސާފުން، ސަރުކާރުން ނުފޫޒު ފޯރުވައިގެންކަން އެ އޯޑިއޯއިން ހާމަވެފައިވާ ކަމަށެވެ.
އަދި ޔާމީނަށް ހުކުމްކުރީ ނުހައްގުންކަމަށް އިދިކޮޅުން ތަކުރާރުކޮށް ދައްކަމުން އައި ވާހަކަތަކަކީ ވެސް، ފަނޑިޔާރެއްގެ އަމިއްލަ އިއުތިރާފުން ހަގީގަތެއްކަން ސާބިތުވެފައިވާ ކަމަށެވެ.
"ފަނޑިޔާރެއްގެ އަމިއްލަ އިއުތިރާފުން މި އޮތީ އެނގި ހާމަވެފަ، ރައީސް ޔާމީނަށް ކުރީ އިންސާފުވެރި ހުކުމެއް ނޫން ކަމަށް،" އޭނާ ވިދާޅުވި އެވެ.
އެއާއެކު އެ އޯޑިއޯ ތަހުގީގުކޮށް ދިނުމަށް ޕާޓީގެ އިތުރުން ޔާމީންގެ ގާނޫނީ ވަކީލުންގެ ޓީމުގެ ފަރާތުން ވެސް ކަމާބެހޭ އިދާރާތަކަށް ހުށަހަޅުއްވާނެކަމަށް އަބްދުއްރަހީމް ވިދާޅުވި އެވެ.
އޭނާ އިތުރަށް ވިދާޅުވި ގޮތުގައި، މީހުން ރަހީނުކޮށްގެން ޝަރުއީ ނިޒާމަށް ސަރުކާރުން ނުފޫޒު ފޯރުވުމަކީ މުޅި ގައުމު ކަންބޮޑުވާންޖެހޭ ކަމެކެވެ.
"މިއީ ރައްޔިތުން މަގުމައްޗަށް ނުކުންނަންޖެހޭ ވަގުތު،" އެފަދަ ހަރަކާތަކަށް ނުކުންނަން އުޅޭ ކަމުގެ ނުސީދާ އިޝާރާތެއް ވެސް ދެއްވަމުން އޭނާ ވިދާޅުވި އެވެ.
ރައީސް ޔާމީނުގެ މައްސަލަ ކްރިމިނަލް ކޯޓުގައި ފުރަތަމަ ބެއްލެވި އޭރުގެ އިސް ގާޒީ އަހުމަދު ހައިލަމް އެންމެ ފަހު ވަގުތު ސަސްޕެންޑު ކުރުމަށްފަހު އެ މައްސަލަ ދެން ބެއްލެވީ ފަސް ގާޒީންގެ ބެންޗަކުންނެވެ.
އެ ބެންޗުގައި ފާއިޒުގެ އިތުރުން ތިއްބެވީ ގާޒީ އަލީ ރަޝީދު ހުސެއިނާއި، ގާޒީ މުހައްމަދު ސަމީރާއި ގާޒީ އަހުމަދު ޝަކީލާއި ގާޒީ އަލީ އާދަމެވެ.
އެ ފަސް ގާޒީންގެ އިއްތިފާގުން ޔާމީންގެ މައްޗަށް ފަސް އަހަރުގެ ޖަލު ހުކުމެއް އިއްވީ މަނީލޯންޑްރިންގެ ކުށް ސާބިތުވުމާ ގުޅިގެންނެވެ. އެއީ، އެމްއެމްޕީއާރްސީއަށް ލިބެންޖެހޭ ފައިސާތަކެއް އެސްއޯއެފްއިން ޔާމީންގެ އެކައުންޓަށް ޖަމާކުރުމުން، އެ ފައިސާއިން ފައިދާ ހޯދާފައިވާ މައްސަލައިގަ އެވެ.
އޭގެ އިތުރުން ވެސް ރައީސް ޔާމީންގެ މައްޗަށް ވަނީ ލޯންޑްރިންގެ އިތުރު ދައުވާއަކާއި ރިޝްވަތު ހިފުމުގެ ދައުވާއެއް ވެސް އުފުލައިފަ އެވެ.
