ރާއްޖޭގެ ސްޕޯޓްސް އިވެންޓް މެނޭޖްމަންޓްކުންފުނި، ޓެކާސް އިން، ރާއްޖޭގެ ރިކްރިއޭޝަނަލް ކުޅިވަރުގެ މަންޒަރު ބަދަލުކޮށްލާނެ ފަދަ ބޮޑު ފުޓްސަލް މުބާރާތެއް، "ޓެކާސް މައިލޯ ޗެމްޕިއަންޝިޕް" ގެ ނަމުގައި މިއަދު ލޯންޗުކޮށްފި އެވެ.
ހޮޓެލް ޖެންގައި މިއަދު ހަވީރު ބޭއްވި ރަސްމިއްޔާތެއްގައި މުބާރާތް އިފްތިތާހުކޮށްދެއްވީ ސްޕޯޓްސް މިނިސްޓަރުގެ ނާއިބް މުހައްމަދު އަޒްމީލް އެވެ. މި ރަސްމިއްޔާތުގައި ވަނީ މުބާރާތުގެ ސްޕޮންސަރުންނާ އެކު ސޮއިކޮށްފަ އެވެ.
މި ޗެމްޕިއަންޝިޕުގައި ހިމެނޭ މާލެ ސަރަހައްދާއި ރިޒޯޓްތަކާއި ރަށްތަކަށް ހުޅުވާލައިގެން ބާއްވާ ތަފާތު ތިން މުބާރާތެކެވެ. އެގޮތުން މާލެ ސަރަހައްދަށް ހާއްސަކޮށްގެން ބާއްވާ "ގްރޭޓާ މާލެ ކަޕް" ގެ ރަޖިސްޓްރޭޝަން އަންނަ މަހުގެ 1 ވަނަ ދުވަހު ހުޅުވާލައި، އެޗްޕީއޭ އިން ހުއްދަދިންހާ އަވަހަކަށް ގަލޮޅު ފުޓްސަލް ކޯޓުގައި ފަށާނެ އެވެ. އެ މުބާރާތުގައި 32 ޓީމު ބައިވެރިކުރާނެ އެވެ.
ޓެކާސް މައިލޯ ޗެމްޕިއަންޝިޕުގެ ޓްރޮފީ. --ފޮޓޯ: ހުސެއިން ޝަޔާހު/ އަދަދު
އެއަށް ފަހު އޮންނަ "ޓެކާސް ރިސޯޓް ކަޕް" ގައި ރާއްޖޭގެ 60 ރިސޯޓް ބައިވެރިކުރާނެ އެވެ. އަދި "ޓެކާސް މޯލްޑިވްސް ކަޕް" ގެ ނަމުގައި ރަށްރަށަށް ހުޅުވާލައިގެން ބާއްވާ މުބާރާތް އޮންނާނީ އަތޮޅު ފެންވަރުން ފެށިގެން މުޅި ރާއްޖޭން ޗެމްޕިއަނެއް ހޮވާ ގޮތަށެވެ.
ސްޕޯޓްސް މިނިސްޓްރީ އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެންޑޯސްކޮށްފައިވާ މި މުބާރާތުގެ ޕްލެޓިނަމް ސްޕޮންސަރުގެ ގޮތުގައި ޓައިޓަލް ނަގާފައިވަނީ ރާއްޖޭގެ ކުޅިވަރަށް އަބަދަށްފެހި "މައިލޯ" އެވެ. ގޯލްޑް ޕާޓްނަރުންނަކީ އުރީދޫ މޯލްޑިވްސް، އަލް ޝާލީ މެރިން މޯލްޑިވްސް، އެމްޓީސީސީ، ވެލިގާ ހާޑްވެއާ، މޯލްޑިވްސް ގޭސް، މޯލްޑިވިއަން، ވެލްވޮލިން، މީޑިއާނެޓް އަދި ޕާސަނަލް ކޮމްޕިއުޓާސް އެވެ.
ސިލްވާ ޕާޓްނަރުންނަކީ ސަން ފްރަންޓް، ސޮނީ ސްޕޯޓްސް، ކޮޕިއާ ޕްލަސް، ލިންކް ސާވް، ޕްރިންޓް ލެބް، ދިވެހި އިންޝުއަރެންސް އަދި އިވެންޓް މޯލްޑިވްސް އެވެ. މުބާރާތުގެ މީޑިއާ ޕާޓްނަރަކީ "އަދަދު" އެވެ. ރާއްޖޭގެ ރީތިކަން ސިފަވާ ގޮތަށް ހަދާފައިވާ މުބާރާތުގެ ޓްރޮފީ ފަރުމާކުރީ ރާއްޖޭގެ ހުނަރުވެރި ޑިޒައިނަރު ހުސެއިން އަތީކް (އަޓިއްކޭ) އެވެ.
ޓެކާސްގެ ހިންގުންތެރިޔާ ޑރ. ސަނީ އުމަރު ވިދާޅުވީ ރާއްޖޭގެ ރަށްރަށުގައި ރީތި ފުޓްސަލް ދަނޑުތަކެއް އަޅާފައި އެބަހުރި ކަމަށާއި ބޭނުންވަނީ، އެ ދަނޑުތަކުގެ ރީތިކަމާ އެކު ރާއްޖޭގެ ކުޅުންތެރިންގެ ހުނަރުވެރިކަމާއި ދިވެހިންގެ އެއްބައިވަންތަކަން ދައްކާލަން ކަމަށެވެ.
އަދަދުގެ މެނޭޖިން އެޑިޓަރު މުހައްމަދު ހަމްދޫން (ކ) އާއި ޓެކާސްގެ ޑރ. ސަނީ އެއްބަސްވުން ދައްކާލަނީ. --ފޮޓޯ: ހުސެއިން ޝަޔާހު/ އަދަދު
"މިހާރު ވެސް މުބާރާތްތައް އެބަބާއްވާ. އެކަމަކު ކުޅުންތެރިންގެ ހުނަރު ބަލާލުމުގެ ފުރުސަތެއް ނުލިބޭ. އަޅުގަނޑުމެން ހުރިހާ މެޗެއް، ސޯޝަލް މީޑިއާ އާއި މީޑިއާނެޓުގެ އައިސްޓީވީން ލައިވްކުރާނަން،" މެލޭޝިއާގައި "ރާއްޖެ ކަޕް" ގެ ނަމުގައި ފޯރިގަދަ ފުޓްސަލް މުބާރާތްތަކެއް އިންތިޒާމްކޮށްފައިވާ ސަނީ ވިދާޅުވި އެވެ.
މީގެ އިތުރުން ޓެކާސްގެ ވެބްސައިޓް ފަރުމާކޮށްފައިވަނީ ޓީމުތައް އޮންލައިންކޮށް ރަޖިސްޓްރީވެވޭ ގޮތަށާއި ހުރިހާ ސްޓެޓިސްޓިކްސްއެއް ފެންނަ ގޮތަށެވެ. އޭގެ ސަބަބުން މުބާރާތަށް ކުޅުންތެރިންނާއި އާއްމުންގެ ޝައުގުވެރިކަން ބޮޑުވާނެ ކަމަށް ސަނީ ދެކެ އެވެ.
ފުޓްސަލް އަކީ ރާއްޖޭގައި މިހާރު އެންމެ މަގުބޫލު އެއް ކުޅިވަރެވެ. އެގޮތުން މާލެ އާއި ރިސޯޓްތަކާއި ރަށްރަށުގައި އަގުބޮޑު މުބާރާތްތައް ބާއްވަމުން އަންނައިރު އެ މުބާރާތްތަތަކަށް ސްޕޮންސަރުން ކުރާ ހޭދަ އާއި ކުޅުންތެރިން ގަތުމަށް ކުރާ ހޭދަ ވަރަށް ބޮޑެވެ. އެހެންވެ ނިސްބަތުން ބަލާއިރު ފުޓްސަލް އަކީ ރާއްޖޭގެ މިހާރު އެންމެ އަގުބޮޑު އެއް ކުޅިވަރެވެ.
