ވިޔަފާރިކުރަން ރާއްޖެ އަންނަ ބިދޭސީންނަށް ދޫކުރާ ބިޒްނަސް ވިސާއަށް އިމިގްރޭޝަން ކައުންޓަރުގައި އެދެވޭ އުސޫލު ބަދަލުކޮށް ބިޒްނަސް ވިސާ ގަވާއިދު މިއަދު ގެޒެޓުކޮށްފި އެވެ.
އިކޮނޮމިކް މިނިސްޓްރީން ގެޒެޓުކުރި ގަވާއިދުގައި ބުނާ ގޮތުން، މިއަދުން ފެށިގެން ބިޒްނަސް ވިސާ އެޕްލިކޭޝަން ފޯމު ބަލައިގަންނާނީ ހަމައެކަނި ބިޒްނަސް ޕޯޓަލްއިންނެވެ.
އަދި އިމިގްރޭޝަން ކޮންޓްރޯލާއަށް ވިސާ ދޫކުރެވެނީ، ބިޒްނަސް ވިސާއަށް އެދި ހުށަހަޅާ މީހުންނަށް ވިސާ ދޭން ރަޖިސްޓްރާ އޮފް ބިޒްނަސް ހުއްދަ ދިނުމުންނެވެ.
ކުރިން އުސޫލު އޮންނަ ގޮތުން ރާއްޖެ އަންނަން ބޭނުންވާ ބިދޭސީންނަށް އިމިގްރޭޝަން ކައުންޓަރުން ބިޒްނަސް ވިސާއަށް އެދެވެ އެވެ. މީގެ ސަބަބުން އޮޅުވާލުމާއި މަކަރު ހެދުމުގެ މައްސަލަތައް ފާހަގަވާކަމަށް އިމިގްރޭޝަނުން ބުނެ ވަނީ ކަންބޮޑުވުން ފާޅުކޮށްފަ އެވެ.
އެގޮތުން ރައްޔިތުންގެ މަޖިލިހުގެ އިގުތިސޯދީ ކޮމިޓީގައި އިމިގްރޭޝަން ކޮންޓްރޯލާ މުހައްމަދު އަހުމަދު (ހަނަފީ) ވިދާޅުވީ، ވާކް ވިސާގައި އެތެރެވުމުގެ ބަދަލުގައި ބިޒްނަސް ވިސާއަށް އެދޭ ކަމަށެވެ. އަދި ވިދާޅުވީ، ވާކް ވިސާއަށް ވުރެ ފަސޭހައިން ބިޒްނަސް ވިސާ ލިބޭތީ ގިނަ ބަޔަކު އެކަމުގައި އޮޅުވާލަން މަސައްކަތްކުރާ ކަމަށެވެ.
މި ގަވާއިދާއެކު މިފަދަ މައްސަލަތަކުގައި އޮޅުވާލުން ވަރަށް ބޮޑުތަނުން މަދުކުރެވޭނެ ކަމަށް އިމިގްރޭޝަނުން ބުނެ އެވެ. ހާއްސަކޮށް މި ވިސާއަށް ހުށަހަޅަން ޖެހޭ ލިޔެކިޔުންތަކުގެ ސަބަބުން ބިޒްނަސް ވިސާގެ ސައްހަކަން ކަށަވަރު ކުރެވެނޭ އެވެ. އަދި ސައްހަ ނޫން ގޮތުގައި އެތެރެވެފައިވާ ކަން ކަށަވަރުވާ ހާލަތުގައި އެ މީހެއްގެ ވިސާ ބާތިލު ވެސް ކުރެވެ އެވެ.
މިގޮތުން ގަވާއިދާ ހިލާފުވެގެން ބިޒްނަސް ވިސާ ބާތިލުކުރާ މީހުންނަށް އަލުން އެ ވިސާއަށް އެދި ހުށަހެޅެނީ ފަސް އަހަރު ފަހުންނެވެ. އަދި ވިސާ ބާތިލުކުރާ ފަހުން ނުވަތަ މުއްދަތު ހަމަވާ ފަހުން ރާއްޖޭގައި ގަވާއިދާ ހިލާފަށް އުޅޭ މީހުން ޑީޕޯޓްކުރުމުގެ ބާރު އިމިގްރޭޝަނަށް ލިބެ އެވެ.
ބިޒްނަސް ވިސާއަކީ ރާއްޖެއަށް ވަޒީފާ އަދާކުރަން އަންނަ ބިދޭސީން ނޫން އެހެން ބިދޭސީންނަށް ދޫކުރާ ވިސާއެކެވެ. މި ވިސާގައި ރާއްޖޭގައި އުޅެވޭނީ ކޮންމަ މީލާދީ އަހަރެއްގެ ތެރޭގައި ގިނަވެގެން ތިން މަސް ދުވަހަށެވެ.
