ދެކުނު އޭޝިއާ ގައުމުތަކުން ޓްރާންސިޓް ކަރަންޓީނު މަންޒިލެއްގެ ގޮތުގައި ރާއްޖެ އަންނަ ޓޫރިސްޓުން މީހުން ދިރިއުޅޭ ގޭގޭގައި ބޭތިއްބުން ހުއްޓުވާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައީސް މިހެން ވިދާޅުވީ، ދެކުނު އޭޝިއާ ގައުމުތަކުން ރާއްޖެއަށް ކަރަންޓީނު މުއްދަތު ފުރިހަމަކުރަން އަންނަ ޓޫރިސްޓުން މީހުން އުޅޭ ގެތަކުގައި ބައިތިއްބާ މައްސަލަތައް ބޮޑުވެފައިވާ ދަނޑިވަޅެއްގަ އެވެ. މިހެން އަންނަ މީހުން ރާއްޖެ އެތެރެވަނީ ކޮންމެވެސް ގެސްޓްހައުސްއެއް ނޫނީ ހޮޓަލެއް ނުވަތަ ރިސޯޓެއްގެ ނަމުގައި ފޭކް ބުކިންއެއް ހައްދައިގެންނެވެ.
މިހާރު ތ. އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި އޮމަދޫގައި ހުންނަވާ ރައީސް ވިދާޅުވީ، ކަރަންޓީނު މަންޒިލެއްގެ ގޮތުގައި ރާއްޖެ ބޭނުން ކުރުމަކީ މައްސަލައެއް ނޫން ކަމަށެވެ. އަދި އެކަމަކީ ރަނގަޅު އާމްދަނީއެއް ލިބޭ ކަމެއްގެ ގޮތުގައި ފާހަގަކުރެއްވި އެވެ.
ރައީސް އިބްރާހިމް މުހައްމަދު ސޯލިހު ތ. އޮމަދޫގައި: ރައީސް ތ. އަތޮޅަށް ވަޑައިގެން އުޅުއްވަނީ ރަސްމީ ދަތުރުފުޅެއްގައި. -- ފޮޓޯ: ރައީސް އޮފީސް
އެކަމަކު އެއީ ކަނޑައަޅާފައިވާ އުސޫލުތަކުގެ ތެރެއިން އެކަން ކުރާނަމަ ކަމަށް ރައީސް ވިދާޅުވި އެވެ. އަދި އުސޫލަށް ތަބާ ނުވެވިއްޖެ ހާލަތެއްގައި، އަނެއްކާވެސް ކޮވިޑު ފެތުރުމުގެ ނުރައްކާ ބޮޑުވެ، ގިނަ ދަތިތަކަކާ ކުރިމަތިލާން ޖެހޭނެ ކަމަށް ވިދާޅުވި އެވެ.
"މިކަން ދެމެހެއްޓޭނީ އަޅުގަނޑުމެން ކަނޑައަޅާފައިވާ އުސޫލުގެ ތެރެއިން، ވިސްނުންތެރިކަމާއެކު އަމަލުކޮށްގެން. އެހެން ނޫން ނަމަ އަނެއްކާވެސް ރާއްޖޭގައި އިތުރު ކޮވިޑުގެ ސްޕްރެޑެއް އަތުވެއްޖެ ކަމަށް ވަންޏާ އަޅުގަނޑުމެންނަށް ވަރަށް ދަތިވާނެ," ރައީސް ވިދާޅުވި އެވެ.
މި މައްސަލަ ހައްލުކުރަން ޓޫރިޒަމް ސިނާއަތުގެ މަސްލަހަތުވެރިންގެ އެއްބާރުލުން ބޭނުންވާ ކަމަށް ވިދާޅުވަމުން ރައީސް ސޯލިހު ވަނީ ގެސްޓްހައުސްތަކާއި، ޓުއާ އޮޕަރޭޓަރުންނާއި ޓްރެވަލް އެޖެންސީތަކުން އުސޫލު ދެމެހެއްޓުމަށް ގޮވާލައްވާފަ އެވެ. ހާއްސަކޮށް ރާއްޖޭގައި ކޮވިޑް ކޮންޓްރޯލް ކުރެވިފައިވާ ދަނޑިވަޅެއްގައި، އެ ހާލަތު އެގޮތަށް ދެމެހެއްޓުމަށް އުސޫލަށް ތަބާވުން މުހިންމު ކަމަށް ވިދާޅުވި އެވެ.
ގޭގޭގައި ޓޫރިސްޓުން ބައިތިއްބާ މައްސަލަ ބޮޑުވެގެން ޓޫރިޒަމާއި، ފުލުހުންނާއި، ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ މިއަދު އިންސްޕެކްޝަންތަކެއް ވެސް ފަށާފަ އެވެ. މި އިންސްޕެކްޝަންތަކުގައި ގެސްޓްހައުސްތަކާއި ޓްރެވަލް އެޖެންސީ އަދި ޓުއާ އޮޕަރޭޓަރުން ޓޫރިސްޓުން އެތެރެކުރުމުގައި އޮޅުވާލާފައި ވޭތޯ ބަލަން ވަނީ ހަމަޖެހިފަ އެވެ.
މި އިންސްޕެކްޝަންތަކާއި ގުޅިގެން ރައީސް ވިދާޅުވީ، އިންސްޕެކްޝަންތަކުން އުސޫލާ ހިލާފުވެފައިވާ ކަމަށް ފާހަގަކުރެވޭ ފަރާތްތަކަށް ފިޔަވަޅު އަޅާނެ ކަމުގެ އިންޒާރު ދެއްވާފަ އެވެ.
"(ގޭގޭގައި ޓޫރިސްޓުން ބޭތިއްބުމަކީ) އެކަން ކޮށްގެން ވާނެ ކަމެއް ނޫން. އެކަން ހުއްޓުވާނަން. މިކަން މުގުރާލާ މިޔާ އިދިކޮޅަށް ކަންކަން ކުރާ ފަރާތްތަކާ ދޭތެރޭ އަޅުގަނޑުމެން ފިޔަވަޅު ވެސް އަޅާނަން." ރައީސް ވިދާޅުވި އެވެ.
ގޭގޭގައި ޓޫރިސްޓުން ބައިތިއްބާ މައްސަލަތަކުގެ އިތުރަށް މިފަދަ ޓޫރިސްޓުންނަށް އޮޅުވާލުމުގެ މައްސަލަތައް ވެސް އަންނަނީ އިތުރުވަމުންނެވެ. އަދި ދަނޑިވަޅުގެ ނާޖައިޒު ފައިދާ ނަގައިގެން ރާއްޖެއަށް މިހެން އެތެރެވާން މަސައްކަތްކުރާ މީހުންގެ ތެރެއިން އަތުލައިގަނެވޭ މީހުން ރާއްޖެއިން އަންނަނީ ޑީޕޯޓްކުރަމުންނެވެ.
