އިޓަލީގެ ކުންފުންޏަކުން އިންވެސްޓްކޮށްގެން ގދ. ކޮޑެގަލާގައި ތަރައްގީކުރި 20 ކޮޓަރީގެ "ނިލާ ކޮރަލް އައިލެންޑް" ރިސޯޓު ހުޅުވައިފި އެވެ.
ޓޫރިޒަމް މިނިސްޓްރީން ބުނީ ގދ. އަތޮޅުގައި މި ރިސޯޓު ހުޅުވުމާއެކު އެ ސަރަހައްދުގައި ވަޒީފާގެ ފުރުސަތުތައް އިތުރުވެ، ވިޔަފާރިތަކަށްވެސް ފުރުސަތުތައް ފަހިވެގެންދާނެ ކަމަށެވެ.
"ވިޒިޓް މޯލްޑިވްސް އިޔާ 2027" އާ އެކު ކޮންމެ ރިސޯޓަކީ ވެސް ރާއްޖެއަށް ޒިޔާރަތްކުރާ މީހުންގެ އަދަދު އިތުރުކޮށް، ފަތުރުވެރިކަމުގެ ފައިދާ އިތުރު ރަށްތަކަށް ފޯރުކޮށްދިނުމަށް މަގުފަހިކޮށްދޭނެ ރިސޯޓެއް ކަމަށް ޓޫރިޒަމް މިނިސްޓްރީން ބުންޏެވެ.
ގައްދޫ ހުޅަނގު އުތުރުން ކޮޑެގަލާއަކީ ޒަމާންތަކެއް ވަންދެން ފިޝަރީޒް މިނިސްޓްރީގެ ބެލުމުގެ ދަށުގައި އޮތް 3.4 ހެކްޓަރުގެ ކުޑަ ފަޅު ރަށެކެވެ. ކުރިން މި ރަށް އެއްވެސް ބޭނުމަކަށް ކުއްޔަށް ދޫކޮށްފައިވާ ކަން އެނގޭކަށް ނެތެވެ. ނަމަވެސް 2017 ގައި ހުވަދު އަތޮޅުން ވަރުވާއަށް ދޫކުރަން ހުޅުވާލި ލިސްޓުގައި މި ރަށް ހިމެނުނެވެ.
ޓޫރިޒަމްގެ ބޭނުންތަކަށް މި ރަށް ހާއްސަކުރީ ނިމިދިޔަ އެމްޑީޕީ ސަރުކާރުގަ އެވެ. އެއީ މަޝްރޫއުތަކަށް ބޭނުންވާ ފައިސާ ހޯދަން ކްރޮސް ސަބްސިޑީ އުސޫލުން ދޫކުރާ ރަށެއްގެ ގޮތުގަ އެވެ.
ކްރޮސް ސަބްސިޑީ އުސޫލުން މި ރަށަށް އިންވެސްޓްކޮށްފައި ވަނީ އިޓަކާ ހޯމް މޯލްޑިވްސް ކިޔާ ކުންފުންޏަކުންނެވެ. މި ކުންފުނީގެ ހިއްސާދާރުންނަކީ މުހައްމަދު ހަސަން ކިޔާ ދިވެއްސަކާއި އިޓަލީގެ ކަރީސްމާ ކުންފުންޏެވެ. ކަރީސްމާއަކީ އެކި ވައްތަރުގެ ވިޔަފާރިތަކުގައި ހަރަކާތްތެރިވާ ހޯލްޑިން ކުންފުންޏެކެވެ.
މާވަރުލު އެއާޕޯޓުން ސްޕީޑް ބޯޓެއްގައި 15 މިނެޓުން ދެވޭ ކޮޑެގަލާ ކުއްޔަށް ދިން ނަމަވެސް ރަށް ދީގެން ލިބުނު ފައިސާގެ އަދަދާއި ކުއްޔަށް ދިން މުއްދަތެއް ނޭނގެ އެވެ.
މި ރިސޯޓު ހުޅުވުމުން މި ރަށް ވެގެން ގޮސްފައި މިވަނީ ގދ. އަތޮޅުގައި ހުޅުވާ ހަތަރު ވަނަ ރިސޯޓަށެވެ. އެ އަތޮޅުގައި ހިންގަމުން އަންނަ ރިސޯޓުތަކަކީ އެންއެޗް ކަލެކްޝަން މޯލްޑިވްސް ހަވޮއްޑާ ރިސޯޓު (ހަވޮއްޑާ) އާއި އައުޓްރިގާ ކޮނޮއްޓާ މޯލްޑިވްސް ރިސޯޓު (ކޮނޮއްޓާ) އާއި އަޔާޑާ މޯލްޑިވްސް (މަގުއްދުވާ) އެވެ.
