ކޮވިޑާ ގުޅިގެން ހަރަދުތައް ފޫބައްދަން ނަގާފައިވާ ދަރަނީގެ މައްސަލަ އަހަރުތަކަކަށް ދެމިގެންދާނެ ކަމަށް ލަފާކޮށް މޫޑީސްއިން ރާއްޖޭގެ ކްރެޑިޓް ރޭޓިން ދަށްކޮށްފި އެވެ.
އެންމެ ފަހުން މޫޑީސްއިން ރާއްޖޭގެ ކްރެޑިޓް ރޭޓިން ދަށްކުރީ މިދިޔަ އަހަރުގެ މެއި މަހުގެ ތެރޭގަ އެވެ. އެފަހަރު ރާއްޖެއަށް ދިން ރޭޓިންއަކީ ދަރަނި ނުދެއްކޭނެ ކަމުގެ ހިރާސް ބޮޑުކަމަށް ލަފާކޮށް ދިން ބީ3 ރޭޓިން އެވެ.
ރާއްޖޭގެ ރޭޓިން ދަށްކުރަމުން އޭރު މޫޑީސްއިން ބުނެފައި ވަނީ އިގުތިސޯދީ ގެއްލުން ކުޑަކުރުމަށާއި ސަރުކާރުގެ ހަރަދުތައް ފޫބައްދަން އިތުރަށް ނަގަން ޖެހޭނެ އެވެ.
މިފަހަރު ރާއްޖޭގެ ރޭޓިން ދަށްކުރީ ސީއޭއޭ1 އަށެވެ. ދިވެހި ސަރުކާރުގެ ރޭޓިންއާ އެކުއެކީގައި ރާއްޖެއިން ސުކޫކް ވިއްކަން އުފައްދާފައިވާ މޯލްޑިވްސް ސުކޫކް އިޝުއަންސް ލިމިޓަޑްގެ ރޭޓިން ވެސް ވަނީ ސީއޭއޭ1 އަށް ދަށްކޮށްފަ އެވެ.
މޫޑީސްއިން ފާހަގަކުރި ގޮތުގައި، ސަރުކާރުގެ ދަރަނީގެ ޒިންމާ އިތުރުވަމުން ދިޔުމާ އެކު އެ އިދާރާއިން ލަފާކުރި ވަރަށް ވުރެ ބޮޑަށް މާލީ ހާލަތު ގޯހެވެ. އަދި މި ދަރަނީގެ ސަބަބުން ކުރިޔަށް އޮތް ތަނުގައި ވެސް މާލީ ޑެފިސިޓް އިތުރުވުމާއި، ކޮމާޝަލް ރޭޓުތަކުގައި ދަރަނި ނެގުމުގެ ސަބަބުން އިންޓްރެސްޓް ރޭޓު ބޮޑުވުމުގެ ފުރުސަތު އެބަ އޮތެވެ.
މީގެ އިތުރުން ރާއްޖޭގެ ޓޫރިޒަމުގެ ހާލަތު ކިތަންމެ އަވަހަކަށް ރަނގަޅުވި ނަމަވެސް، އިންވެސްޓްކޮށްގެން އިގުތިސޯދު ކުރިއަރުވަން ސަރުކާރުން ގެންގުޅޭ މާލީ ސިޔާސަތަށް ބޭނުންވާ ފައިސާ ހޯދަން ނަގާ ދަރަނީގެ ސަބަބުން ދަރަނީގެ ހާލަތު ރަނގަޅުވާނީ ދުވަހުން ކަމަށް މޫޑީސްއިން އަންދާޒާ ކުރެ އެވެ.
ކްރެޑިޓް ރޭޓިން ދަށްކުރި ނަމަވެސް، މޫޑީސްއިން ވަނީ ރާއްޖޭގެ އައުޓްލުކް "ސްޓޭބަލް"އަށް މަތިކޮށްފަ އެވެ. މޫޑީސްއިން ބުނީ މާލީ ފިއްތުންތައް ހުރި ނަމަވެސް، ޓޫރިޒަމާއި ޖުމްލަކޮށް އިގުތިސޯދަށް އަންނަމުންދާ ހެޔޮ ބަދަލުތަކުގެ ސަބަބުން އިގުތިސޯދު ކުރިއަރާ ވަޒީފާތައް އިތުރުވާނެ ކަމަށް ބެލެވޭ ކަމަށެވެ.
އަދި ސުކޫކް ވިއްކައިގެން އަންނަ އަހަރު އަދާކުރަން އޮތް ޔޫރޯބޮންޑް ރީފައިނޭންސް ކުރުމާއި، ބޭރު ފައިސާގެ ހާލަތު ރަނގަޅުވުމާއި، އެކުވެރި ގައުމުތަކުން ފޯރުކޮށްދިން އެހީގެ ސަބަބުން ބޭރުގެ ދަރަނި އަދާކުރަން ކުރި ގޮންޖެހުންތައް ކުޑަކުރެވުން ވެސް އައުޓްލުކް މަތިކުރި ސަބަބުތަކުގެ ތެރޭގައި މޫޑީސްއިން ފާހަގަކުރި އެވެ.
މޫޑީސްގެ މި ޑައުންގްރޭޑްގެ ސަބަބުން ރާއްޖެއަށް ދަރަންޏަށް ފައިސާ ހޯދުމުގައި އިތުރު ގޮންޖެހުންތަކާ ކުރިމަތިވާނެ އެވެ. އަދި ދަރަނި ނަގާ ނަމަވެސް ނަގަން ޖެހޭނީ ބޮޑު އިންޓްރެސްޓް ރޭޓުތަކުގައި ކުރު މުއްދަތަކުން އަނބުރާ އަދާކުރާ ގޮތަށެވެ. މީގެ ސަބަބުން ކުރު އަދި މެދު ރާސްތާގައި ސަރުކާރުގެ ދަރަނި އަދާކުރުމުގެ ގާބިލިއްޔަތު ކަމަށް އަސަރު ކުރުމުގެ ފުރުސަތު ބޮޑެވެ.
ފިނޭންސް މިނިސްޓްރީގެ އެންމެ ފަހުގެ ހިސާބުތަކުން ދައްކާ ގޮތުގައި މި އަހަރުގެ ފުރަތަމަ ކުއާޓާގެ ނިޔަލަށް ސަރުކާރުގެ ދަރަނި ހުރީ 68.3 ބިލިއަން ރުފިޔާގަ އެވެ. އެއީ ގައުމީ އުފެއްދުންތެރިކަމުގެ 103 ޕަސެންޓެވެ.
