ސޭން ފްރެންސިސްކޯ، އެމެރިކާ (އޯގަސްޓު 18) - މިދިޔަ އާދީއްތަ ދުވަހު އަފްގާނިސްތާނުގެ ވެރިކަމަށް އައި ތާލިބާނުން ގައުމު ހިންގުމުގައި ވަޓްސްއެޕް މެސެޖިން ހިދުމަތް ބޭނުން ކުރަމުން ދާތީ، ފޭސްބުކް އިން އެ މީހުންގެ އެކައުންޓްތައް ބްލޮކްކޮށްފި އެވެ.
ވަޓްސްއެޕް އަކީ ފޭސްބުކް ދަށުގައި އޮންނަ މެސެޖިން ހިދުމަތެކެވެ. ފޭސްބުކްގެ ތަރުޖަމާނަކު އޭއެފްޕީ އަށް ބުނީ އެމެރިކާގެ ގާނޫނުގެ ދަށުން ތާލިބާނުންނަކީ ޓެރަރިސްޓް ގްރޫޕެއް ގޮތަށް ކަނޑައަޅައި، ދަތިކުރުމުގެ ފިޔަވަޅު އަޅަން ޖެހޭ ކަމަށެވެ.
"އަޅުގަނޑުމެންގެ ހިދުމަތްތައް ތާލިބާނުންނަށް ދިނުން ހުއްޓާލީ ނުރައްކާތެރި ޖަމިއްޔާތަކާ ގުޅޭ ސިޔާސަތުގެ ދަށުން".
ފައިނޭންޝަލް ޓައިމްސް އިން ރިޕޯޓު ކުރި ގޮތުގައި ތާލިބާނުން ވަޓްސްއެޕް ބޭނުން ކުރަމުން ދިޔެއީ އަފްގާނިސްތާނުގެ އެކި ކަންކޮޅުތަކުގައި ހިންގާ ހަމަނުޖެހުމާއި ވައްކަމާއި ލޫޓުވުން ފަދަ ކުށްތަކާ ގުޅޭ ޝަކުވާތައް ބަލައިގަތުމަށެވެ.
ވަޓްސްއެޕުން ބުނީ އެމެރިކާގެ ގާނޫނުތަކަށް އަމަލު ކުރުން ޕްލެޓްފޯމަށް ލާޒިމް ކަމަށާއި އެގޮތުން ތާލިބާނުންގެ ރަސްމީ އެކައުންޓުގެ ގޮތުގައި ފާހަގަވާ ހުރިހާ އެކައުންޓެއް ބްލޮކްކުރަން ޖެހޭ ކަމަށެވެ.
އަފްގާނިސްތާނުގެ ހާލަތު އޮތް ގޮތުން ސޯޝަލް މީޑިއާ ކުންފުނިތަކަށް ވަނީ ތާލިބާނުންގެ އެކައުންޓްތައް ބްލޮކްކުރަން ޕްރެޝަރާ ކުރިމަތިވެފަ އެވެ.
ފޭސްބުކް އިން ބުނީ ކުންފުނީގެ ސިޔާސަޔާ އެއް ގޮތަށް އަމަލު ކުރުމަށް އަފްގާނިސްތާނުގެ މައުލޫމާތު ލިބިފައިވާ ތަޖުރިބާކާރުންގެ ޓީމެއް މަސައްކަތް ކުރަމުންދާ ކަމަށެވެ.
ތާލިބާނުންގެ ތަރުޖަމާނަކު ވަނީ ފޭސްބުކް ނިންމުމަށް ފާޑުކިޔާފަ އެވެ. އެގޮތުން އެއީ އަފްގާނިސްތާނުގެ ރައްޔިތުންނަށް ލިބިދޭ ހިޔާލު ފާޅުކުރުމުގެ މިނިވަންކަމަށް އެޅޭ ހުރަހެއް ކަމަށް ފާހަގަކުރި އެވެ.
