މާލެ ސަރަހައްދުގައި އެކަށީގެންވާ ވަރެއްގެ އާބާދީއަކަށް ކޮވިޑް ވެކްސިން ފުރިހަމަ ނުވާތީ، މާލެ، ހުޅުމާލެ އަދި ވިލިމާލޭގައި ހުންނަ ގެސްޓްހައުސްތަކަށް ޗެކިން ކުރެވޭނީ ވެކްސިން ދެ ޑޯޒް ފުރިހަމަކޮށްފައިވާ ޓޫރިސްޓުންނަށް އެކަނި ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ނިންމައިފި އެވެ.
ވެކްސިން ނުޖަހާ ޓޫރިސްޓުންނަށް ދެވޭ ރަށްރަށާ ގުޅިގެން އެޗްޕީއޭއިން ކަނޑައަޅާފައިވާ އުސޫލުގައި ވެކްސިނާ ގުޅޭ ތިން ޝަރުތެއް ފުރިހަމަކުރަން ވަނީ ޝަރުތުކޮށްފަ އެވެ. އެއީ ރަށުގައި ދިރިއުޅޭ އާބާދީގެ 60 ޕަސެންޓު ވެކްސިން ފުރިހަމަކުރުމާއި، ޓޫރިސްޓުންނަށް ހިދުމަތް ދޭ މީހުންގެ 95 ޕަސެންޓު ވެކްސިން ފުރިހަމަ ކުރުން އަދި 65 އަހަރުން މަތީގެ އާބާދީގެ 90 ޕަސެންޓު ވެކްސިން ފުރިހަމަ ކުރުމެވެ.
މިހާތަނަށް އެޗްޕީއޭއިން ވަނީ މި ޝަރުތު ހަމަވާ 28 ރަށަކަށް ވެކްސިން ނުޖަހާ ޓޫރިސްޓުންނަށް ދާން ހުއްދަ ދީފަ އެވެ. މި ނޫން އެއްވެސް ރަށަކަށް ވެކްސިން ނުޖަހާ ޓޫރިސްޓުން ޗެކިންވުމަކީ މަނާ ކަމެކެވެ.
އެޗްޕީއޭގެ އެންމެ ފަހުގެ ވެކްސިނޭޝަން ތަފާސްތައް ދައްކާ ގޮތުގައި، މާލެ ސަރަހައްދުގައި ދިރިއުޅޭ އާބާދީގެ ތެރެއިން ވެކްސިން ފުރިހަމަކުރީ 51.90 ޕަސެންޓެވެ. މި އާބާދީގެ ތެރެއިން 65 ޕަސެންޓުން މަތީގެ މީހުންނާއި ޓޫރިޒަމްގައި މަސައްކަތް ކުރާ މީހުންގެ ތެރެއިން ވެކްސިން ޖެހި މީހުންގެ އަދަދުތަކެއް ސާފެއް ނޫނެވެ.
ވެކްސިނާ ގުޅޭ އުސޫލަށް ރިއާޔަތްކޮށް މާލެ ސަރަހައްދުގެ ގެސްޓްހައުސްތަކާއި ހޮޓާތަކަށް އެންމެ އަވަހަށް ވެސް ހުއްދަ ލިބޭނެ ކަމަށް ލަފާކުރެވެެނީ މި މަސް ނިމޭހާ ތަނުގަ އެވެ. އެއީ މިހާރު ވެކްސިން ފުރިހަމަކުރަމުންދާ އާބާދީ ވެކްސިން ފުރިހަމަވީ ކަމަށް ބަލަނީ ދެވަނަ ޑޯޒް ޖެހުމަށް ފަހު 14 ދުވަސް ވުމުން ކަމަށް ވާތީ އެވެ.
ގެސްޓްހައުސްތަކަށް ޗެކިން ނުވެވުނު ނަމަވެސް، ޓްރާންސިޓް ފެސިލިޓީގެ ގޮތުގައި ބޭނުން ކުރަން ޓޫރިޒަމް މިނިސްޓްރީން ހުއްދަ ދީފައިވާ ގެސްޓްހައުސްތަކާއި ހޮޓާތައް މި އުސޫލުން އިސްތިސްނާވާނެ އެވެ. މިހާތަނަށް މިނިސްޓްރީން ވަނީ މާލެ ސަރަހައްދުގައި ހުންނަ ނުވަ ތަނަކަށް ޓްރާންސިޓްގެ ގޮތުގައި ބޭނުން ކުރަން ހުއްދަ ދީފަ އެވެ.
ރާއްޖޭގައި އެންމެ ގިނަ އަދަދަކަށް ގެސްޓްހައުސްތަކާއި ހޮޓާތައް ހުންނަ މާލެ ސަރަހައްދުގައި އޮޕަރޭޓް ކުރަން ޓޫރިޒަމް މިނިސްޓްރީން ވަނީ 58 ހޮޓާ/ގެސްޓްހައުސްއަށް ހުއްދަ ދީފަ އެވެ. އެކަމަކު ކޮވިޑާ ގުޅިގެން އަޅާފައިވާ ބައެއް ފިޔަވަޅުތަކަށް އަމަލު ނުކުރާތީ، މިފަހުން ބައެއް ގެސްޓްހައުސްތަކުގެ ހުއްދަ ވަގުތީ ގޮތުން ބާތިލުކުރި އެވެ.
