ފުލުހުންގެ އިސް ސަފުގައި ތިބީ ޒިންމާ އާއި މަސްއޫލިއްޔަތު އަދާކުރަން ގާބިލް އަދި ފުރިހަމަ ތަމްރީން ލިބިފައި ތިބި އޮފިސަރުންތޯ ކަށަވަރުކުރަން ޕޮލުސް ބޯޑަށް ގާނޫނުން ކަނޑައެޅި މުއްދަތު މާދަމާއަށް ހަމަވާނެ އެވެ.
މިފަހުން ފާސްކުރި ފުލުހުންގެ ހިދުމަތުގެ ގާނޫނުގައިވާ ގޮތުން ކޮމިޝަންޑް އޮފިސަރުންގެ ތެރެއިން ކޮމިޝާނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުން، ފުލުހަކަށް ވީތީ އެމީހަކަށް ލިބިފައިވާ ގާނޫނީ ބާރާއި އިހްތިޔާރު ނަހަމަ ގޮތުގައި ބޭނުންކޮށް، ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭތޯ ބަލަން ޖެހެ އެވެ.
އަދި އެފަދަ މައްސަލައެއް ދައުލަތުގެ އިދާރާއަކަށް ނުވަތަ ކޮމިޝަނަކަށް ރިޕޯޓުކޮށްފައިވާ އޮފިސަރުންނަކީ އެ މަގާމުތަކަށް ގާބިލު އަދި މަގާމާ އެކަށޭނަ ތައުލީމާއި ހުނަރާއި މަސައްކަތުގެ ތަޖުރިބާއާއި ނަޒާހަތްތެރިކަން ހުރި އޮފިސަރުންކަމާމެދު ޕޮލިސް ބޯޑުން ގޮތެއް ކަނޑައަޅަންޖެހެ އެވެ.
އެ ރޭންކުތަކުގެ އޮފިސަރުންނާމެދު ފުލުހުންގެ ބޯޑުން ގާނޫނަށް އަމަލު ކުރަން ފަށާތާ ހަތަރު މަސް ދުވަހުގެ ތެރޭ ނިންމަން ޖެހެ އެވެ. އެ ހަތަރު މަހުގެ މުއްދަތު ހަމަވާން އޮތީ މާދަމާއަށެވެ.
އެނގިފައިވާ ގޮތުގައި ފުލުހުންގެ ބޯޑުން މިހާރު ގެންދަނީ އިސް ރޭންކްތަކުގައި ތިބި އޮފިސަރުންގެ މައްސަލަތައް ބަލައި، އެމީހުން ވަކިކުރުމާމެދު ގޮތެއް ނިންމުމުގެ މަސައްކަތް ކުރަމުންނެވެ. ބައެއް އޮފިސަރުން ބޯޑަށް ހާޒިރުކޮށް ސުވާލުކޮށްފައިވާ ކަމަށް ވެސް މައުލޫމާތު ލިބިފައިވެ އެވެ.
ނަމަވެސް، އެ ބޯޑުން އެކަމުގެ މައުލޫމާތު ހާމައެއް ނުކުރި އެވެ.
ފުލުހުންގެ ބޯޑުގެ މެންބަރަކު މިރޭ "އަދަދު"އަށް ވިދާޅުވީ ފުލުހުންގެ ބޯޑުން ނިންމާ އެފަދަ ނިންމުންތައް މީޑިއާއާ ހިއްސާކުރުމުގެ އުސޫލެއް އަދި ނެތް ކަމަށެވެ.
އޮފިސަރުން ވަކިކުރުމާމެދު މާދަމާ ގޮތެއް ނިންމަން ޖެހޭއިރު މިހާތަނަށް އެފަދަ ނިންމުމެއް ނިންމާފައިވާ ކަމުގެ މައުލޫމާތު ހޯމް މިނިސްޓްރީއަށާއި ފުލުހުންގެ އިދާރާއަށް ލިބިފައެއް ނެތެވެ.
ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު މި ނޫހަށް ވިދާޅުވި ގޮތުގައި ފުލުހުންގެ ބޯޑު އޮފިސަރުންނާމެދު މާދަމާގެ ނިޔަލަށް ގޮތެއް ނިންމަން ޖެހޭއިރު އަދި މިހާތަނަށް އެ މިނިސްޓްރީއާ ހަމައަށް ނިންމުމެއް އައިސްފައެއް ނެތެވެ.
ފުލުހުންގެ އިދާރާގެ ތަރުޖަމާނު ޔޫނުސް ސޮބާހު ވެސް ވިދާޅުވި ގޮތުގައި ފުލުހުންގެ އިދާރާގެ އިސް ބޭފުޅުންނާމެދު ގޮތެއް ނިންމެވި ކަމެއް އަދި އެ އިދާރާއަކަށް އެނގިފައެއް ނެތެވެ.
އާ ގާނޫނުގެ ދަށުން އާއްމު ހަތް މެމްބަރެއްގެ މައްޗަށް އެކުލެވޭ ޕޮލިސް ބޯޑު އައްޔަންކޮށްފައި ވަނީ މިދިޔަ އެޕްރީލް މަހުގެ ތެރޭގަ އެވެ. ވަޒީރަށް ލަފާ ދޭ އެންމެ އިސް ފަރާތެއްގެ ގޮތުގައި ގާނޫނުން ކަނޑައަޅާފައިވާ ބޯޑަށް މަތިކޮށްފައިވާ މުހިއްމު ޒިންމާއަކީ އައްޔަންކުރާ ތާރީހުން ފެށިގެން ހަތަރު މަސް ދުވަހުގެ ތެރޭގައި ފުލުހުންގެ އިސް ސަފަށް ހަރުދަނާ ބަދަލުތައް ގެނައުމެވެ.
ހޯމް މިނިސްޓަރު އިމްރާން އަބްދުﷲ މީގެކުރިން ދެއްވި އިންޓަވިއުއެއްގައި ވިދާޅުވި ގޮތުގައި ގާނޫނުގައި ބުނާ މުއްދަތުގައި ފުލުހުންގެ އިސް ސަފަށް ހެޔޮ ބަދަލެއް ގެނައުމަކީ މުއައްސަސާގެ އިތުބާރު ބޮޑުވެގެންދާނެ ކަމެކެވެ.
"އަޅުގަނޑު ގަބޫލުކުރަނީ ގާނޫނުން ކަނޑައެޅިފައި އޮތް މުއްދަތުގެ ތެރޭގައި އެ ބޭފުޅުންނަށް އެ މަސައްކަތް ނިންމާލެވޭނެ ކަމަށް," އިމްރާން ވިދާޅުވި އެވެ.
މިނިސްޓަރު އިމްރާން ވިދާޅުވި ގޮތުގައި އެ މަސައްކަތުގެ އިތުރަށް ފުލުހުންގެ ގާނޫނުން ލާޒިމްކޮށްފައިވާ ބައެއް ގަވާއިދުތައް ހެދުމުގައި މިނިސްޓްރީއަށް ބޯޑުން އަންނަނީ ލަފާ ވެސް ދެމުންނެވެ. އެ ލަފާތަކުގެ މައްޗަށް ގަވައިދުތައް ބައްޓަންކޮށް އިސްލާހުކުރުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.
