ރަށްރަށުގެ ޕޮލިސް ސްޓޭޝަންތަކާއި ޕޮލިސް ޕޯސްޓްތައް ހިމެނޭ ގޮތުން ފުލުހުންގެ މުއައްސަސާއަށް ބޭނުންވާ އުމްރާނީ ތަރައްގީގެ ވަސީލަތްތައް ގާއިމްކުރުމުގެ އެންމެ ބިޔަ މަޝްރޫއު ހަވާލުކޮށްފައިވާ އިންޑިއާގެ ކުންފުނިން، އެ މަސައްކަތްތަކަށް 600 އެއްހާ މީހުން އިންޑިއާއިން ގެންނާނެކަމަށް އެ ކުންފުނިން ބުނެފި އެވެ.
ފުލުހުންނާއި އިންޑިއާގެ ކުންފުންޏެއް ކަމަށްވާ އޭބީއެލް އިންދިރާ ޕްރޮޖެކްޓްސްއާ ދެމެދު ފުލުހުންގެ ބައެއް ތަންތަން މަރާމާތުކުރުން ވެސް ހިމަނައިގެން މިދިޔަ މަހުގެ 17 ވަނަ ދުވަހު ސޮއި ކުރި އެއްބަސްވުމުގެ ދަށުން ޖުމްލަ 61 އިމާރާތެއްގެ މަސައްކަތް ކުރިއަށް ގެންދާށެވެ.
އޭގެތެރޭގައި 23 ޕޮލިސް ސްޓޭޝަނާއި 21 ޕޮލިސް ޕޯސްޓް އަދި އަށް އަތޮޅު ޕޮލިސް ސްޓޭޝަނާއި މާލޭގައި އިމާރާތްކުރާ ޕޮލިސް ސްޓޭޝަނަކާއި ހުޅުމާލެ ފޭސް 2 ގައި ޕޮލިސް ސްޓޭޝަނެއްގެ އިތުރުން ހަތަރު އެކޮމޮޑޭޝަން އިމާރާތް ހިމެނެ އެވެ.
މި މަޝްރޫއުގައި ސޮއިކުރީ 48 މިލިއަން ޑޮލަރު (740 މިލިއަން ރުފިޔާ) އަށެވެ.
އެ މަޝްރޫއުއާ ގުޅޭގޮތުން އިންޑިއާ ކުންފުނީގެ ޗެއާމަން ބުޕޭޝް ނާގަރާޖަން އެގައުމުގެ މީޑިއާތަކަށް ވިދާޅުވީ ކޮވިޑުގެ ހާލަތުގައި އެފަދަ ބޮޑު މަޝްރޫއެއް ލިބުމަކީ އެ ކުންފުންޏަށް ލިބުނު ވަރަށް ބޮޑު ކުރިއެރުމެއް ކަމަށެވެ.
އޭނާ އިތުރަށް ވިދާޅުވި ގޮތުގައި އެ މަޝްރޫއުއަށް އިންޑިއާގެ ޓެމިލް ނާޑޫއިން 500 ލޭބަރުންނާއި 100 އިންޖިނިއަރުން ނަގަން ނިންމާފައި ވެ އެވެ.
އެގޮތުން، މީހުން ނެގުމުގައި އިސްކަން ދޭނީ މެދުއިރުމަތީގައި ވަޒީފާ އަދާކުރަމުންދިޔަ މީހުންގެ ތެރެއިން ކޮވިޑުގެ ސަބަބުން ވަޒީފާ ގެއްލުނު މީހުންނަށް ކަމަށް ވެސް އޭނާ ވިދާޅުވި އެވެ.
އެ އެއްބަސްވުމުގެ ދަށުން އެ މަޝްރޫއުދެ އަހަރުގެ ތެރޭގައި ނިންމަން ޖެހޭއިރު، މި މަޝްރޫއުގެ ސަބަބުން ފުލުހުންގެ ހިދުމަތް ލާމަރުކަޒު ކުރެވި ރައްޔިތުން ބޭނުންވާ ފަދަ ޒަމާނީ ހިދުމަތެއް ދިނުމުގެ މަގުފަހިވެގެންދާނެކަމަށް ފުލުހުން ބުނެފައި ވެ އެވެ.
އެ މަޝްރޫއުގެ އިތުރުން، ފުލުހުންގެ ތަމްރީނު މަރުކަޒު އައްޑޫގައި ގާއިމުކުރުމުގެ މަސައްކަތް ވެސް ކުރަމުންދަނީ އިންޑިއާ ސަރުކާރުގެ އެހީގަ އެވެ.
