އިނގިރޭސި ވިލާތު ރައްޔިތުންނަށް ކަރަންޓީނު ނުވެ ދަތުރުކުރެވޭ ގައުމުތަކުގެ ލިސްޓުގެ އެންމެ ފަހުގެ އަޕްޑޭޓުގައި ވެސް ރާއްޖެ ހިމެނުނީ ރަތް ލިސްޓުގަ އެވެ.
އިއްޔެ އިނގިރޭސި ސަރުކާރުން އާންމުކުރި ދަތުރުކުރަން ރައްކާތެރި ގައުމުތަކުގެ ގްރީން ލިސްޓުން ޖާގަ ލިބުނީ ޔޫރަޕުގެ ހަތް ގައުމަކަށެވެ. އަދި އޮގަސްޓް 8 ވަނަ ދުވަހުން ފެށިގެން އެ ގައުމުތަކާއި، މިހާރު ލިސްޓުގައި އޮތް 33 ގައުމަކުން އިނގިރޭސި ވިލާތަށް ދަތުރުކުރާ މީހުން ކޮވިޑް ނެގެޓިވް ނަމަ ކަރަންޓީނު ވާކަށް ނުޖެހޭނެ އެވެ.
ގްރީން ލިސްޓަށް އޭޝިއާ ސަރަހައްދުގެ އެއްވެސް ގައުމެއް ނޭރި ނަމަވެސް، ވެކްސިން ޖަހާފައިވާ މީހުންނަށް ލުއި ލިބޭ އެމްބާ ލިސްޓުގައި އޭޝިއާގެ ހަތަރު ގައުމެއް ހިމެނެ އެވެ. އޭގެ ތެރޭގައި މި ސަރަހައްދުގެ ކޮވިޑުގެ ހާލަތު އެންމެ ގޯސްވި އިންޑިއާ ވެސް ހިމެނެ އެވެ.
މި ގައުމުތަކުން ދަތުރުކުރާ މީހުންގެ ތެރެއިން ވެސް ވެކްސިން ލުއި ލިބެނީ އިނގިރޭސި ސަރުކާރުން ގަބޫލުކުރާ ވެކްސިނޭޝަން ޕްރޮގްރާމްތަކުގެ ތެރެއިން ވެކްސިންގެ ޑޯޒްތައް ޖަހާފައިވާ މީހުން އެކަންޏެވެ. އެއީ އެ ގައުމުން ވެކްސިން ޖަހާ މީހުންނާއި ޔޫރަޕުގެ ގައުމަކުން ނުވަތަ އެމެރިކާގެ ވެކްސިނޭޝަން ޕްރޮގްރާމުތަކުން ތެރެއިން ވެކްސިން ޖަހާ މީހުންނެވެ.
އެހެން ކަމުން އޭޝިއާ ސަރަހައްދުގެ އެއްވެސް ގައުމަކުން ހިންގާ ވެކްސިން ޕްރޮގްރާމްގެ ތެރެއިން ވެކްސިން ޖަހާ މީހުންނަކަށް، މި ލުއިތަކެއް ނުލިބޭނެ އެވެ. އެކަމަކު ފަސް ދުވަހުގެ ތެރޭގައި ކޮވިޑް ނެގެޓިވް ނަތީޖާއަކާ އެކު ކަރަންޓީނުން ވީއްލުމުގެ ފުރުސަތު އޮންނާނެ އެވެ. އެހެން ނޫނީ ދިހަ ދުވަހުގެ ކަރަންޓީނު ފުރިހަމަ ކުރަން ޖެހެ އެވެ.
އިނގިރޭސި ވިލާތަކީ ރާއްޖޭގެ ޓޫރިޒަމަށް މުހިންމު މާކެޓެކެވެ. އަދި މި ބަލިމަޑުކަމުގެ ތެރޭގައި ވެސް ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ ތެރޭގައި އެ ގައުމު ހިމެނެ އެވެ. ނަމަވެސް ރާއްޖޭގެ ކޮވިޑުގެ ހާލަތު ގޯސްވެ މި އަހަރުގެ މެއި މަހު ރަތް ލިސްޓަށް އެރި ފަހުން އެ ގައުމުން އަންނަ ޓޫރިސްޓުންގެ އަދަދުތައް ވަނީ ވަރަށް ބޮޑަށް މަދުވެފަ އެވެ.
މިއީ ރާއްޖޭގައި ކޮވިޑް ނަމްބަރުތައް ކޮންޓްރޯލް ކުރެވުނު ފަހުން މި ލިސްޓު އަޕްޑޭޓް ކުރި ދެ ވަނަ ފަހަރެވެ. އެކަމަކު ދެ ފަހަރު ވެސް ރާއްޖެއަށް ލިސްޓުން އެއްވެސް ކުރިއެރުމެއް ލިބިފައެއް ނުވެ އެވެ. މި ލިސްޓު މުރާޖާކުރަނީ ކޮންމެ ތިން ހަފުތާއަކުންނެވެ.
