ކުނި މެނޭޖުކުރަން އުފައްދާފައިވާ ދައުލަތުގެ ކުންފުނި، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަށް 2022 ވަނަ އަހަރު 127.9 މިލިއަން ރުފިޔާގެ ބޮޑު ގެއްލުމެއް ލިބުނު ކަމަށް އެ ކުންފުނީގެ އޮޑިޓު ރިޕޯޓުން ދައްކައިފި އެވެ.
މާލީ އަހަރު ނިމުނުތާ ހަތަރު އަހަރު ވާން ގާތްވެފައި ވަނިކޮށް ފަހުން މިއަދު އާންމުކުރި ވެމްކޯގެ 2022 ވަނަ އަހަރުގެ އޮޑިޓުގައިވާ ގޮތުގައި އެ އަހަރު އެ ކުންފުންޏަށް 215.4 މިލިއަން ރުފިޔާ އާމްދަނީގެ ގޮތުގައި ލިބުނެވެ. މިއީ އޭގެ ކުރީ އަހަރު އެ ކުންފުންޏަށް ލިބުނު ވަރަށް ވުރެ އިތުރު އާމްދަނީއެކެވެ.
މިހެން ނަމަވެސް އެ ކުންފުންޏަށް ބޮޑު ގެއްލުމަކާ ކުރިމަތިލާން ޖެހުނީ ކުންފުންޏަށް ލިބުނު އާމްދަނީއަށް ވުރެ ހަރަދު މާ ބޮޑަށް އިތުރުވެފައިވާތީ އެވެ.
ވެމްކޯގެ މާލީ ބަޔާންތަކުން ދައްކާ ގޮތުގައި އެ ކުންފުނިން އެންމެ ބޮޑު ހަރަދެއް ކުރަނީ މުވައްޒަފުންގެ މުސާރަ އާއި އިނާޔަތްތަކަށެވެ. ވެމްކޯއިން މުވައްޒަފުންނަށް ދިން 234.7 މިލިއަން ރުފިޔާއަކީ އެ ކުންފުންޏަށް އެ އަހަރުގެ ތެރޭގައި ލިބުނު އާާމްދަނީއަށް ވުރެ ވެސް ބޮޑު އަދަދެކެވެ.
ކުންފުނީގެ މާލީ ހާލަތު މިހާ ދަށަށް ގޮސްފައިވާއިރު، ވެމްކޯ ހިންގަމުންދަނީ ސަރުކާރުން ފޯރުކޮށްދޭ މާލީ އެހީތެރިކަމުގެ މައްޗަށް ބިނާވެގެންނެވެ. އޮޑިޓުގައިވާ ގޮތުގައި 2022 ވަނަ އަހަރު ސަރުކާރުން ވަނީ އެ ކުންފުންޏަށް 105.2 މިލިއަން ރުފިޔާ އިންޖެކްޓުކޮށްފަ އެވެ. މިއީ 2021 ގައި އެ ކުންފުންޏަށް ދިން 66.9 މިލިއަން ރުފިޔާއަށް ވުރެ ވެސް އިތުރު އަދަދެކެވެ.
ވެމްކޯގެ މާލީ ހާލަތު ގޯސްވެ، ގެއްލުން ވަމުން ދިޔުމާ ގުޅިގެން 2022 ވަނަ އަހަރުގެ ނިޔަލަށް އެ ކުންފުނީގެ ޖުމްލަ ގެއްލުން (އެކިއުމިލޭޓަޑް ލޮސަސް) ވަނީ 486.2 މިލިއަން ރުފިޔާއަށް އަރާފަ އެވެ. އަދި ކުންފުނީގެ ދަރަނި ވެސް ވަނީ ވަރަށް ބޮޑަށް އިތުރުވެފަ އެވެ.
އެ ކުންފުނިން 2022 ނިމުނުއިރު، އަދާކުރަން ޖެހޭ ކުރު މުއްދަތުގެ ދަރަނި 181 މިލިއަން ރުފިޔާއަށް އަރަ އެވެ. މީގެ ތެރޭގައި މުދަލާއި ހިދުމަތް ހޯދުމަށްފަހު އެކި ފަރާތްތަކަށް ދައްކަންޖެހޭ 110.7 މިލިއަން ރުފިޔާ އާއި، ދައުލަތަށް ދައްކަން ޖެހޭ ޖީއެސްޓީގެ ގޮތުގައި ހިމެނޭ 45.6 މިލިއަން ރުފިޔާ ހިމެނެ އެވެ.
މި އޮތް ބައިވަރު ދަރަނި އޮތް އިރު، އެ ކުންފުނީގައި ނަގުދު ފައިސާގެ ގޮތުގައި ހުރީ އެންމެ 11.6 މިލިއަން ރުފިޔާ އެވެ.
ދައުލަތުގެ އެކި މުއައްސަސާތަކުން ވެމްކޯއަށް ދައްކަން ޖެހޭ ގިނަ އަދަދެއްގެ ފައިސާ ނުލިބި ހުރިކަން ވެސް ރިޕޯޓުން ހާމަވެ އެވެ. އެ ކުންފުންޏަށް ލިބެންޖެހޭ ޖުމްލަ 128.7 މިލިއަން ރުފިޔާގެ ތެރެއިން 44.2 މިލިއަން ރުފިޔާއަކީ ސަރުކާރުގެ އިދާރާތަކާއި ކުންފުނިތަކުން ދައްކަންޖެހޭ ފައިސާ އެވެ. މީގެ ތެރެއިން މާލެ ސިޓީ ކައުންސިލުން އެކަނި ވެސް 19.6 މިލިއަން ރުފިޔާ ދައްކަން ޖެހެ އެވެ.
އެކަމަކު މި ފައިސާގެ ތެރެއިން 75.6 މިލިއަން ރުފިޔާއަކީ އަނބުރާ ލިބުމުގެ އުންމީދު ކުޑަ ފައިސާގެ ގޮތުގައި ވަނީ ކަނޑައަޅާފަ އެވެ. މިއީ ލިބެން ޖެހޭ ފައިސާގެ ގާތްގަނޑަކަށް 59 ޕަސެންޓެވެ.
ވެމްކޯގެ އޮޑިޓު ރިޕޯޓުގައި އޮޑިޓާ ޖެނެރަލް ހަސަން ނިޔާޒީ ވަނީ މައިގަނޑު 17 މައްސަލައެއް ފާހަގަކުރައްވާފަ އެވެ. އޭގެ ތެރޭގައި ކުންފުންޏަށް ލިބުނު އާމްދަނީ އާއި، ލިބެން ޖެހޭ ފައިސާ އާއި، ދައްކަން ޖެހޭ ފައިސާގެ އިތުރުން ތެލަށް ހިނގި ހަރަދާއި ކުންފުނީގެ މިލްކިއްޔާތުގައި ހުރި މުދަލުގެ ހިސާބުތައް ސައްހަކަން ކަށަވަރުކުރެވޭނެ ލިޔެކިޔުން ނެތުން ހިމެނެ އެވެ.
ވެމްކޯގެ ހިސާބުތަކުގެ ސައްހަކަން ކަށަވަރުކުރެވެން ނެތުމުން އެ ކުންފުންޏަށް އޮޑިޓަރުން ދީފައިވާ ރައުޔަކީ "ޑިސްކްލެއިމާ އޮފް އޮޕީނިއަން" އެވެ. މިއީ އޮޑިޓަރަކަށް ދެވޭނެ އެންމެ ގޯސް ރައުޔެވެ.
