ވަގަށް ނެގި ނޫސްވެރިޔާ އަހުމަދު ރިލްވާން މައްސަލާގެ ތަހުގީގުގައި "އޯވާވެލްމް" (މާބޮޑުވަރު) ނުވުމަށް ކުރީގެ ރައީސް އަބްދުﷲ ޔާމީން ފޮނުއްވި މެސެޖަކީ ސައްހަ މެސެޖެއްކަން ކަށަވަރުކޮށް ދެއްވައިފި އެވެ.
އެކަން ކަށަވަރުކޮށް ދެއްވާފައިވަނީ ޔާމީންގެ އެ މެސެޖު ރައްދު ކުރެއްވި، އޭރުގެ ހޯމް މިނިސްޓަރު އުމަރު ނަސީރެވެ.
ޔާމީން ފޮނުއްވި ކަމަށް ބުނާ މި މެސެޖު އެންމެ ފުރަތަމަ ލީކްކޮށްލާފައިވަނީ އަލްޖަޒީރާއިން ގެނެސްދިން "ސްޓީލިން ޕެރެޑައިސް" ޑޮކިއުމެންޓްރީގަ އެވެ. އެ މެސެޖަކީ ކެބިނެޓްގެ މިނިސްޓަރުން ތިއްބަވާ ގުރޫޕަކަށް ޔާމީން ފޮނުއްވި މެސެޖެކެވެ.
އެ މެސެޖުގައި ޔާމީން ވިދާޅުވެފައިވަނީ "އުމަރު، ނޯ ނީޑް ޓް ބީ އޯވާވެލްމްޑް ބައި ރިލްވާން ކޭސް،" ކަމަށެވެ.
އެ ޖަވާބުގައި އުމަރު ވިދާޅުވެފައިވަނީ "އޯކޭ ނޯޓެޑް ސާ" ކަމަށެވެ.
ޔާމީން އެގޮތަށް މެސެޖެއް ގުރޫޕަށް ފޮނުއްވީ ރިލްވާން ހޯދުމުގެ ތަހުގީގު ފުޅާ ގޮތެއްގައި ހިންގަވަމުން ގެންދަވާ ކަމަށް އުމަރު މެސެޖެއް ކުރެއްވުމުންނެވެ. އަދި، ރިލްވާން ހޯދުމުގެ މަސައްކަތަކަށް ސިފައިން ވެސް ނެރެފައިވާ ކަމަށް ވިދާޅުވުމުންނެވެ.
ރިލްވާން ތަހުގީގާ ގުޅޭ ގޮތުން މިނިސްޓަރުންނާއި ޔާމީން ބަދަލު ކުރައްވާފައިވާ މެސެޖުތަކުގެ ޗެޓްލޮގް
ރިލްވާން މައްސަލާގެ ތަހުގީގަށް ޔާމީން ހުރަސް އެޅުއްވި ކަމުގެ ތުހުމަތު ރިޔާސީ ކޮމިޝަނުން ވަނީ އެމަނިކުފާނުގެ މައްޗަށް ކޮށްފަ އެވެ. އެކަމާ ގުޅިގެން އިއްޔެ ކޮމިޝަނަށް ހާޒިރުކޮށް ސުވާލުކުރުމުން އެމަނިކުފާނު ހުންނެވީ ހަނެވެ. ނަމަވެސް، އެ ތުހުމަތަށް ޔާމީން އިންކާރު ކުރައްވާ ކަމަށް ވަކީލުން ވަނީ ވިދާޅުވެފަ އެވެ.
އެއާއެކު ޔާމީންގެ މެސެޖްގެ ވާހަކަ އަނެއްކާވެސް ފެންމަތިވެފައިވަނިކޮށް އުމަރު ނަސީރު މިއަދު "އަދަދު"އަށް ވިދާޅުވި ގޮތުގައި، އަލްޖަޒީރާއިން އާންމުކޮށްފައިވާ ޗެޓް ލޮގަކަކީ ސައްހަ ޗެޓް ލޮގެކެވެ.
ނަމަވެސް، އުމަރު ވިދާޅުވި ގޮތުގައި އަލްޖަޒީރާއިން އެ މެސެޖު ޓްވިސްޓްކޮށްލީ ކަމަށާއި ރިލްވާންގެ މައްސަލާގެ ތަހުގީގު ހުއްޓާލުމަށް ނުވަތަ ހުރަސް އެޅުމަށް ޔާމީން އެއްވެސް އިރަކު އަންގަވާފައިނުވެ އެވެ.
އެމަނިކުފާނު އެންގެވީ އެ މައްސަލާގައި "ތިވަރު ނުކުރުމަށް" ކަމަށެވެ.
"އެމަނިކުފާނު އެންގެވީ މާގިނަ ސިފައިންނާއި ފުލުހުން އެކަމަށް ނުނެރުމަށް، އެއީ އޭރު ވެސް 100 އަށްވުރެ ގިނަ އޮފިސަރުން އެކަމަށް ނެރެފައިވާތީ، އޯވަވެލްމް ނުވުމަށް އެންގެވީ އެހެންވެ،" އުމަރު ވިދާޅުވި އެވެ.
"އޯވަވެލްމްގެ މާނައަކީ ތަހުގީގު ހުއްޓާލުމެއް ނޫން،"
ޔާމީންގެ މެސެޖަކީ ސައްހަ މެސެޖެއް ކަމަށް އުމަރު މިއަދު ވިދާޅުވި ނަމަވެސް، އަލްޖަޒީރާއިން ޑޮކިއުމެންޓްރީ ނެރުނު ދުވަސްވަރު އަމުރު ކުރެއްވި ޓްވީޓެއްގައި ވިދާޅުވެފައިވަނީ ރިލްވާން މައްސަލާގައި ޔާމީންގެ އެއްވެސް މެސެޖެއް ލިބިފައި ނޯންނާނެ ކަމަށާއި އެ މެސެޖެއް އަލްޖަޒީރާގެ އަތުގައި ނުވެސް އޮންނާނެ ކަމަށެވެ.
އުމަރު މިއަދު ވެސް ވަނީ އޭނާގެ އެ ޓްވީޓް ދިފާއު ކުރައްވާފަ އެވެ.
އެގޮތުން، އޭނާ ވިދާޅުވި ގޮތުގައި ޔާމީންގެ މެސެޖަކީ ސީދާ އޭނާއަށް ފޮނުއްވި މެސެޖެއް ނޫނެވެ. ނަމަވެސް، އެއީ ވައިބާ ގްރޫޕެއްގައި އޮތް އޯޕަން ޑިސްކަޝަނަކަށް ޔާމީން ފޮނުއްވި މެސެޖެއް ކަމަށެވެ.
"ޕްރައިވެޓްކޮށް މެސެޖެއް ފޮނުވުމާއި އޯޕަން ގުރޫޕަކަށް މެސެޖެއް ފޮނުއްވުމާ އެއީ ވަރަށް ތަފާތު ދެ ކަމެއް،" އުމަރު ވިދާޅުވި އެވެ.
މަރުތައް ތަހުގީގު ކުރާ ކޮމިޝަނުން މިއަދު ކުރީގެ ރައީސް ޔާމީންއާ ސުވާލު ކުރާއިރު، ސެޕްޓެމްބަރު، 2019 ގައި ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ އޭރުގެ ރައީސް ހުސްނުއްސުއޫދު ވިދާޅުވެފައި ވަނީ ރިލްވާން މައްސަލައިގައި ޔާމީންއަށް ދައުވާ ކުރެވޭނެ ހެކި ލިބިފައި ނެތް ކަމަށެވެ.
މިނިވަން ނިއުސްގައި މަސައްކަތް ކުރި ނޫސްވެރިޔާ ރިލްވާން ގެއްލުވާލާފައި ވަނީ އޯގަސްޓް 7، 2014 ގަ އެވެ. ޓެރަރިސްޓު ޖަމާއަތް އަލް-ގައިދާ އަށް ނިސްބަތްވާ ދިވެހި ބަޔަކު ރިލްވާން މަރާލުމަށްފަހު ކަނޑު ފެއްތި ކަމަށް މަރު ކޮމިޝަނުން ބުނެފައި ވަނީ ވެސް ސެޕްޓެމްބަރު، 2019، ގައި ބޭއްވި ނޫސްވެރިންގެ ބައްދަލުވުމުގަ އެވެ.
ރިލްވާން މަރާލީ އޭނާއަކީ މުރުތައްދެއް ކަމަށް ކަނޑައަޅައި އެ ޖަމާއަތް ތެރޭގައި ހުކުމް ކުރުމަށްފަހު ދީނުގެ ނަމުގައި ކަމަށް ވެސް މަރު ކޮމިޝަނުން ބުންޏެވެ. އަދި ރިލްވާން މަރާލީ ޝަހާދަތުގެ ދެކަލިމަ އޭނާ ކިޔައި ކިޔައި އޮއްވާ ކަމަށް ވެސް ކޮމިޝަނުން ހާމަ ކުރި އެވެ.
ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވި ފުރަތަމަ ދުވަހު އުފެއްދެވި މަރުތައް ތަހުގީގު ކުރާ ކޮމިޝަނުން ބުނެފައި ވަނީ ރިލްވާން މަރާލި މީހުންނަކީ ހަނގުރާމައަށް ދިޔުމަށް ރާއްޖެއިން މީހުން ރެކްރޫޓު ކުރުމުގެ އިތުރުން މަސްތުވާތަކެތި ވިއްކުމާއި މި ބާވަތުގެ ކުށްތަކަށް ވެސް އަރައިގަންނަ ބައެއް ކަމަށެވެ.
