އެމަނިކުފާނުގެ ކޮއްކޯފުޅު ރައީސް އަބްދުﷲ ޔާމީންއާ ދެކޮޅަށް އެ ވެރިކަމުގައި ކުރީގެ ރައީސް މައުމޫން އަބްދުލްގައްޔޫމް ނިކުންނެވީ ވެރިކަން އަނިޔާވެރިކަމާއި ކޮރަޕްޝަނާ ދިމާލަށް ދިޔުމުން ކަމަށް ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެ އެވެ.
ރައީސް މައުމޫންގެ އެންމެ ދޮށީ ދަރިކަނބަލުން ޔުމްނާ އެމަނިކުފާނުގެ ދިފާއުގައި ނިކުންނަވާފައި މި ވަނީ ރައީސް މައުމޫން، ރައީސް ޔާމީނާ ދެކޮޅުވީ މައުމޫންގެ "ލެގަސީ" ގެއްލޭތީ އެކަމާ ކަންބޮޑުވެގެން ކަމަށް އިދިކޮޅު ޕީޕީއެމްގެ ވަގުތީ ލީޑަރު އަބްދުﷲ އަބްދުއްރަހީމް ވިދާޅުވެފައި އޮއްވަ އެވެ.
ރައީސް މައުމޫނަށް ފާޑުވިދާޅުވަމުން އަބްދުއްރަހީމް ރޭ ވިދާޅުވީ ރައީސް ޔާމީންގެ ވެރިކަމާ ދެކޮޅަށް މައުމޫން ނިކުންނެވީ ކިންގް ސަލްމާން މިސްކިތް ބިނާ ކުރުމާއި ހުޅުމާލޭ ފޭސް ދޭއް ހިއްކުން ފަދަ މަޝްރޫއުތަކުގެ ސަބަބުން އެމަނިކުފާނުގެ ލެގަސީ ގެއްލޭ ކަމަށް ގަބޫލު ކުރެއްވިގެން ކަމަށެވެ.
ނަމަވެސް އެއަށް ރައްދު ދެއްވައި މިއަދު ސޯޝަލް މީޑިއާގައި ޔުމްނާ ލިޔުއްވާފައި ވަނީ އަބްދުއްރަހީމް ހެއްދެނީ "ކަނޑައެޅިގެން ދޮގެއް" ކަމަށެވެ. އަދި ވިދާޅުވީ ޔާމީން ބިނާ ކުރައްވާފައި ވަނީ މައުމޫންގެ ތަސައްވަރު ކަމަށެވެ.
"ފޭސް ދޭއް ވެސް ބްރިޖް ވެސް އެއީ މައުމޫންގެ ތަސައްވުރެއް. ތާއީދު އަނބުރާ ގެންދެވީ ޕީޕީއެމް ސަރުކާރު ޕީޕީއެމްގެ އުސޫލުތަކާ ދުރަށް ގޮސް ކޮރަޕްޝަނާއި އަނިޔާވެރިކަމުގެ ތެރެއަށް ދިޔުމުން. އޭރު ކަންހިނގައިދިޔަ ގޮތް ހަނދާން ނެތޭހާ ދުވަހެއް ނުވޭ،" ޔުމްނާ ޓުވިޓާގައި ވިދާޅުވެފައިވެ އެވެ.
ރައީސް ޔާމީންގެ ވެރިކަމުގައި އެމަނިކުފާނުގެ އެދިވަޑައިގަތުމަކަށް ރައީސް މައުމޫނާ ބައްދަލު ކުރެއްވުމުން މާލޭގައި އިސްލާމީ މަރުކަޒެއް ބިނާ ކޮށްފައި ވަނިކޮށް ހެންވޭރުގައި ކިންގް ސަލްމާން މިސްކިތް ނަމުގައި އެހެން އިސްލާމީ މަރުކަޒެއް ހެދުމުގެ ބޭނެއް ނެތް ކަމަށާއި ހުޅުމާލެ ހިއްކަވާފައި ވަނިކޮށް ފޭސް ދޭއްގައި "ޒުވާނުންގެ ޝަހަރެއް" ހިއްކުމުގެ ބޭނުމަކީ ކޮބައިތޯ މައުމޫން ސުވާލު ކުރެއްވި ކަމަށް އަބްދުއްރަހީމް ރޭ ވަނީ ވިދާޅުވެފަ އެވެ.
"މިއީ އެވެރިކަމުގެ ތިއްބަވާފައި ނިކުމެވަޑައިގަންވަން ދެއްކެވި ހުއްޖަތް. މިރޭ ތަފްސީލުކޮށް ދަންނަވާނަން އެއީ ކޮން ބޭފުޅެއްކަންވެސް. ރައީސް މައުމޫން ވިދާޅުވި އެއްޗެއް. ދެކޮޅެއް ނެހެއްދެވޭނެ އަޅުގަނޑުގެ ގާތުގައި ވިދާޅުވީ. އަޅުގަނޑު ގާތުގައި ވިދާޅުވީ ތިމަންނާގެ މައްސަލައަކީ މިއީއޭ. ތިމަންނާގެ ލެގަސީ ދުއްވާލާށޭ ރައީސް ޔާމީން އެ މަސައްކަތް ކުރައްވަނީ،" އޭނާ ވިދާޅުވި އެވެ.
މައުމޫން، ރައީސް ޔާމީނާ ސިޔާސީ ގޮތުން ދުރަށް ޖެހިވަޑައިގެންނެވީ 2016 ވަނަ އަހަރެވެ. އޭގެ ފަހުން މައުމޫން މަސައްކަތް ކުރެއްވީ އެއިރުގެ އިދިކޮޅު ފަރާތްތަކާއެކު އެވެ. އަދި 2018 ވަނަ އަހަރު ސުޕްރީމް ކޯޓުން ނެރުނު އަމުރާއެކު ހަައްޔަރު ކުރި ސިޔާސީ ފަރާތްތަކުގެ ތެރޭގައި މައުމޫން ހިމެނެ އެވެ.
އޭގެ ފަހުން އެއް އަހަރަށް ވުރެ ގިނަ ދުވަހު މައުމޫން ޖަލުގައި އޮންނެވި އެވެ.
