ބ. ފުޅަދޫ ކައިރިއަށް މޫދަށް އެރިގެން އުޅެނިކޮށް އެކުގައި އުޅުނު މީހުން ގެނބޭތީ ސަލާމަތްކުރަން އުޅުމުގެ ތެރޭގައި މީހަކު ގެނބިގެން މަރުވެއްޖެ އެވެ.
މިހާތަނަށް އެނގިފައިވާ ގޮތުގައި މިއަދު މެންދުރުގެ ވަގުތެއްގައި ހިނގި މި ހާދިސާގައި ހަތަރު މީހަކު ގެނބުނު އިރު، މަރުވީ އޭގެ ތެރެއިން އެކަކެވެ. ދެން ތިބި ތިން މީހުންނަށް އިތުރު އަނިޔާއެއް ނުވެ އެވެ. އަދި އެ މީހުންގެ ސިއްހީ ހާލު ރަނގަޅު ކަމަށް މައުލޫމާތު ލިބެ އެވެ.
މި ހާދިސާއާ ގުޅިގެން ފުޅަދޫގެ ކައުންސިލަރު ފާތިމަތު ޝަޒްނާ "އަދަދު"އަށް ވިދާޅުވީ، އެ މީހުންނަކީ އިއްޔެގެ ވަގުތެއްގައި ފުޅަދޫއަށް ޗުއްޓީ ހޭދަކުރަން އައި ބަޔަކު ކަމަށެވެ. އަދި ދެން ތިބި މީހުން ހޮސްޕިޓަލުން ދޫކޮށްލުމުން މިހާރު ރަށުން ފުރައިގެން ގޮސްފައިވާ ކަމަށް ވިދާޅުވި އެވެ.
މަރުވި މީހާއާ ގުޅިގެން މިހާތަަނަށް ލިބިފައިވާ މައުލޫމާތަކީ އޭނާއަކީ 36 އަހަރުގެ ދިިވެހި ފިރިހެނެއް ކަމެވެ. އޭނާއާ ބަހޭ އިތުރު އެއްވެސް މައުލޫމާތެއް މިހާތަނަށް ވަނީ ކަށަވަރުވާ ގޮތް ނުވެފަ އެވެ.
ބަޔަކު ގެނބޭތަން ފެނިގެން މި މީހުން ސަލާމަތްކުރުމުގައި ފުޅަދޫ ކައުންސިލްގެ ރައީސް އަލީ އަޒުހަރު ވެސް ހަރަކާތްތެރިވީ ކަމަށް ވަނީ މައުލޫމާތު ލިބިފަ އެވެ. އަދި އަޒުހަރު ވަނީ އެ މީހުން އެއްގަމާ ހަމަޔަށް ގެންގޮސްދީފަ އެވެ. ނަމަވެސް، އަޒްހަރު ފޯނަށް ޖަވާބު ނުދެއްވާތީ މި ހާދިސާއާ ގުޅިގެން އޭނާގެ ބަހެއް ލިބޭ ގޮތް ވަނީ ނުވެފަ އެވެ.
އެ ރަށުން މައުލޫމާތު ދިން އާންމުންގެ މީހަކު ބުނީ، މަރުވި މީހާ އެއްގަމަށް އެރުވި އިރު ވެސް އެއްވެސް ހަރަކާތެއް ނެތް ކަމަށެވެ. އަދި އޭނާ ހޮސްޕިޓަލަށް ގެންދިޔުމާ ހަމައަށް ވެސް އެއްވެސް ހަރަކާތެއް ނެތް ކަމަށް ބުންޏެވެ.
މި ހާދިސާއާ ގުޅިގެން ފުލުހުން ބުނީ ފުޅަދޫގައި މޫދަށް އެރި އުޅެނިކޮށް މީހަކު މަރުވި ހާދިސާ ރިޕޯޓް ކުރީ މިއަދު މެންދުރު 2:30 ހާއިރު ކަމަށެވެ. އަދި އެ ހާދިސާއާ ގުޅިގެން ބަލަން ޖެހޭ ކަންކަން މިހާރު ބަލަމުން އަންނަ ކަމަށް ބުންޏެވެ.
މި ދުވަސްވަރަކީ ރާއްޖެއަށް މޫސުން ގޯސް އަދި ވައި ގަދަ ދުވަސްވަރެކެވެ. އަދި ގިނަ ބަޔަކު ރަށްރަށަށް ޗުއްޓީ ހޭދަކުރަން ގޮސްފައިވާއިރު، ކަނޑު ދަތުރުކުރުމުގައި ހާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކޮށްފަ އެވެ.
