ބ. ފުޅަދޫގައި އާންމު މިންގަނޑުތަކާއި ހިލާފަށް ފަތުރުވެރިން ހެދުން އަޅައިގެން އުޅޭނަމަ އެ ފަތުރުވެރިން ނިސްބަތްވާ ގެސްޓްހައުސްތައް ޖޫރިމަނާ ކުރުމަށް އެ ރަށު ކައުންސިލުން ނިންމައިފި އެވެ.
ކައުންސިލުން ބޭއްވި ބައްދަލުވުމުގައި ފުޅާ ދާއިރާއެއްގައި މަޝްވަރާ ކުރުމަށްފަހު ނިންމީ އިޖުތިމާއީ އާންމު މިންގަނޑުތަކާ ހިލާފަށް ހެދުން އަޅައިގެން އާންމު ސަރަހައްދުތަކުގައި އުޅޭ ފަތުރުވެރިން ނިސްބަތްވާ ގެސްޓްހައުސްތައް ބަލާ އެ ގެސްޓްހައުސްތައް 750ރ. އިން ޖޫރިމަނާ ކުރުމަށެވެ.
ފުޅަދޫ ކައުންސިލުން ބުނީ އާންމު މިންގަނޑުތަކާއި ހިލާފަށް ފަތުރުވެރިން ހެދުން އަޅައިގެން އާންމު ސަރަހައްދުތަކުގައި އުޅޭކަމުގެ ޝަކުވާ ދޭތެރެ ދޭތެރެއިން ލިބޭއިރު، ގެސްޓްހައުސްތައް ޖޫރިމަނާ ކުރަން ނިންމީ އެކަން ހައްލުކުރަން ކުރާ މަސައްކަތް މިހާތަނަށް ވެސް ހައްލުވެފައި ނުވާތީ ކަމަށެވެ.
މީހުން ދިރިއުޅޭ ރަށްރަށުގެ އާންމު ތަންތަނުގައި ބީދޭސީންނާއި ޓޫރިސްޓުން ބިކިނީ ފަދަ ނިވައިކަން ކުޑަ ފޭރާމުގައި އުޅުން ހުއްޓުވަން ރައްޔިތުންގެ މަޖިލީހަށް މިދިޔަ މަހު ޕެޓިޝަނެއް ހުށަހަޅައި، ތާއީދު ހޯދުމުގެ މަސައްކަތް ވަނީ ފަށާފަ އެވެ.
ޒަމްޒަމް ފާރިޝް މަޖިލީހަށް ހުށަހެޅި އެ ޕެޓިޝަނުގައި މިހާތަނަށް 1،359 މީހުން ވަނީ ސޮއިކޮށްފަ އެވެ.
މަޖިލީހުގެ ގަވާއިދަށް ޕީއެންސީން ގެނައި ބަދަލުގައިވާ ގޮތުންޕެޓިޝަނެއް މަޖިލީހުގައި ކުރިޔަށް ގެންދާނީ 500 މީހުން ސޮއިކުރުމުންނެވެ.
ލޯކަލް ޓޫރިޒަމުގެ ދަށުން މީހުން ދިރިއުޅޭ ރަށްރަށުގައި ހިންގާ ޓޫރިސްޓު ހޮޓާތަކާއި ގެސްޓްހައުސްތަކަށް އަންނަ ޓޫރިސްޓުން ރަށު ތެރޭ އުޅޭއިރު އަމަލުކުރަން ޖެހޭ މިންގަނޑުތައް މިހާރަށްވުރެ ހަރުކަށި ކުރަން ނިންމާފައިވާ ކަމަށް މުހައްމަދު މުއިއްޒު މިދިޔަ ޖެނުއަރީ މަހު ވިދާޅުވި އެވެ.
